Polettana Hidootaa
Yesuusi kaseti yootidoogaadan, Xoossaa Kawotettaa mishiraachchoy kumetta saꞌan sabbakettiiddi deꞌees. (Maatiyoosa 24:14) Geeshsha Maxaafan deꞌiya Daaneela maxaafay he Kawotettay Xoossaa haaro gidiyoogaa yootees. He maxaafan shemppo 2n, beni Baabilooneppe doomidi ha wodiyaa gakkanawu haarida amarida wolqqaama kawotettatu dendduwaabaa yootiya hiraagay deꞌees. Sinttappe hananabaa paydo 44y hagaadan gees:
“Saluwaa Xoossai mulekka kunddenna, hara asaukka imettenna kawotettaa essana. He eqqida kawotettai he kawotettata ubbaa gaaceretti xaissana; shin i merinau eqqidi daana.”
Hageenne Geeshsha Maxaafan deꞌiya hara hiraagati Xoossaa Kawotettay asa haaro ubbaa xayssidi, asay saꞌan woppu giidi maara deꞌanaadan oottanaagaa yootoosona. Xoossaa Kawotettaa haaruwan deꞌoy ay mala gidanee? Mata wode polettana maalaalissiya hidootatuppe amaridaageeti kaallidi qonccidosona.
OLAY DEꞌENNA
Mazamure 46:9: “[Xoossay] sa7aa gaxaa gakkanaassi de7iya olaa teqqees; wonddafiyaa menttees; tooraa kinchchees; gonddalliyaakka taman xuuggees.”
Ha wodiyan ola miishshaa medhdhiyo eraanne hegawu kessiyo miishsha ubbaa woranawu gidennan, asa maaddanawu goꞌettiyaakko alamee ay mala soho gidanaakko qoppa! He hidootay Xoossaa Kawotettaa haaruwan polettana.
HARGGEE DEꞌENNA
Isiyaasa 33:24: “Ooninne, ‘Taani harggais’ yaagenna.”
Wozanaa harggee, kansseree, shekkeeree, woy hara ay harggeenne oonakka caddenna alamiyaabaa qoppa. He wode hosppitaalekka xalekka koshshenna. Sinttappe saꞌan deꞌana ubbawu polo payyatettay deꞌana.
KOSHAY DEꞌENNA
Mazamure 72:16: “Biittan daro kattai mokko; dereti kattan kamettona.”
Biittay asa ubbawu gidiya kattaa mokkana; qassi ubbay hegaa demmana. Namisettiyaanne bollawu koshshiya quma meenna uri deꞌenna.
SAHOY, KAYYOYNNE HAYQOY DEꞌENNA
Ajjuutaa 21:4: “Xoossai eta aifiyaappe afutta ubbaa quccana. Hagaappe sinttanau haiqoinne kayyoi woi waasoinne sahoi de7enna. Aissi giikko, ceegabai xayiis.”
Hegee saꞌay gannate gidin wottiyoobi baynna asa gididi merinawu deꞌana giyoogaa! Hagee nuna medhdhida siiqiya Xoossaa Yihooway gelido qaala.
TUMUPPE POLETTANA
Hagee polettanaadan coo amottiyoobee? Daro asay Geeshsha Maxaafay yootiyo hidootay ufayssiyaaba gidiyoogaa maayikkokka, dumma dumma gaasuwan merinaa deꞌo giyoobaa akeekanawu metootees. Ay asinne hegaa mala deꞌo deꞌi erenna gishshawu, hegee garamiyaaba gidenna.
Asay nagarawunne hayquwawu aylletidi, sahuwan, tuggaaninne metuwan adussa wodiyawu deꞌido gishshawu, daro asay hegaa mala deꞌuwaa meretan wottin deꞌiyaabadan xeellees. SHin hagee nuna medhdhida Xoossaa Yihooway asawu halchchido deꞌuwaappe keehi dumma.
Xoossay ba gelido qaala ubbay polettanaagaa nuuni akeekanaadan koyidi, “[Ta qaalay] taani halchchidoogaa polana; qassi kiittidoogaa oottanaappe attin, taakko coo simmenna” yaagidi mintti yootiis.—Isiyaasa 55:11.
Yihooway Geeshsha Maxaafan ‘worddotenna Xoossaa’ geetettiis. (Tiitu 1:2) I ha ufayssiya ubbabaa sinttappe ehaanawu qaalaa gelido gishshawu, ‘He qaalaadan asay saꞌan Gannatiyan tumuppe merinawu deꞌanee? Xoossay qaalaa gelidobaappe goꞌettanawu nuuni ay oottana bessii?’ giidi nuna oychchiyoogee eratetta. Kaalliya sinttatun deꞌiya, ha oyshatuyyo zaaro gidiya qofay nena maaddana.