Nabbabiyaageetu Oyshaa

Issi Kiristtaanee Geeshsha Maxaafaa maaraa kanttidi ba machchiyo yeddidi haranniyo ekkikko, gubaaꞌee koyro aqo deꞌuwaanne ooratta aqo deꞌuwaa waati xeellii?

Hegaa mala hanotan, issi uri hara machchiyo ekkidi he ooratta aqo deꞌoy higgiyan erettidabadan qoppikko, gubaaꞌee koyro aqo deꞌoy attidabadan xeellees. Hegaadan kuuyiyo gaasuwaa akeekanawu, machcho yeddidi haranniyo ekkiyoogaa xeelliyaagan Yesuusi yootidobaa ane beꞌoos.

Maatiyoosa 19:9n odettidaagaadan, machcho yeddana danddayiyo mexi issi gaasuwaa Yesuusi odiis. I hagaadan giis: “Ba machchiyo shaaramuxennan de7ishin yeddidi, haranno ekkiya ooninne shaaramuxees.” Yesuusi yootidobaappe nuuni (1) machcho yeddanaadan Geeshsha Maxaafay yootiyo mexi issi gaasoy shaaramuxiyoogaa gidiyoogaa, qassi (2) Geeshsha Maxaafay yootiyo he maaraappe kareera machcho yeddidi haranno ekkiya uri wodiraa laammiyoogaa akeekoos.a

Yesuusi issi uri shaaramuxidi ba machchiyo yeddikko, haranniyo ekkanawu Geeshsha Maxaafaa maaran danddayees gaanawu koyidee? Hegaadan gidennan aggana danddayees. Azinay shaaramuxikko, naaqettida machchiyaa awu atto gaanawu woy agganawu kuuyawusu. Machchiyaa atto geennan ixxada, paraman shaahettanawu kuuyikko, qassi hegee higgiyan kuuyettikko, eti naaꞌꞌaykka haraa ekkanawu woy gelanawu danddayoosona.

SHin naaqettida machchiyaa ba aqo deꞌoy laalettennaadan wozanappe koyada, atto gaanawu koyiyoogaa ba azinawu yootana danddayawusu. SHin shaaramuxida azinay machchiyaa atto gaanawu koyiyoogaa odishin ixxidi, higgiyan shaahettikko shin? Machchiyaa awu atto gaanawunne eta aqo deꞌoy laalettennaadan koyiyo gishshawu, Geeshsha Maxaafaa maaran I haranniyo ekkanawu danddayenna. I ixxis giidi, Geeshsha Maxaafaa maaraa kanttidi haranniyo ekkikko, haranttuwaa shaaramuxees; qassi hegee gubaaꞌe cimati zaarettidi pirdda konttiyan xeelliyo allaalle.—1 Qor. 5:1, 2; 6:9, 10.

Issi uri Geeshsha Maxaafaa maaraa kanttidi hara maccaasaa ekkikko, gubaaꞌee koyro aqo deꞌuwaanne ooratta aqo deꞌuwaa waati xeellii? Geeshsha Maxaafaa maaran koyro aqo deꞌoy haꞌꞌikka deꞌees gaana danddayettii? Naaqettida aqo laggiyaa awu haꞌꞌi atto gaanawu woy agganawu danddayay? Ooratta aqo deꞌoy shin shaaramuxa aqo deꞌodan xeelettii?

Kase, naaqettida aqo laggiyaa paxa deꞌiyaaba, azina gelabeennabanne wodiraa laammibeennaba gidikko, ooratta aqo deꞌuwaa shaaramuxa aqo deꞌodan xeelloos. Gidoppe attin, machcho yeddidi haranniyo ekkiyoogaabaa yootido wode Yesuusi naaqettida aqo laggiyaabaa denttidobi baawa. SHin, I Geeshsha Maxaafaa maaraappe kareera machchiyo yeddidi haranniyo ekkiyaagee shaaramuxiyoogaa yootiis. Hegaa mala hanotan, machchiyo yeddidi haranniyo ekkiya uraa hanotay wodiraa laammiyoogaa gidiyoogaanne hegan koyro aqo deꞌoy attiyoogaa Yesuusi yootiis.

Issi uri machchiyo yeddidi haranniyo ekkin aqo deꞌoy laalettikko, naaqettida aqo laggiyaa ba koyro azinawu atto gaanawu woy agganawu danddayukku. Yaatiyo gishshawu, A ba koyro azinawu atto gaanawu woy agganawu koshshiya koshshennaakko qoppaydda ba wodiyaa wurssana koshshenna. Qassi naaqettida aqo laggiyaa hayqqin aggin, azina gelin aggin woy shaaramuxin aggin, gubaaꞌee ooratta aqo deꞌuwaa xeelliyo ogee laamettanaadan oottenna.b

Qommoora beꞌido leemisuwan, azinay shaaramuxiyoogee eti paraman shaahettanaadan oottees. Azinay shaaramuxennan deꞌiiddi, paraman shaahettidi hara maccaasaa ekkikko shin? Woy azinay shaaramuxennan deꞌiiddi, paraman shaahetti simmidi shaaramuxikkonne machchiyaa atto gaanawu koyishin hara maccaasaa ekkikko shin? Ha ubba hanotankka, paraman shaahettidi hara maccaasaa ekkikko, hegee wodiraa laammiyoogaa gidiyo gishshawu, koyro aqo deꞌoy attees. Qassi ooratta aqo deꞌoy higgiyan erettidaagaa gidees. Hidaare 15, 1979, Inggilizetto Wochchiyo Keelan, sinttaa 32n odettidaagaadan, “he izaawu haꞌꞌi haranno ekkido gishshawu, O aggidi ba koyro machcheekko simmana danddayenna; I shaaramuxidi hara maccaasaa ekkido gishshawunne paraman shaahettido gishshawu koyro aqo deꞌoy attiichchiis.”

Haꞌꞌi akeekido ha ooratta qofay, aqo deꞌuwaa geeshshatettaa woy shaaramuxiyoogee deexo nagara gidiyoogaa laafettidi xeellanaadan oottenna. Geeshsha Maxaafaa maaraa kanttidi ba machchiyo yeddi simmidi, Geeshsha Maxaafaa maaran laꞌa gidennan deꞌiiddi, hara maccaasaa ekkiya uraa hanotay wodiraa laammiyoogaa gidiyo gishshawu, cimati pirdda konttee eqqanaadan oottana koshshees. (Ooratta machchiyaa Kiristtaane gidikko, akka shaaramuxido gishshawu, ibaakka pirdda konttee xeellees.) Ooratta aqo deꞌoy wodiraa laammidobadan xeelettana xaykkonne, kase he izaawu oottido iitabaa gaasuwan hara asay yiillotiyoogaa woy he izaawaa toochchiyoogaa agganaashin daro layttawu gubaaꞌiyan dumma maatan I oottana danddayenna. Qassi I ammanettennan aggidoogaa gaasuwan qohettida koyro machchiyaa haꞌꞌi deꞌiyo hanotaanne I aggidi biido guutta naatu hanotaakka gubaaꞌe cimati qoppana bessees.—Mil. 2:14-16.

Geeshsha Maxaafaa maaraa kanttidi machchiyo yeddidi haranniyo ekkiyoogee gattiyo daafaa akeekidi, Kiristtaaneti aqo deꞌuwaa geeshsha oottidi xeelliyoogan Yihoowa leemisuwaa kaalloosona.—Era. 5:4, 5; Ibr. 13:4.