Oyshaa Saaxiniyaa

◼ Penggen Geeshsha Maxaafaa Xannaꞌissiyo Wode Woossana Koshshii?

Geeshsha Maxaafaa xannaꞌissiyo wode, doomettaaninne kuuyiyo wode woossiyoogee daro goꞌꞌees. Nuuni woossiyoogan, xannaꞌissiyo wode Yihooway ba geeshsha ayyaanaa immanaadan oychoos. (Luq. 11:13) Woossiyoogee, tamaaree Geeshsha Maxaafaa xinaatiyaa xoqqu oottidi xeellanaadaaninne woygi woossanaakko tamaaranaadan maaddees. (Luq. 6:40) Hegaa gishshau, danddayettiyaaba gidikko xannaꞌissiyo wode woossanau daro takkennaagee loꞌꞌo. Gidikkokka, hanotay dumma dumma gidiyo gishshau, penggen Geeshsha Maxaafaa xannaꞌissiyo wode woossana koshshiya koshshennaakko kuuyanau, xannaꞌissiya uray akeekancha gidana koshshees.

Qoppana bessiya allaalletuppe issoy xannaꞌissiyo sohuwaa. Hanotay injjetiyaaba gidikko, ubbatoo penggen xannaꞌissiyo uraara, doommiyo wodenne kuuyiyo wode akeekan qantta woosaa woossana danddayettees. SHin hegaadan oottiyoogee, hara asay eta xeellanaadan woy xannaꞌiya uray yeellatanaadan oottiyaaba gidikko, hara injjetiyaasan xannaꞌana gakkanaashin woossennan aggiyoogee loꞌꞌo gidana danddayees. Nuuni xannaꞌissiyoy awankka gidin, awude woossana bessiyaakko kuuyanau akeekancha gidana koshshees.—Laappune 2005 Nu Kawotetta Haggaazuwaa, (Amaarattuwaa) sinttaa 4 xeella.