XANNAꞌIYO HUUPHE YOHUWAA 3
Yihooway Ne Xoossay Nena Xoqqu Oottidi Xeellees!
“I nuuni kauyyido wodekka nuna qoppiis.”—MAZ. 136:23.
MAZAMURE 33 Ne Toohuwaa Yihoowan Wotta
HA XINAATIYANa
1-2. Yihoowa asaappe dariya baggaa aybi gakkii, qassi hegee eta bolli ay kaalettana danddayii?
KAALLIDI odettiya heezzu hanotata qoppa: Issi yelaga ishawu A wolqqay ixxi ixxi baanaadan oottiya wolqqaama harggee A oyqqidoogaa dottoree odiis. Oosuwawu gooba gidida, layttay 50ppe dariyo ishay ba oosuwaappe yedetettiis; qassi I ooso demmanawu keehi baaxetikkonne, hara ooso demmibeenna. Ammanettada oottiya issi cima michchiyaa A kase Yihoowawu oottiyoogaa keenaa oottana danddayukku.
2 Qommoora odettidaagaa mala issibay nena gakkiyaakko, taani pattikke gaada neeni qoppana danddayaasa. He hanotati neeni ufayttennaadan, neeni nena karanaadaaninne haratuura deꞌiya ne dabbotay moorettanaadan oottana danddayoosona.
3. Seexaanaynne asaa deꞌuwaa xeelliyaagan A qofaa kaalliyaageeti ay oottiyoonaa?
3 Ha alamee deꞌuwaa Seexaanaagaadan xeellees. Asay bana pattennabadan xeellanaadan Seexaanay ubbatoo koyees. Xoossaayyo azazettennan ixxiyoogee hayqqanaadan oottiyoogaa Seexaanay erikkonne, Hewaana Xoossawu azazettennan ixxikko, laꞌa gidana giidi I Hewaaniyyo iitabaa odiis. Seexaanay ha alamiyaa zalꞌꞌiyaa, polotikaanne haymaanootiyaa ubbatoo kaalettees. Yaatiyo gishshawu, daro zalꞌꞌanchchati, polotikaa asatinne haymaanootiyaa kaalettiyaageeti Seexaanaagaadan asaa deꞌuwaa bonchchennaagaa bessiyaabaa oottiyoogee garamissenna.
4. Ha huuphe yohuwan nuuni ay tamaaranee?
4 Qassi, Yihooway nuuni nubaa loꞌꞌobaa qoppanaadan koyees; nuuni nuna pattennabadan xeellanaadan oottiya hanotay merettiyo wode, I nuna maaddees. (Maz. 136:23; Roo. 12:3) Kaallidi deꞌiya hanotatun Yihooway nuna waati maaddiyaakko ha huuphe yohoy qonccissana: (1) Nuuni harggidi waayettiyo wode, (2) gidiya miishshaa demmanawu metootiyo wode, qassi (3) cimatettaa gaasuwan nuuni kaseegaadan Yihoowawu pattiyaaba aybanne oottokko giidi qoppiyo wode. SHin, koyro, nuna ubbaa Yihooway xoqqu ootti xeelliyoogaa nuuni ammanettana danddayiyoy aybissakko tamaarana.
YIHOOWAY NUNA XOQQU OOTTIDI XEELLEES
5. Yihooway asaa xoqqu ootti xeelliyoogaa bessiyaabay aybee?
5 Nuuni biittaa baanaappe merettikkonne, baanaappe keehi alꞌꞌo. (Doo. 2:7) Yihooway nuna xoqqu ootti xeelliyoy aybissakko amaridabaa ane beꞌoos. I baagaa mala eeshshati deꞌanaadan oottidi asaa medhdhiis. (Doo. 1:27) Yaatiyoogan, I saꞌan medhdhido aybippenne asay aadhdhanaadan oottiis; qassi nuuni saꞌaanne mehiyaa doꞌaa haaranaadankka oottiis.—Maz. 8:4-8.
6. Yihooway nagaranchcha asaa xoqqu ootti xeelliyoogaa bessiya harabay aybee?
6 Addaame nagaraa ootti simminkka, Yihooway asaa xoqqu ootti xeelliyoogaa aggibeenna. I nuna keehi xoqqu oottidi xeelliyo gishshawu ba siiqiyo Naꞌaa Yesuusa nu nagarawu wozo oottidi immiis. (1 Yoh. 4:9, 10) Addaame nagaraa gaasuwan hayqqida ‘worddotakka xillotakka hayquwaappe’ denttanawu Yihooway wozuwaa yarshshuwaa goꞌettana. (Oos. 24:15) Nuuni hargganchcha, hiyyeesa, woy layttan cima gidikkonne, Yihoowayyo alꞌꞌo gidiyoogaa A Qaalay qonccissees.—Oos. 10:34, 35.
7. Xoossaa ashkkarata Yihooway xoqqu ootti xeelliyoogaa eti ammananaadan oottiya hara gaasoy aybee?
7 Yihooway nuna xoqqu ootti xeelliyoogaa nuuni ammananaadan oottiya hara gaasoykka deꞌees. I nuna baakko ehees; qassi nuuni mishiraachchuwawu immiyo zaaruwaa akeekees. (Yoh. 6:44) Nuuni Yihoowakko shiiqiyo wode, I nuukko shiiqees. (Yaaq. 4:8) Yihooway nuuni ayyo alꞌꞌo gidiyoogaa bessanawu, nuna tamaarissanawu wodiyaa bazzeesinne baaxetees. I nuuni haꞌꞌi ay mala asakko, qassi sinttappe ay mala asa gidanaakko erees. I nuna siiqiyo gishshawu seerees. (Lee. 3:11, 12) Hagee Yihooway nuna xoqqu ootti xeelliyoogaa loyttidi bessiyaaba!
8. Mazamure 18:27-29n deꞌiya qofay nu metuwaabaa nuuni qoppiyo ogiyaara gayttidaagan waati maaddii?
8 Amarida asati Kawuwaa Daawita pattenna asadan xeellidosona; shin I Yihooway bana siiqiyoogaanne maaddiyoogaa erees. Daawiti hegaa eridoogee, I ba hanotaa maara qoppidi genccanaadan A maaddiis. (2 Sam. 16:5-7) Nuuni unꞌꞌettiyo wode woy nuna metoy gakkiyo wode, Yihooway nuuni issibaa dumma ginan xeellanaadan maaddana danddayees; qassi nuuni ayba metonne xoonanaadan I maaddan danddayees. (Mazamure 18:27-29 nabbaba.) Yihooway nuna maaddiyo gishshawu, nuuni ayyo ufayssan haggaazennaadan nuna aybinne teqqana danddayenna. (Roo. 8:31) Yihooway nuna siiqiyoogaanne xoqqu ootti xeelliyoogaa nuuni hassayana koshshiyo heezzu hanotata ane haꞌꞌi beꞌoos.
NUUNI HARGGIDI WAAYETTIYO WODE
Geeshsha ayyaanay denttettin xaafettida Yihoowa qaalaa nabbabiyoogee harggiyaa gaasuwan nuuni qoppiyo ufayssennabaa genccanaadan maaddana (Mentto 9-12 xeella)
9. Nuuni nu hanotaa xeelliyo ogiyaa harggee waati laammana danddayii?
9 Harggee nuuni qofan qohettanaadaaninne aynne maaddennabadan qoppanaadan oottana danddayees. Nuuni harggiyo wode woy harata maaduwaa oychchiyo wode darotoo azzanoos. Nuuni harggiyoogaa harati erenna wodekka, kase oottiyoobaa oottana danddayenna gishshawu yeellatana danddayoos. Unꞌꞌettanaadan oottiya hegaa mala wodiyan, Yihooway nuna minttettees. Waatidi?
10. Leemiso 12:25y yootiyoogaadan, nuuni harggiyo wode nuna aybi maaddana danddayii?
10 Nuuni harggiyo wode, “shonggaara de7iya haasayai” nuna minttettana danddayees. (Leemiso 12:25 nabbaba.) Nuuni harggiyo wodekka, Yihoowayyo alꞌꞌo gidiyoogaa hassayanaadan oottiya daro loꞌꞌobaa Geeshsha Maxaafan I nuussi yootiis. (Maz. 31:19; 41:3) Ayyaanay denttettin xaafettida he qaalata nuuni zaaretti zaarettidi nabbabikko, nu harggiyaa gaasuwan nuna unꞌꞌissiyaabaa nuuni genccanaadan Yihooway nuna maaddana.
11. Issi ishay Yihoowa maaduwaa waati demmidee?
11 Jorjja gakkidabaa qoppa. Jorjji yelagatettan deꞌiyo wode eesuwan goobi goobi biya harggee A oyqqiis, hegee I bana pattennabadan qoppanaadan oottiis. Jorjji hagaadan giis: “Ta harggee kaalettidobaa gaasuwan asay tana xeelliyo hanotawu asatettaaninne qofan taayyo siyettiyaabawu woy tana yeellayiyaabawu taani giigettabeykke. Ta harggee yaa iitiyo wode, ta deꞌoy keehi laamettanaagaa qoppaas. Taani keehi azzanada Yihooway tana maaddanaadan mintta woossaas.” Yihooway tana waati maaddidee? “Taani nabbabiyooban xeelaa wottanawu metootiyo gishshawu, Yihooway ba ashkkaratuyyo qoppiyoogaa bessiya Mazamure maxaafaappe amarida xiqiseta nabbabayiis. Taani he amarida xiqiseta ubba galla zaaretta zaarettada nabbabayiis, qassi etan taani minettaas. Guyyeppe, taani kaseegaappe aaruwan moocu giyoogaa hara asay akeekiis. Qassi taani ufayttiyoogee eta minttettidoogaa eti yootidosona. Yihooway ta woosaa zaaridoogaa taani akeekaas! I taani tana xeelliyo hanotaa laammanaadan maaddiis. Taani harggiyo wodekka, I tana waati xeelliyaakko yootiya A Qaalan xeelaa wottiyoogaa taani doommaas.”
12. Neeni harggiyo wode, Yihooway nena maaddanaadan ay oottana danddayay?
12 Neeni harggiyo wode, nena gakkiyaabaa Yihooway eriyoogaa ammanetta. Nena aybi gakkiiddi deꞌiyaakko neeni maara akeekanaadan I maaddana mala woossa. Yaatada Yihooway neeyyo yootiyo minttettiyaabaa Geeshsha Maxaafaappe koya. Yihooway ba ashkkarata keehi xoqqu oottidi xeelliyoogaa bessiya paydota pilgga. Neeni yaatiyo wode, Yihooway ammanettidi baayyo oottiya ubbawu keha gidiyoogaa akeekana.—Maz. 84:11.
GIDIYA MIISHSHAA DEMMANAWU METOOTIYO WODE
Nuuni ooso demmanawu metootiyo wode, Yihooway nuussi immanawu qaalaa gelidobaa hassayiyoogee nuna maaddana (Mentto 13-15 xeella)
13. So asawu huuphe gidiya uri ooso xayikko, awu aybi siyettana danddayii?
13 So asawu huuphe gidiya ubbay ba soo asawu koshshiyaabaa kunttanawu koyees. SHin, issi ishay ayba balanne oottana xayikkonne, ba oosuwaappe yedetettana danddayees. I hara ooso demmanawu loytti baaxetees, shin demmibeenna. Hegaa malabay A gakkido gishshawu, I pattennabadan bana xeellana danddayees. Yihooway qaalaa gelidoban xeelaa wottiyoogee A waati maaddana danddayii?
14. Yihooway ba gelido qaalaa naagiyoy aybissee?
14 Ba gelido qaalaa Yihooway ubbatoo naagees. (Yaas. 21:45; 23:14) I hegaa oottanaadan oottiya daro gaasoy deꞌees. Issi gaasoy hegee A sunttaa woy A bonchchuwaa bochchiyo gishshataassa. Yihooway ammanettida ba ashkkarata naaganawu qaalaa geliis, qassi he qaalaa polana bessiyaagee A. (Maz. 31:1-3) Hegaa bollikka, Yihooway ba soo asaa yame gididaageetuyyo koshshiyaabaa kunttana xayikko, nuuni azzananaagaanne hidootaa qanxxanaagaa I erees. Nuussi asatettaaninne ayyaanaaban koshshiyaabaa immanawu I qaalaa geliis, qassi he qaalaa polennaadan aybinne A diggenna!—Maa. 6:30-33; 24:45.
15. (a) Koyro xeetu layttan deꞌiya Kiristtaaneta gakkida metoy aybee? (b) Mazamure 37:18, 19y nu ay ammanettanaadan oottii?
15 Yihooway ba gelido qaalaa poliyoy aybissakko nuuni hassayikko, nuussi gidiya miishshaa demmanawu metootiyo wodekka, I nuna maaddanaagaa ammanettana danddayoos. Koyro xeetu layttan deꞌiya Kiristtaaneta gakkidabaa qoppa. Yerusalaamen deꞌiya gubaaꞌiyaa wolqqaamaa yedetay gakkido wode, “Yesuusi kiittidoogeetuppe attin, ammaniyaageeti ubbati . . . laalettidosona.” (Oos. 8:1) Hegee woygiyoogaakko qoppa. Gidiya miishshaa demmanawu metootiyoogaa! Kiristtaaneti bantta keettaanne oosuwaa woy bantta zalꞌꞌiyaa xayennan waayi aggana. Yaatikkonne, Yihooway eta aggibeenna; eti bantta ufayssaa xayibookkona. (Oos. 8:4; Ibr. 13:5, 6; Yaaq. 1:2, 3) Yihooway ammanettida he Kiristtaaneta maaddiis; qassi I nunakka maaddana.—Mazamure 37:18, 19 nabbaba.
CIMATETTAA GAASUWAN GAKKIYA METUWAA GENCCIYO WODE
Cimido wodekka nuuni oottana danddayiyooban xeelaa wottiyoogee, Yihooway nunanne nuuni ammanettidi oottiyoobaa xoqqu oottidi xeelliyoogaa ammanettanaadan oottees (Mentto 16-18 xeella)
16. Yihooway nu goynuwaa xoqqu oottidi xeelliishsha giidi nuuni qoppanaadan oottana danddayiya hanotay aybee?
16 Nuuni cimiyo wode, Yihoowayyo immana danddayiyoobay guutta giidi qoppiyoogaa doommana danddayoos. Kawuwaa Daawiti cimido wode hegaadan qoppidi hirggennan waayi aggana. (Maz. 71:9) Yihooway nuna waati maaddana danddayii?
17. Jeero giyo michchee hanotaappe nuuni ay tamaarana danddayiyoo?
17 Jeero giyo michchee hanotaa qoppa. Yihoowa oosuwawu goꞌettiyo keettata waatidi loytti giigissanaakko SHiiquwaa Addaraashan tamaaranaadan A shoobettaasu; shin A baanawu koyabeykku. A hagaadan gaasu: “Taani cima, amꞌꞌe, qassi ha giigissiyo oosuwaa waati maaddanaakko aybanne erikke. Taani pattenna asa.” A loohanawu baanaappe kase qammi, ba wozanan deꞌiyaabaa woosan Yihoowau yootaasu. A wonttetta gallassi SHiiquwaa Addaraashaa gakkido wode, taani hagawu yaana bessii gaada qoppaasu. Loohiyo wode, tamaarissiyaageetuppe issoy intteyyo deꞌiya era ubbaappe aadhdhiyaabay Yihoowappe tamaaranawu eeno giyoogaa gidiyoogaa yootiis. Jeera hagaadan gaasu: “Taassi ‘he eray deꞌees gaada taani qoppaas!’ Yihooway ta woosaa zaaridoogaa taani akeekada yeekkiyoogaa doommaas. I taani oottana bessiya gitabay deꞌiyoogaa ammanettanaadan oottiis; qassi maaddiya oosuwaa taani oottanaadan tana tamaarissanawu I eeno giis!” Kasebaa hassayada Jeera hagaadan gaasu: “Taani tamaaranawu biyo wode, hirggaas, hidootaa qanxxaasinne tana pattennabadan xeellaas. Gidoppe attin, taani yaappe kiyiyo wode, tanan ammanettaas, minettaasinne, taani maaddiyaabadan tawu siyettiis!”
18. Nuuni cimiyo wodekka Yihooway nu goynuwaa xoqqu ootti xeelliyoogaa aggennaagaa Geeshsha Maxaafay waati bessii?
18 Nuuni cimiyo wodekka Yihoowawu oottana danddayiyo oosoy deꞌiyoogaa ammanettana danddayoos. (Maz. 92:12-15) Nuuni oottiyoobay pattennaba nuussi milatiyo wodekka, Yihoowa haggaazuwan oottiyo aybakka I xoqqu ootti xeelliyoogaa Yesuusi tamaarissiis. (Luq. 21:2-4) Hegaa gishshawu, neeni oottana danddayiyooban xeelaa wotta. Leemisuwawu, Yihoowabaa yootana, ne ishanttussi woossana, qassi ammanettidi deꞌanaadan harata minttettana danddayaasa. Yihooway neeni aara issippe oottanaadan koyiyoy, neeni oottiyoobaa danddayiyo gishshataassa gidennan, neeni eeno gaada ayyo azazettiyo gishshataassa.—1 Qor. 3:5-9.
19. Roome 8:38, 39y nu ay ammanettanaadan oottii?
19 Baayyo oottiyaageeta wozanappe nashshiya Xoossaa Yihoowawu nuuni goynniyoogee keehi bessiyaaba! Nuuni A sheniyaa polanaadan I nuna medhdhiis; qassi tumu goynoy nuuni nu deꞌuwan ufayttanaadan oottees. (Ajj. 4:11) Ha alamee nuna pattennabadan xeellikkonne, Yihooway nuna hegaadan xeellenna. (Ibr. 11:16, 38) Harggee, gidiya miishshaa demmanawu metootiyoogee woy cimatettay nuuni hidootaa qanxxanaadan oottiyo wode, saluwan deꞌiya nu Aawaa siiquwaappe nuna aybinne shaakkana danddayennaagaa hassayoos.—Roome 8:38, 39 nabbaba.
a Taani pattikke gaada neeni qoppanaadan oottiyaabay nena gakki erii? Yihooway nena ay keena xoqqu ootti xeelliyaakko ha huuphe yohoy nena hassayissana. Deꞌuwan nena aybi gakkikkonne, nebaa neeni loꞌꞌobaa waata qoppana danddayiyaakko ha huuphe yohoy qonccissees.
MAZAMURE 30 Ta Aawaa, Ta Xoossaanne Ta Miyyiyaa