‘Saꞌaa Laattanawu’ Giigettadii?
“ASHKKETI anjjettidaageeta; aissi giikko, eti sa7aa laattana” giidi Yesuusi yootidoogee polettiyo wodiyaa nuuni ubbay yeemuwan naagoos. (Maa. 5:5) Tiyettidaageeti kawo gidiyo wodenne Yesuusaara saluwan haariyo wode eti saꞌaa laattana. (Ajj. 5:10; 20:6) Ha wodiyan deꞌiya daro Kiristtaaneti saꞌaa laattanawunne wottiyoobi baynna hanotan sarotettaaninne ufayssan merinawu deꞌanawu yeemuwan naagoosona. Hegaadan deꞌanawu eti oottana bessiya keehi koshshiya oosoy deꞌees. Leemisuwawu, eti saꞌay gannate gidanaadan oottiyoogan maaddana, hayquwaappe denddiyaageetussi koshshiyaabaa kunttananne eta tamaarissana. Qassi neeni hegeeta oottanawu keehi koyiyoogaa haꞌꞌi waata bessana danddayiyaakko akeeka.
SAꞌAA GANNATE OOTTANAWU GIIGETTADII?
Yihooway asaa “ha sa7aa kumitenne haarite” giidi azazido wode, kumetta saꞌay loddan loddan gannate gidanaagaa yootiiddi deꞌees. (Doo. 1:28) Gannatiyan merinawu deꞌanaageeti hegawu azazettana koshshees. Edene gannatee xayido gishshawu saꞌay gannate gidenna. Armmageedoona olaappe simmin sohuwaara saꞌan keehi moorettidabata geeshshiyo daro oosuwaa nuuni oottana. Ee hegee keehi daro ooso!
Israaꞌeelati Baabilooneppe simmido wode oottidobaa hegee nuna hassayissees. Eta biittan 70 layttawu ooninne deꞌibeenna. SHin eti he biittaa keehi loꞌꞌiya soho oottanaagaa Isiyaasi kasetidi yootiis. Hiraagay hagaadan gees: “I bazzuwaa Edene Gannatiyaadan, i mela sohotakka GODAA ataakilttiyaa sohuwaadan oottana.” (Isi. 51:3) Israaꞌeelatussi ubbabay ushachchiis. Hegaadankka, saꞌaa laattanaageeti Yihooway maaddin saꞌaa keehi loꞌꞌiya gannate oottana. Qassi neeni he oosuwaa oottanawu koyiyoogaa bessanawu haꞌꞌi oottana danddayiyoobati deꞌoosona.
Issi ogee ne keettay geeshshanne giiga gidanaadan neeyyo danddayettida ubbabaa oottiyoogaa. Ne shooroti geeshshennaba gidikkonne neeni yaatana danddayaasa. Qassi intte SHiiquwaa Addaraashaanne Gita SHiiquwaa Addaraashaa geeshshiyoogaaninne bottokoniyoogan maaddana danddayaasa. Danddayettiyaaba gidikko, intte heeran daafaban qohettidaageeta ne dosan maaddanawu oychchanakka danddayaasa. Hegee maadoy koshshiyoosi deꞌikko, ne ishanttanne michchontta neeni maaddanawu koyiyoogaa bessees. Nena hagaadan oychcha: ‘Taani saꞌan merinawu deꞌanaadan Yihooway paqqadikko, he wode goꞌettana amarida hiillata tamaarana danddayiyaanaa?’
HAYQUWAAPPE DENDDIYAAGEETUSSI KOSHSHIYAABAA KUNTTANAWU GIIGETTADII?
Yesuusi Yaaꞌiroosa naꞌiyo hayquwaappe dentti simmidi, sohuwaara iyyo qumaa immanaadan yootiis. (Mar. 5:42, 43) Ha 12 laytta naꞌeessi qumaa immiyoogee metiyaaba gidennan aggana danddayees. SHin Yesuusi “duufuwan de7iyaageeti a cenggurssaa siyiyo wodee” yaana giidi qaalaa gelidoogee polettiyo wode, nuuni darobaa oottana koshshiyoogaa qoppa. (Yoh. 5:28, 29) Geeshsha Maxaafay ubbabaa yootana xayikkonne, hayquwaappe denddiyaageeti qumaa, deꞌiyoosaanne maayuwaa demmanaadan nuuni maaddana koshshiyoogaa qoppana danddayoos. Neeni maaddanawu giiga uttidoogaa ha wodiyan bessana danddayaasa. Neeni oottana danddayiyo amaridabati deꞌoosona.
Neeni saꞌaa laattanawu giigetta uttidoogaa haꞌꞌi waata bessana danddayay?
Woradaa xomoosiya ishay ne gubaaꞌiyaa xomoosanawu yaanaagee erissoy odettikko, qumaa A shoobbana danddayaasa. Beeteelen ubba wode haggaazuwaa haggaaziya ishantti eta oosoy laamettin intte gubaaꞌiyaa yiyo wode woy woradaa xomoosiya ishay yuuyidi xomoosiyo ba oosuwaa essiyo wode eti deꞌiyoosaa demmanaadan maaddana danddayaasa. Ne heeran killiliyaa shiiqoy woy hara gita shiiqoy deꞌikko, shiiquwaappe kase woy shiiquwaappe simmin ne dosan issi issibata oottana, woy harasaappe yiya imattata mokkana danddayaasa.
HAYQUWAAPPE DENDDANAAGEETA TAMAARISSANAWU GIIGA UTTA
Oosuwaa 24:15y yootiyoogaadan, daro biiloone asay hayquwaappe denddana. Etappe daroti hayqqanaappe kase Yihoowa eribookkona. Eti hayquwaappe denddi simmidi abaa tamaariyo injjiyaa demmana.a Meezee deꞌiyo, Xoossawu ammanettidi haggaaziyaageeti eta tamaarissana. (Isi. 11:9) Awurooppan, Tohossa Amarkkaaninne Afirkkan sabbakida, SHarlloota hegaa yeemuwan naagawusu. A ufayttaydda hagaadan gaasu: “Taani hayquwaappe denddiyaageeta tamaarissanawu yeemuwan naagays. Taani beni deꞌida issi uraabaa nabbabiyo wode, darotoo hagaadan qoppays: ‘Ha uri Yihoowa eriyaakko A deꞌoy laamettana danddayiyaaba shin.’ Hayquwaappe denddana asawu Yihoowabaanne eti awu haggaaziyaaba gidikko, eta deꞌoy keehi laamettanaagaa etawu yootanawu yeemuwan naagays.”
Yesuusi saꞌaa yaanaappe kase ammanettidi deꞌida Yihoowa ashkkaratikka darobaa tamaarana. Daaneeli xaafikkonne I akeekibeenna hiraagay polettidoogaa awu qonccissiyoogee, keehi ufayssiyoogaanne gita maata gidiyoogaa qoppa. (Dane. 12:8) Woy Urutanne Naaꞌooma Masee eta zariyaappe yiidoogaa eranaadan maaddiyoogee ay keena ufayssiyaakko qoppa. Ha iita alamiyaagaadan yashissiyaanne diggiya uri baynnasan, kumetta saꞌan nuuni asaa tamaarissiyoogee keehi ufayssiyaaba gidana!
Hayquwaappe denddanaageeta tamaarissanawu giigettidoogaa bessanawu haꞌꞌi ay oottana danddayay? Issi ogee gooba asttamaare gidanawunne ubbatoo sabbakanawu neessi danddayettida ubbabaa oottiyoogaa. (Maa. 24:14) Cimatettaa woy harabaa gaasuwan neeni haꞌꞌi loytta oottana danddayennabaa gidikko, neeni neessi danddayettidabaa oottiyoogan hayquwaappe denddanaageeta tamaarissanawu giiga uttidoogaa bessana danddayaasa.
Ha keehi koshshiya oyshata qoppiyoogee loꞌꞌo; neeni saꞌaa laattanawu tumuppe yeemuwan naagay? Saꞌaa gannate oottanawu, hayquwaappe denddiyaageetussi koshshiyaabaa kunttanawunne eta tamaarissanawu yeemuwan naagay? Neeni saꞌaa laattiyo wode yan oottanabaa ha wodiyan oottiyoogan saꞌan merinawu deꞌanawu giigetta uttidoogaa bessana danddayaasa!
a Masqqala 2022 Wochchiyo Keelan, “Darota Xillotettaa Ogiyan Kaalettiyaageeta” giya huuphe yohuwaa xeella.