LESSON 52
Why Wetin We De Wear and How We Look Dey Important
All of us get wetin we like to wear and how to care for our body. If we follow advice for Bible, we go wear wetin we like and still make Jehovah happy. Make we see some of this advice for Bible.
1. Wetin suppose help us choose wetin we go wear and how we go look?
Make we “de wear better cloth wey de show say [we] no de over-do things and de think well,” and always dey clean so that we go show people say we “de serve God.” (1 Timothy 2:9, 10) See this four advice: (1) De wear “better cloth.” As you don see for meeting, Jehovah Witness de dress for different ways, but their clothes and hairstyle de always show respect for God. (2) To wear cloth “wey de show say [we] no de over-do things” mean say we no go wear cloth wey go make people de think about sex, or cloth wey go make people just de look us. (3) We show say we “de think well” when we no just de follow every new style wey just come out. (4) Make how we de dress always show say we “de serve God” so that people go see say we de worship the true God.”—1 Corinthians 10:31.
2. How wetin we de wear fit affect our brothers and sisters?
Na we de choose wetin we go wear, but e good make we think how the way we dress fit affect people. We de try our best make we no offend anybody, instead, we de “do wetin go make [our] neighbor happy and make the thing be wetin good for the person, so that e go dey strong.”—Read Romans 15:1, 2.
3. How the way we de dress fit help people to learn about Jehovah?
Na true say we de try to dress well all the time, but make we really de dress well when we de preach and go meeting. We no want make people no listen to the good news because of how we dress. Instead, we want make how we de dress make people want learn more about our God and “show say the teaching of our Savior, God, dey good.”—Titus 2:10.
LEARN MORE THINGS
Learn how the way we de dress and how we look fit make people know say we be Christians.
The way we dress fit show whether we respect people for government or we no respect them. Even though say Jehovah de see our heart, make the way we de dress show say we respect Jehovah
4. When we dress well, e go show respect for Jehovah
Wetin be the number one reason why we need to dress well and look fine? Read Psalm 47:2, and talk about this questions:
When we remember say we de represent Jehovah, how this one suppose affect the way we de dress?
You think say e dey important to think about wetin we de wear when we de preach and attend Christian meetings? Why you answer like that?
5. Wetin fit help us decide wetin we go wear and how we look?
Whether we buy our clothes with plenty money, or with small money, make e dey clean and fit the occasion wey we wear-am for. Read 1 Corinthians 10:24 and 1 Timothy 2:9, 10. After, talk about why we no go like wear cloth wey . . .
no dey clean or dress anyhow.
dey tight, de show body or de make people think about sex.
Na true say we no dey under the Law of Moses, but the law fit help us to know how Jehovah de think. Read Deuteronomy 22:5, and talk about this question:
Why e good make we no wear cloth wey de make man look like woman and woman look like man?
Read 1 Corinthians 10:32, 33 and 1 John 2:15, 16, and talk about this questions:
Why e good make we check whether the way we de dress de affect people for congregation or for where we de live?
Which kind style of cloth dey common for your area?
You think say some of this styles fit no good for Christians? Why you answer like that?
We fit dress for different-different way and still make Jehovah happy
SOME PEOPLE DE TALK SAY: “I get right to wear anything wey I want.”
You agree? Why you answer like that?
WETIN THIS LESSON TEACH
When we make good decision about wetin we go wear, we show say we respect Jehovah and other people.
Wetin You Don Learn
Why the way we de dress and the way we look dey important to Jehovah?
Wetin be some advice wey fit help us to decide wetin we go wear and how we look?
How the way we de dress fit affect the way people de see true worship?
LEARN OTHER THINGS
Learn about wetin people fit de think when they see how you dress.
Learn why e good to think well before you draw tattoo for your body.
“To Draw Tattoos for Body, Wetin Bible Talk About-am?” (E dey for jw.org)
Learn about other advice wey fit help us make good decision about wetin we go wear.
“The Way You De Dress De Honor God?” (The Watchtower, September 2016)
How one woman change the way e de feel about how other people de dress?
“The Way People De Dress Be De Worry My Mind” (Awake!, December 22, 2003)