Haggai
1 For the second year when King Da·ri′us de rule, for the sixth month, for the first day of that month, Jehovah send prophet Hag′gai* make e go tell Ze·rub′ba·bel the governor of Judah wey be the son of She·al′ti·el, and Joshua the high priest wey be the son of Je·hoz′a·dak say:
2 “Na wetin Jehovah of armies talk be this, ‘This people de talk say, “Time never reach to build the house* of Jehovah.”’”*
3 Jehovah come send prophet Hag′gai again to talk say: 4 “Una think say this na time for una to de live for una house wey una use fine-fine wood build, and my house scatter for ground? 5 Now, na wetin Jehovah of armies talk be this, ‘Make una really think about the things wey una de do. 6 Una don plant plenty seed, but wetin una de harvest small. Una de chop, but una no de belleful. Una de drink, but e no de reach una. Una de wear cloth, but e no de warm una body. The person wey de work de put the money wey them pay-am inside bag wey get plenty hole.’”
7 “Na wetin Jehovah of armies talk be this, ‘Make una really think about the things wey una de do.’
8 “Jehovah talk say, ‘Make una go the mountain go bring wood come. And build my house, so that e go make me happy and I go get praise.’”
9 “Jehovah of armies still talk say, ‘Una be think say wetin una go get go plenty, but na small de reach una hand, and when una bring-am come house, I blow-am troway. Why? Because my house scatter for ground, but each of una de run up and down to take care of im own house. 10 So the heavens no give una dew, and the earth no produce anything for una. 11 And I continue to make the earth and the mountains dry, and this one don affect the grain, the new wine, the oil, plants, people, and animals, and all the work wey una de do.’”
12 Ze·rub′ba·bel wey be the son of She·al′ti·el, and Joshua the high priest wey be the son of Je·hoz′a·dak, and all the other people listen to the voice of Jehovah their God, and to the things wey prophet Hag′gai talk, because na Jehovah their God send-am, and the people start to fear Jehovah.
13 Then Hag′gai, the messenger of Jehovah, tell the people this message as Jehovah don send-am say: “‘I dey with una,’ na wetin Jehovah talk.”
14 So Jehovah touch the heart* of Ze·rub′ba·bel the governor of Judah, wey be the son of She·al′ti·el, and the heart* of Joshua the high priest, wey be the son of Je·hoz′a·dak, and the heart* of all the other people; so them come, and start to build the house of Jehovah of armies, their God. 15 This thing happen for the 24th day, for the sixth month, for the second year when King Da·ri′us de rule.