Ooratta Alamiyaa Deꞌuwawu Ha Wodiyan Giigetta

1, 2. (a) Gannate gidida saꞌan neeni demmanawu keehi amottiyo anjjoy aybee? (Ha huuphe yohuwaa doomettan deꞌiya misiliyaa xeella.) (b) Ooratta alamiyan ayyaanaaban demmana anjjoy aybee?

“TUMU DE7UWAA.” Ha qofay nuuppe dariya baggay Gannate gidida saꞌan merinawu deꞌana hidootaa hassayanaadan oottees. Kiitettida PHawuloosi ‘tumu deꞌoy’ ‘merinaa deꞌuwaara’ gayttidaba gidiyoogaa yootiis. (1 Ximootiyoosa 6:12, 19 nabbaba.) Nuuni merinawu ufayssan woppu giidi deꞌana wodiyaa naagoos. Asatettaaninne qofan payya gididi ubba galla maallado beegottiyo wode nuuyyo aybi siyettanaakko qoppanawukka metiyaaba. (Isi. 35:5, 6) Hayquwaappe denddiyaageeta gujjin, nuuni siiqiyoogeetuuranne nu laggetuura gayttiyoogee ay keena ufayssiyaabaakko qoppa. (Yoh. 5:28, 29; Oos. 24:15) Saynisiyan, muuziqan, keettaa keexxiyoogaaninne harabaa eriyoogankka qara gidana danddayoos.

² Nuuni hegaa mala loꞌꞌobaa naagikkokka, ooratta alamiyan demmana waanna anjjoy ayyaanaabaa. Yihoowa sunttay geeyidoogaanne a haaroy suure gidiyoogee qonccidoogaa eriyoogee ay keena ufayssanddeeshsha! (Maa. 6:9, 10) Yihooway asaassinne saꞌaassi halchido koyro halchoy polettiyoogaa beꞌiyo wode, nuuni keehi ufayttana. Qassi nuuni wottiyoobi baynna asa gidiyo wode, metootennan Yihoowakko shiiqana danddayiyoogaa qoppa.—Maz. 73:28; Yaaq. 4:8.

3. Nuuni ha wodiyan aybawu giigettana koshshii?

³ Yesuusi, “Xoossau ubbabai danddayettees” giido gishshawu, ha anjjoti nubaa gidana danddayoosona. (Maa. 19:25, 26) SHin nuuni ooratta alamiyan, Kiristtoosa SHaꞌu Layttaa Haaruwaappe simminkka deꞌanawu qoppikko, merinaa deꞌuwaa haꞌꞌi mintti “oiqqana” bessees. Nuuni ha iita alamee xayiyo wodiyaa naagiiddi deꞌana bessees; qassi ooratta alamiyaa deꞌuwawu giigettanawu maaddiyaabaa ha wodiyan oottana koshshees. Nuuni ha iita alamiyan deꞌiiddi hegaadan waatidi oottana danddayiyoo?

GIIGETTIYO OGIYAA

4. Ooratta alamiyaa deꞌuwawu nuuni ha wodiyan waanidi giigettana danddayiyaakko qonccissa.

⁴ Xoossay ehaana ooratta alamiyan deꞌanawu ha wodiyan waanidi giigettana danddayiyoo? Hara biitti biidi deꞌanawu halchida giidi qoppoos. Yaa biidi deꞌanawu waanidi giigettana danddayiyoo? Yan asay haasayiyo qaalaa tamaariyoogaa doommana danddayoos. Eta wogaabaa tamaariyoogeekka maaddiyaaba. Eta qumaappe amaridaagaa mi beꞌana danddayoos. Amarida ogiyan, he biittan deꞌiyaabadan deꞌiyoogaa doommana danddayoos. Nuuni yaa biidi hegaadan deꞌanawu koyoos. Hegaadankka, danddayettida keenan ooratta alamiyan deꞌanawu qoppiyoogaadan ha wodiyan deꞌiyoogan, he wodiyawu giigettana danddayoos. Hegaara gayttidaagan kaallidi deꞌiya leemisota beꞌa.

5, 6. Xoossaa azazuwawu azazettiyoogaa tamaariyoogee ooratta alamiyaa deꞌuwawu loohanaadan nuna waati maaddii?

⁵ Ooratta alamiyan Xoossawu haarettenna uri baawa. Seexaanay haariyo alamiyan asay bana barkka ayssanaadan minttettiyoogaappe dummatiya he wodee ayba woppissiyaaba gidanee! Issi issi asay ba koyidoogaadan deꞌiyoogaa keehi xoqqu ootti xeellana danddayees; shin hegee ay kaalettidee? Xoossaa zoriyaa siyennan ixxiyoogee waayiyaa, metuwaanne daafabaa kaalettiis. (Erm. 10:23) Asay ubbay siiquwan haariya Yihoowawu haarettana wodiyaa keehi yeemottidi naagoos!

⁶ Nuuni ooratta alamiyan saꞌaa loyttiyoogan, hayquwaappe denddidaageeta tamaarissiyoogaaninne Yihooway asaayyo halchidobaa oottiyoogan ayyo haarettanaagee ufayssiyaaba. Gidoppe attin, nuuni dosennabaa oottanaadan azazoy imettikko shin? Nuussi imettidabaa ufayttidi polanawu danddayettida ubbabaa oottiyoogan he azazuwawu azazettanee? Nu giddoppe daroti ee giidi zaarana! Yaatin, ha wodiyan Xoossay azaziyoobaa ubbatoo poliyoo? Hegaadan oottikko, Yihoowa haaruwan merinawu deꞌanawu giigettoos.

7, 8. (a) Nuuni hashetidi oottana koshshiyoy aybissee? (b) Issi issi Kiristtaanetu hanotay waanidi laamettidee? (c) Ooratta alamiyan saꞌan deꞌana deꞌuwaabaa ay ammanettana danddayiyoo?

⁷ Yihooway ha wodiyan azaziyoobawu azazettiyoogaa xallan gidennan, hashetidi ufayttidi oottiyoogankka ooratta alamiyaa deꞌuwawu giigettana danddayoos. Nuuyyo ooratta oosoy imettiyo wode ufayttidi oottiyoogan sintta xeera gididi kaalettiyaageetuura ha wodiyan hashetikko, ooratta alamiyankka hegaadan oottana danddayoos. (Ibraawe 13:17 nabbaba.) Hidootaa Biittan Israaꞌeelatussi laatay saaman shaahetti imettiis. (Qoo. 26:52-56; Yaas. 14:1, 2) Nuuni ubbay ooratta alamiyan maddabettidi deꞌana sohuwaa ha wodiyan erennaagee tuma. SHin, nuuni he wode saꞌan awan deꞌikkokka, Yihooway koyiyoobaa hashetidi oottiyo wode keehi ufayttananne woppu gaana.

⁸ Kawotettaa haaruwan deꞌiyo maataa demmanawu nuuni Yihoowa dirijjitiyaara hashetidi oottanawu baaxetiyoogeenne Xoossay immiyo oosuwaa poliyoogee bessiyaaba. Gamꞌꞌidi, nu hanotay laamettana danddayees. Leemisuwawu, Amarkkan Beeteele keettaa asaappe amaridaageeti aqinye gididi maddabettidi, haꞌꞌi hara qommo kumetta wode haggaazuwan daro anjjuwaa demmiiddi deꞌoosona. Yuuyidi xomoosida harati cimatettaa woy harabaa gaasuwan haꞌꞌi dumma aqinye gididi oottoosona. Nuuni imettidabaa ufaytti oottiyoogaa tamaarikko, maaduwaa demmanawu Xoossaa woossikko, qassi ayyo haggaazanawu danddayettida ubbabaa oottikko, wayssiya ha wurssetta gallassankka ufayttananne daro anjjuwaa demmana. (Leemiso 10:22 nabbaba.) Sinttappe nuuni demmanabay shin? Ooratta alamiyan nuuni deꞌanawu koyiyo heeri deꞌikkokka, harasan deꞌanaadan nuuyyo odettana danddayees. Nuuni he wode awan haggaazikkonne, qassi ay oottikkonne, ufayssan poocu giidi galatiiddi deꞌanaagaa ammanettoos.—Nah. 8:10.

9, 10. (a) Ooratta alamiyan neeni danddayancha gidana koshshiyo issi issibay aybee? (b) Nuuni danddayancha gidiyoogaa waati bessana danddayiyoo?

⁹ Ooratta alamiyan nuuni danddayancha gidana koshshiyo wodee deꞌana danddayees. Leemisuwawu, issi issi asati hayquwaappe denddin eta dabbotinne eta laggeti ufayttiyoogaa siyana danddayoos. SHin nuuni siiqiyoogeeti denddana gakkanaassi naagana koshshennan waayi aggana. Yaanikko, nuuni danddayancha gididi haratuura ufayttanee? (Roo. 12:15) Yihooway qaalaa gelidobay polettana gakkanaashin ha wodiyan danddayan naagiyoogee, he wode danddayancha gidanaadan nuna maaddees.—Era. 7:8.

¹⁰ Nuuni tumaa akeekidobay laamettiyoogaara gayttidaagan danddayancha gidiyoogankka ooratta alamiyaa deꞌuwawu giigettana danddayoos. Laamettidabaa xannaꞌiyoo, qassi loytti akeekana xayikko danddayancha gidiyoo? Yaatikko, Yihooway asaappe koyiyoobaa ooratta alamiyan yootiyo wode, nuuni danddayancha gidanawu waayi metootana.—Lee. 4:18; Yoh. 16:12.

11. Haratuura waani deꞌanaakko Yihooway ha wodiyan nuna tamaarissiyoobay aybee, qassi hagee nuna ooratta alamiyan waati goꞌꞌanee?

¹¹ Nuuni ooratta alamiyan deꞌanawu giigettana koshshiyo harabay atto giyoogaa tamaariyoogaa. Kiristtoosa SHaꞌu Layttaa Haaruwaa wode, xillotikka nagaranchatikka iita eeshshaa agganawu wodiyaa koshshana danddayees. (Oos. 24:15) He wode issoy issuwaara siiqettana danddayiyoo? Nuuni ha wodiyan coo atto giyaageetanne haratuura siga deꞌiyaageeta gidikko, he wode hegaadan deꞌanawu metootokko.—Qolasiyaasa 3:12-14 nabbaba.

12. Ha wodiyan nuuni deꞌiyo deꞌoy sinttappe naagiyoobaara waani gayttiyaakko qonccissa.

¹² Ooratta alamiyan nuuni koyiyoobaa koyido wodiyan ubbatoo waayi demmana. He wode nuuni siiquwan haariya Yihoowawu haarettidi goꞌettiyo wode, ayba hanotankka nashshananne ufayttana koshshees. Yihooway ha wodiyan nuna tamaarissiyo eeshshay he wode nuuyyo deꞌana bessees. He wode deꞌanawu qoppiyoogaadan ha wodiyan deꞌiyoogan, meri merinawu nuussi koshshiya eeshshay deꞌiyoogeeta gidoos. Yaatiyoogan, ‘sinttappe yaana saꞌan’ deꞌanabaa mintti ammanoos. (Ibr. 2:5; 11:1) Qassi, he wode saꞌan deꞌana xillotettaa keehi yeemotti naagiyoogaa bessoosinne Xoossay ehaana ooratta alamiyan merinawu deꞌanawu giigettoos.

HA WODIYAN AYYAANAABAA OOSUWAA WOZANAN WOTTA

13. Ooratta alamiyan nuuni aybippenne aaruwan kaseyanabay aybee?

¹³ Nuuni sinttappe demmana tumu deꞌuwawu giigettiyo hara issi ogiyaa ane beꞌoos. Saꞌan ooratta alamiyan qumaanne nuussi koshshiya harabaa keehi daruwaa immanawu Yihooway qaalaa gelikkokka, nuna aybippenne aaruwan ufayssanabay ayyaanaaban nuussi koshshiyaabaa demmiyoogaa. (Maa. 5:3) Nuuni aybippenne aaruwan kaseyiyoobay ayyaanaabaa gidana; qassi nuuni Yihoowan keehi ufayttiyoogaa bessana. (Maz. 37:4) Nuuni ha wodiyan ayyaanaabaa kaseyiyoogan, sinttappe demmana tumu deꞌuwawu giigettoos.—Maatiyoosa 6:19-21 nabbaba.

14. Ayyaanaaban ay halchiyoogee yelagati ubbatoo merinaa deꞌuwaa qoppanaadan maaddana danddayii?

¹⁴ Xoossawu oottiyoogan waatidi kaseegaappe aaruwan ufayttana danddayiyoo? Issi ogee ayyaanaabaa halchiyoogaa. Neeni ne deꞌuwan Yihoowawu haggaazanawu loytta qoppiya yelaga gidikko, dumma dumma kumetta wodiyaa haggaazuwaabay xuufiyan kiyidaagaa nabbabada hegeetuppe issuwaa oottanawu halchiyoogee loꞌꞌo.a Daro layttawu kumetta wodiyaa haggaazida amaridaageetuura haasayana danddayaasa. Neeni ne deꞌuwan Yihoowawu haggaaziyoogan ooratta alamiyankka ayyo haggaazanawu giigettaasa; nena Xoossay loohissidoogeenne neeni ne deꞌuwan beꞌidobay yan keehi maaddana.

15. Kawotettaabaa sabbakiyaageeti ayyaanaaban halchidi polana danddayiyo halchoy aybee?

¹⁵ Nuuni Kawotettaabaa yootiyo gishshawu, ayyaanaaban ay halchana danddayiyoo? Haggaazuwan issi issiban qara gidanawu halchana danddayoos. Woy qassi Geeshsha Maxaafaa maaraanne he maaraa waati kaallanaakko kaseegaappe loytti eranawu baaxetana danddayoos. SHiiquwan nabbabiyoogan, haasayaa haasayiyoogan woy minttettiya qofaa yootiyoogan kaseegaappe qara gidiyoogaabaa shin? Harabaakka qoppana danddayaasa. Ayyaanaabaa halchiyoogee neeni Xoossaa oosuwawu keehi mishettanaadan oottees; hegee qassi neeni ooratta alamiyaa deꞌuwawu giigettanaadan maaddees.

NU ANJJOY DOOMMIIS!

16. Yihoowayyo haggaaziyoogee aybippenne keehi loꞌꞌo deꞌo gididoy aybissee?

¹⁶ Xoossay ehiyo ooratta alamiyan deꞌanawu giigettanawu ha wodiyan ufayssiya loꞌꞌo deꞌuwaa deꞌiyoogaa aggibayana koshshii? CHii koshshenna! Yihoowayyo haggaaziyoogaa keenaa ufayssiya deꞌoy baawa. Nuuni asi wolqqanttin woy iita waayiyaappe attana xallawu ayyo haggaazokko. Nuuni Yihoowayyo haggaazanawu merettida; hegee gita ufayssaa demissees. Xoossay siiqiyoogeeta gidiyoogeenne a kaaletuwaa kaalliyoogee hara aybippenne aadhees. (Mazamure 63:1-3 nabbaba.) Yihoowayyo wozanappe haggaaziyoogan ayyaanaaban anjjuwaa demmanawu ooratta alamee yaana gakkanaashin naagana koshshenna; ha wodiyankka he anjjuwaa demmana danddayoos! Nuuppe amaridaageeti daro layttawu he anjjuwaa demmida; qassi nu deꞌuwan haraban aybiininne hegaadan ufayttana danddayennaagaa eroos.—Maz. 1:1-3; Isi. 58:13, 14.

17. Gannatiyan, dosiyoobaaninne allaxxiyooban nuuni ufayttiyoogee ay keena koshshiyaabee?

¹⁷ Gannatiyan, nuuni dosiyoobaaninne allaxxiyooban ufayttiyo wodee deꞌana. Woni oottiyoobaaninne ufayssiyaaban nuuni ufayttanaadan Yihooway koyennaakko, nuna aybissi hegaadan medhidee? (Era. 2:24) I ‘paxa deꞌiyaageetu ubbaa amuwaa alanawu’ qaalaa geliis. (Maz. 145:16) Amaridaagaa allaxxana koshshikkokka, nuuni Yihoowa dabbo gidiyoogaa kaseyiyo wode hegaappe demmiyo ufayssay gujjees. Saꞌay Gannate gidiyo wodekka hegaadaana. Nuuni Xoossaa Kawotettaa kaseti koyiyoogeenne ha wodiyan Yihoowa asay demmiyo ayyaanaabaa anjjuwaa wozanan wottiyoogee, qassi nu koshshaa bessiyaagaadan xeelliyoogee keehi loꞌꞌo!—Maa. 6:33.

18. Gannatiyan merinawu deꞌana deꞌuwawu giigettiyoogaa waati bessana danddayiyoo?

¹⁸ Saꞌay Gannate gidiyo wode, nuuni awudeegaappenne aaruwan ufayttana. Tumu deꞌuwawu haꞌꞌi giigettiyoogan he deꞌuwaa keehi koyiyoogaa bessiyaageeta gidoos. Xoossay dosiyo eeshshay deꞌiyoogeeta gidoos; qassi Kawotettaabaa mishettidi sabbakiyoogan keehi ufayttiyaageeta gidoos. Ayyaanaabaa oosuwan keehi ufayttiyaageeta gidanawu amottoos. Qassi Yihooway qaalaa gelidobaa wozanappe ammaniyoogan, ha wodiyan ooratta alamiyaa deꞌuwaa naagiiddi deꞌoos!