Make Wuna Cooperate to Work Territory Wey People De Speak Different-Different Language

E de easy for plenty people to accept the Kingdom message when they hear-am for their own language. E fit be say na because of this one, Jehovah make arrangement for Pentecost 33 C.E., so that “Jews wey de fear God from all nation for this earth” go hear the good news, for their “own native language.” This one happen even though that time, e be like say all of them fit speak and understand Hebrew or Greek language. (Ac 2:5, 8) Today, for area wey people de speak different-different language, congregations wey de do their meeting for different language fit de preach the same territory. How publishers for this kind congregations go cooperate when them de preach? Wetin go help them no overwork the territory or preach the same time so that householders no go vex?

• 

  Arrange-am together (Pr 15:22): Make the service overseers for this congregations meet and arrange how their congregation go de work the territory. If their territory small, congregations wey de use another language, fit want make your congregation no preach to person wey de speak their language. But, if e no easy for them to preach all their territory every time because the area really big, they fit talk say make wuna preach for all the house but tell them, if wuna meet person wey de speak their language and wey want study. (od 93 ¶37) Or they fit tell wuna to help them find people for wuna territory wey de speak their language, and give them the address so that they go visit the person. (km 7/12 5, box) Remember say, sometimes for one family, people fit de speak different-different language. As wuna de arrange to preach the territory well, make wuna follow any law wey government put wey concern people address and things like that.

• 

  Cooperate (Eph 4:16): Make wuna follow any instruction wey wuna service overseer give wuna. You de study with person wey go like make you use e own language conduct the study? E go better make you transfer the study give person for congregation wey de speak e own language so that the student go fit progress.

• 

  Prepare (Pr 15:28; 16:1): If you meet householder wey de speak another language, try your best to preach for the person. If you know the different language wey people for your area de speak, put-am for mind as you de prepare. Download any video, brochure or book for this language them for your phone. You fit still use JW Language app, learn how people de greet for some language.