Deꞌuwan Issi Issibaa Aggiyoogee Ufayssaa Demissees

DAANEELI 2000n Miiriyaamo machiis; hegaappe simmin eti Isppeenen Barssaloona kataman deꞌoosona. Daaneeli hagaadan giis: “Nuuni hara asaagaa mala deꞌuwaa deꞌoos. Nu oosoy nuuni loꞌꞌo quma keettan maanaadan, kare biitti baanaadaaninne payya maayuwaa maayanaadan oottiis. Nuuni haggaazuwaakka ubbatoo haggaazoos.” SHin guyyeppe hanotay laamettiis.

Eti 2006n shiiqido issi gita shiiquwan, “‘Hayquwawu efiyoogeeta’ eti merinaa deꞌuwaa ogiyan baanaadan nuuni maaddanawu danddayiyo ubbabaa oottiiddi deꞌiyoo?” yaagiya oyshaa issi haasayan siyidoogee Daaneela wozanaa denttettiis. (Lee. 24:11) Geeshsha Maxaafan deꞌiya, shemppo ashshiya mishiraachuwaa yootiyoogee aawatetta gidiyoogaa he haasayay loytti qonccissiis. (Oos. 20:26, 27) Daaneeli, “Yihooway tawu yootiyaabadan siyettiis” yaagiis. Kaseegaappe aaruwaa haggaaziyoogee daro ufayssaa demissiyoogeekka he haasayan qoncciis. Daaneeli hegee tuma gidiyoogaa eriis. Miiriyaama aqinye gidiyo gishshawu anjjuwaa demmaydda deꞌawusu.

Daaneeli, “Hagee taani keehi laamettana bessiyo wode gidiyoogaa akeekaas” yaagiis. I oottidoykka hegaadaana. I kase oottiyoogaa keena saatiyaa oottiyoogaa aggidi, aqinye gididi haggaaziyoogaa doommiis; qassi inne Miiriyaama Kawotettaabaa sabbakiyaageeti keehi koshshiyoosaa biidi haggaaziyoogee demissana danddayiyo ufayssaa qoppiis.

KOYRO METOOTIDI HEGAAPPE UFAYSSIYAABAA SIYIDA

Uddufune 2007n, Daaneelinne Miiriyaama bantta oosuwaa aggidi, eti kase biidi beꞌido Paanaama biitti biidosona. Eta ooratta moottan Karibiyaa Abban citan deꞌiya Bokas del Toro giyo amarida haruuroti deꞌoosona; hegan deꞌiya asaappe dariya baggay beniisappe yan deꞌiya Ngabe giyo asaa. Daaneelinne Miiriyaama kase minjjido bantta miishshaa goꞌettidi, hosppun aggina gidiyaagaa Paanaaman takkana danddayoos giidi qoppidosona.

Eti he haruuruwaa wolwoluwaaninne bishkkiliitiyan biidosona; qassi eti bishkkiliitiyan koyro 32 kilo meetire gidiyaagaa pudettaa suulliya awan biidoogaa hassayoosona. Daaneeli daafuridi keehi xalaliis. SHin, eti he biittaa qaalaappe amaridaagaa tamaari simmin, keettay ogiyaa doonan deꞌiyo Ngabe asati eta imatuwaa mokkidosona. Takkennan, eti 23 asata Geeshshaa Maxaafaa xannaꞌissidosona.

SHin eti minjjido miishshay wurin azzanidosona. Daaneeli hagaadan giis: “Nuuni azzaniiddi, Isppeene guyye simmanawu qoppiyoogaa doommida. Nuuni Geeshsha Maxaafaa xannaꞌissiyoogeeta aggidi biyoogee nuna keehi azzanttiis.” SHin he wode, issi aginaappe guyyiyan, eti keehi ufayssiyaabaa siyidosona. Miiriyaama, “Nuuni dumma aqinye gididi haggaazanaadan shoobettida. Hagan takkiyoogee keehi ufayssiyaaba!” yaagasu.

ETA KEEHI UFAYSSIDABAA

Dirijjitiyan 2015n, issi issibay laamettidoogaappe denddidaagan, Daaneelinne Miiriyaama kummetta wodiyaa aqinyeta gidanaadan odettiis. Eti waatidonaa? Eti, “Ne ogiyaa hadaraa GODAAYYO imma. An ammanetta; i neessi oottana” yaagiya Mazamure 37:5n deꞌiya qaalan ammanettidosona. Eti aqinye gididi haggaaziiddi banttawu koshshiyaabaa kunttanawu ooso demmidi, haꞌꞌi Paanaaman Baragiwas giyo sohuwan deꞌiya gubaaꞌiyan haggaazoosona.

Daaneeli hagaadan giis: “Nuuni Isppeeneppe baanaappe kase, ishalo deꞌuwaa deꞌiyoogaa aggana danddayiyoogaa eribookko. SHin haꞌꞌi hegaadan deꞌoos; nuussi keehi koshshiyaabi aybinne paccibeenna.” Eta keehi ufayssidabay aybee? Eti, “Ashkke asay Yihoowabaa eranaadan maaddiyoogaa keena ufayssiyaabi baawa!” yaagidosona.