Eray?

Beni Israaꞌeelati cilooshaa immiyoy aybissee?

BENI wode, aqo oyqqiya uri naꞌentta soo asawu cilooshaa immees. He cilooshay alꞌꞌoba, mehiyaa woy miishshaa gidana danddayees. Yaaqoobi Raahelo ekkanawu I aawayyo laappun layttaa oottanaassi eeno giidoogaadan, cilooshay issi issitoo oosuwaa oottiyoogankka imettana danddayees. (Doo. 29:17, 18, 20) Cilooshay imettiyoy aybissee?

Kaarol Meyereso giyo Geeshsha Maxaafaa eranchchiya hagaadan gaasu: “Keehi koshshiyaabaa oottiya [goshshanchcha] soo asaa yara gidida naꞌiyaa, bantta soo asawu oottiyoogaa aggiyo gishshawu, eta soo asawu cilooshay imettees.” He cilooshay naꞌantta soo asaynne naꞌentta soo asay dabbotido dabbotay minnanaadankka oottana danddayees. He so asaa yarati meto wodiyan issoy issuwaa maaddana danddayoosona. Hegaa bollikka, cilooshay naꞌiyaa gelana haniyoogaanne ba aawaa kushiyaappenne naaguwaappe ba azinaakko baana haniyoogaa bessiyaaba.

Cilooshaa immiyoogee machchiyaa bayzzettiyaabaa woy shammettiyaabaa giyoogaa gidenna. Enshiyent Izirayel—Its Layf End Inisttitiwushinis giyo maxaafay hagaadan gees: “Miishshaa woy harabaa naꞌentta soo asawu immiyoogee Israaꞌeelatu aqo deꞌoy shammiyoobaa milatanaadan oottees. SHin [cilooshay] naꞌentta soo asawu imettiya miishshaappe attin, naꞌiyo shammanawu imettiya miishsha gidenna.”

Ha wodiyan, issi issi biittatun, cilooshaa immiyoogee haꞌꞌikka meeze gididaba. Kiristtaane aawaynne aayyiyaa cilooshaa oychchiyo wode, eti bessiyaagaappe aaruwaa oychchiyaageeta gidennan, “asay ubbay eti bessiyaabaa qoppiyoogaa” eranaadan oottiyaageeta gidana koshshees. (Pili. 4:5, NW; 1 Qor. 10:32, 33) Yaatiyoogan, eti “miishshaa siiqiyaageeta,” woy yaaretiyaageeta gidennaagaa bessoosona. (2 Xim. 3:2) Hegaa bollikka, Kiristtaane aawaynne aayyiyaa cilooshaa bessiyaagaappe daruwaa oychchennan aggikko, sinttappe naꞌee azina gidana bitanee cilooshaa miishshaa shiishshana gakkanaashin bullachcha gallassaa sinttawu sugenna. Woy I immanaadan oyshettido daro cilooshawu gidiya miishshaa demmanawu aqinye gididi haggaaziyoogaa aggidi kumetta gallassaa oosuwaa oottana koshshiyaabadan qoppenna.

Alamiyan issi issi biittatun, cilooshaara gayttidaagan kaalliyo higgee deꞌees. Intte biittankka hegaadaana gidikko, yelida Kiristtaaneti he higgiyaa kaalloosona. Aybissi? Kiristtaaneti ‘deriyaa heemmiyaageetuyyo haarettanaadaaninne’ Xoossaa higgiyaara phalqqettana xayikko, higgiyawu azazettanaadan Xoossaa Qaalay yootiyo gishshataassa.—Roo. 13:1; Oos. 5:29.