Nabbabiyaageetu Oyshaa

Seexaanay Hewaana loꞌꞌuwaanne iitaa erissiya mittaa teeraappe miikko A hayqqennaagaa yootido wode, I ha wodiyan asay shemppoy hayqqenna giyo qofaa iyyo yootidee?

CHii yootibeenna. Hewaana Xoossay diggido mittaa teeraappe miikko, A hayqqanaagaa Dabloosi yootiisippe attin, ayfiyan beettenna issibay ippe shaahettidi (ha wodiyan issoti issoti hayqqenna shemppuwaa goosona) harasan deꞌiyoogaa iyyo yootibeenna. Seexaanay shooshshaa baggaara, Hewaana mittaa teeraappe miikko, ‘A aynnekka hayqqennaagaa’ yootiis. A deꞌuwan deꞌanaagaa, saꞌan loꞌꞌo deꞌuwan ufayttanaagaa, Xoossaappe haakkada deꞌanaagaa I yootiis.—Doo. 2:17; 3:3-5.

Ha wodiyan shemppoy hayqqenna giyo worddo timirttiyawu denddoy Edenen gidana xayikko, asay hegaa ammaniyoogaa awude doommidee? Nuuni geeshshidi erana danddayokko. Nohe wode Bashshaa Haattan worddo goynno ubbay xayidoogaa nuuni eroos. Bashshaa haattaappe attiday Nohanne A soo asaa, qassi eti ubbay tumu goynuwaa goynnoosona; worddo haymaanootiyaa qofaa tamaarissiyay ooninne yan deꞌenna.

Hegaa gishshawu, ha wodiyan shemppoy hayqqenna giyo timirttee Bashshaa haattaappe simmin doommidoogee qoncce. Xoossay Baabiloonen asaa qaalaa dummayido wodenne “sa7a ubbaa bollan” asaa laalido wode shemppoy hayqqenna giyo qofaa eti aassidoogee qoncce. (Doo. 11:8, 9) Ha worddo qofay doommidoy awudenne gidin, hegaa doomissiday ‘wordduwaa aawa’ gidida Seexaanaa Dabloosa; qassi hegee kumetta saꞌan aakkiyoogaa beꞌiyo wode I ufayttiis.—Yoh. 8:44.