The Second Book of Samuel
21 Now, serious hunger come dey for the time of David for three years, so David ask Jehovah, and Jehovah talk say: “Blood dey the head of Saul and im family,* because e kill Gibʹe·on people.” 2 So the king call Gibʹe·on people and follow them talk. (Wetin happen be say, Gibʹe·on people no be Israel people, but na Am′or·ite people wey still remain, and Israel people be don swear give them say them no go kill them. But Saul be want kill all of them because say im body de hot to help Israel and Judah people.) 3 David ask Gibʹe·on people say: “Wetin I go do for una? How I go fit comot this sin, so that una go bless Jehovah people?”* 4 Gibʹe·on people tell-am say: “Silver or gold no go fit pay us for wetin Saul and im family do us, and we no go fit kill any man for Israel.” So e tell them say: “Anything wey una talk, I go do-am for una.” 5 Them come tell the king say: “That man wey be try to kill all of us and plan say e go finish all of us so that we no go live for anywhere for the land of Israel, 6 make them give us seven of im sons. We go hang their dead body* for front of Jehovah, for Gib′e·ah wey Saul, the person wey Jehovah choose be de stay.” Then the king talk say: “I go carry them give una.”
7 But the king show pity for Me·phib′o·sheth, the son of Jon′a·than the son of Saul, because of the special promise wey David and Jonathan the son of Saul promise each other for Jehovah front. 8 So the king take Ar·mo′ni and Me·phib′o·sheth, wey be the two sons of Riz′pah, the daugter of A′iah, wey e born for Saul, and the five sons of Mi′chal* the daughter of Saul wey e born for A′dri·el the son of Bar·zil′lai wey be Me·hoʹlah* person. 9 Then e carry them give Gibʹe·on people, and them hang their dead body ontop the mountain for front of Jehovah. All the seven sons die together. Them kill them for the first days wey harvest start for the time wey them start to harvest barley. 10 Then Riz′pah wey be the daughter of A′iah carry sackcloth and e spread-am ontop the rock from the time wey the harvest start until the time wey rain fall from heaven ontop their dead body. E no allow make the birds wey de fly for up come ontop them for daytime, and e no allow make the bush animals come near them for night.
11 Them come tell David wetin Saul concubine* wey im name na Riz′pah wey be the daughter of A′iah don do. 12 So David go meet the leaders of Ja′besh-gil′e·ad and collect the bones of Saul and the bones of Jon′a·than the son of Saul. This leaders be don hide go carry the bones comot* from the public place wey dey for Beth-shan, the place wey Phi·lisʹti·a people be hang their dead body for the day wey them kill Saul for Gil·bo′a. 13 E carry the bones of Saul and the bones of im son Jon′a·than comot from there, and them still gather the bones of the men wey them kill.* 14 Then, them bury the bones of Saul and Jon′a·than im son for the land of Benjamin for Ze′la, inside the grave of Kish wey be Saul papa. After them don do everything wey the king command them, God hear wetin the people de beg-am to do for the land.
15 War start again between Phi·lisʹti·a people and Israel people, so David and im servants go down to go fight Phi·lisʹti·a people, but David come tire well-well. 16 One man wey come from the tribe of Reph′a·im wey im name na Ish′bi-be′nob get copper spear wey heavy reach 300 shekels,* and e carry one new sword. This man be want kill David. 17 Quick-quick, A·bish′ai wey be the son of Ze·ru′iah come help-am and e chuk the Phi·lisʹti·a man and kill-am. Then the men of David swear and tell-am say: “Make you no ever follow us go fight war again. Make you no quench Israel lamp!”
18 After this one, war start again between Phi·lisʹti·a people and Israel people for the land of Gob. That time, Sib′be·cai wey come from Hu′shah kill Saph, wey come from the family line of Reph′a·im.
19 War come start again between Phi·lisʹti·a people and Israel people for the land of Gob, and El·ha′nan wey be the son of Ja′a·re-or′e·gim wey be Beth′le·hem person kill Go·li′ath wey come from Gath. The wood wey hold im spear thick like the wood wey people wey de weave cloths de use.
20 War come still start again for Gath, and e get one man for there wey big pass normal person size. Na 6 fingers dey each of im hand, and na 6 toes dey each of im leg. Everything na 24. This man too come from the family line of Reph′a·im. 21 E continue to challenge Israel people. So Jon′a·than wey be the son of Shim′e·i wey be David brother, kill-am.
22 This four men come from the family line of Reph′a·im for Gath, and na David and im servants kill them.