Esther
4 When Mor′de·cai hear everything wey them don do, e tear im cloths and wear sackcloth and put ashes for body. Then e comot go the middle of the city de cry no be small with loud voice. 2 Na only the king gate e fit waka reach, because nobody fit wear sackcloth enter inside the king gate. 3 And for every area wey the king law and wetin e talk reach, the Jew people wey dey there start to mourn no be small and them de fast, de cry and de shout and many of them lie down with sackcloth and ashes dey their body. 4 When Esther woman servants and im eunuchs* come inside and tell-am, the thing worry Queen Esther no be small. Then e send cloths go give Mor′de·cai say make e wear instead of the sackcloth, but e no gree collect them. 5 So Esther call Ha′thach, wey be one of the king eunuchs,* wey e choose to work for Esther and e command-am say make e go ask Mor′de·cai wetin this thing mean and wetin de happen.
6 So Ha′thach go meet Mor′de·cai for the public place for the city wey dey front of the king gate. 7 Mor′de·cai tell-am everything wey don happen to-am, and the amount of money wey Ha′man don promise say e go put for where them de keep the king money so that them go destroy Jew people. 8 E still give-am one copy of the law wey them write wey them don send go Shu′shan* to destroy them. E tell-am say make e show-am to Esther and explain-am give-am, and make e tell-am say make e go meet the king to beg-am say make e pity them, and make e beg the king face-to-face for im people.
9 Then Ha′thach come back and tell Esther wetin Mor′de·cai don talk. 10 Esther come tell Ha′thach wetin e go tell Mor′de·cai. E say: 11 “All the king servants and the people wey dey for the areas wey the king de rule know say if any man or woman enter the compound of the king wey dey inside-inside when the king no call-am, na only one thing go happen. The law talk say them go kill the person. Na only if the king raise the rod of gold for-am na im them no go kill-am. And the king never call me for 30 days now.”
12 When them tell Mor′de·cai wetin Esther talk, 13 e answer Esther say: “Make you no think say because you be part of the king family your own go better pass all the other Jew people and hand no go touch you. 14 Because if you no do anything now, another person go fit help the Jew people and save them, but you and your papa family* go die. And who know whether na because of this kind time na im make you get this position as queen?”
15 Then Esther tell Mor′de·cai say: 16 “Go gather all the Jew people wey dey Shu′shan* and make una do fasting because of me. Make una no chop or drink for three days, day and night. Me and my woman servants go fast too. I go go meet the king, even though say e dey against the law, and if e be say I go die, make I die.” 17 So Mor′de·cai comot and do everything wey Esther talk say make e do.