Neeni Wolqqaama Harggiyaa Harggiyo Wode

“Tana goofiniyaanne maracciyaa kansseriyaa harggee oyqqidoogaa erido wode, taani hayqqays gaada qoppaas. Gidoppe attin, dottoriyaa matappe soo simmada, ‘Hekko taani qoppidoogaa mala gidenna; shin, hagaa gencciyo oge taani demmana koshshees’ gaada qoppaas.”—Lindo layttay 71.

“Ta haddirssa bagga qinxxalliyaa narbbiyaa keehi qohiya wolqqaama sahoy tana sakkees. Issitoo, wolqqaama sahoy taani unꞌꞌettanaadan oottiis. Darotoo, taani boorasays; ubba qassi tana tarkka woranawu qoppaas.”—Eliso, layttay 49.

Sahettido gishshawu sugiyo gaariyan biya bitaniyaa matan A siiqiyaageeti deꞌoosona

WORANA danddayiya sahoy nena woy ne siiqiyo ura sakkikko, hegee ay keena unꞌꞌissana danddayiyaakko neeni eraasa. Sakkiyoogaa bolli, eesuwan yiillotiyoogaa woy hirggiyoogaa neeni danddayana koshshees. Akkamettiyo keeruwan unꞌꞌettiyoogee, xale demmanawu woy shammanawu metootiyoogee, woy xalee gattiyo qohuwaa yayyiyoogee keehi hirggissananne yashshana danddayees. Wolqqaama sahuwaara gayttidaagan qofan paxa kaaꞌettiyoogee qohiyaaba gidana danddayees.

Nuuni maaduwaa awappe demmana danddayiyoo? Xoossaakko woossiyoogaaninne Geeshsha Maxaafaappe minttettiya qofaa nabbabiyoogan daroti keehi minettidosona. Qassi so asaynne laggeti immiyo maadoynne eta siiqoy maaddana danddayees.

ISSOTI ISSOTI WAANI GENCCIDONAA?

Layttay 58 gidido Roberti hagaadan giis: “Xoossan ammanetta, qassi neeni sahuwaa genccanaadan I nena maaddana. Yihoowa woossa. Neeyyo siyettiyaabaa ayyo yoota. Geeshsha ayyaanaa immanaadan A oychcha. Neeni loꞌꞌobaa qoppanaadaaninne ne soo asaa minttettanaadan, qassi sahuwaa genccada woppu gaada deꞌanaadan maaddana mala A oychcha.

Ne soo asay nena qofan maaddiyoogee keehi goꞌꞌiyaaba. ‘Payyatettay ay malee?’ giidi oychchanawu galla galla issi woy naaꞌꞌu asi taassi dawalees. Dumma dumma sohuwan deꞌiya laggeti tana minttettoosona. Eti taani woppu gaanaadan oottoosona; qassi hegee taani hidootaa qanxxennaadan maaddiis.”

Neeni sahettida ne laggiyaa oychchiyo wode, Linda giidobaa akeeka: “Sahettida uri danddayettida keenan payya asadan deꞌanawu koyiyoogeenne ubbatoo sahuwaabaa haasayanawu koyennan aggana danddayiyoogee qoncce. Yaatiyo gishshawu, haroodeegaadan haasaya.”

Xoossay minotettaa immin, Geeshsha Maxaafay minttettin, qassi siiqiya so asaynne laggeti maaddin, nuuni wolqqaama harggiyan gencciyo wodekka, deꞌuwan deꞌiyoogee goꞌꞌiyaaba gidiyoogaa ammanettana danddayoos.

Maaddana Danddayiya Geeshsha Maxaafaa Xiqiseta

Xoossan ammanetta.

“Taani GODAA koyaas; koyin i taayyo zaariis; taani yayyiyoobaa ubbaappe tana i ashshiis. Ha hiyyeesa bitanee waassiis; waassin GODAI a waasuwaa siyiis.”—Mazamure 34:4, 6.

Qommoora denttido Linda hagaadan gaasu: “Taani, ‘Tawu kehissa’ gaada mule woossa erikke. Taani ubbatoo, ‘Taani minnanaadan maadda. Qassi ta sahuwaa danddayanaadan maadda’ gaada woossays.”

Minnanawu Xoossaa Qaalaa nabbaba.

“[Yan] de7iya ooninne, ‘Taani harggais’ yaagenna.”—Isiyaasa 33:24.

Xoossay immanawu qaalaa gelidobaa wotta denttada qoppa. Hegee genccanaadan maaddiya minotettaa neeyyo immana.

So asaanne laggeta maaduwaa oychcha.

“Laggee mule wodekka siiqees; ishaikka metuwaa wode maaddanaassi yelettees.”—Leemiso 17:17.

Qommoora ibaa denttido Elisa, “Asaappe shaahettooppa” yaagaasu. Gujjadakka hagaadan gaasu: “Ne laggeti maaddanaadan eeno ga. Neeni boorasiyoonne Xoossaykka ne woosaa siyennabadan qoppiyo wodee daana danddayikkonne, asaappe shaahettoppa.”