Study Book for Our Life and Preaching Meeting
NOVEMBER 4-10
FINE-FINE LESSON FROM BIBLE | 1 JOHN 1-5
“No Love This Wicked World or the Things for Inside”
(1 John 2:15, 16) No love the world or the things for this world. If anybody love the world, e no get the love of the Father. 16 Because everything for this world—wetin body want, the things wey eye like, and to de show the things wey we get—no be from the Father, na from this world.
w05 1/1 10 ¶13
De Do Like Jesus
13 Some people fit de think say no be everything for this world bad. But, if we no take time, small-small, this wicked world and everything for inside, fit make us stop to worship Jehovah. And the way Satan arrange everything for this world, na to draw us comot from Jehovah. So, if things for this world don de hungry us, even things wey they no bad, we fit enter trouble. (1 Timothy 6:9, 10) The truth na say, plenty things for this world really bad and fit spoil our friendship with Jehovah. If we de always watch film wey e concern fight-fight, sex, or big-man life, before we know, this things go just be like say they no bad again. And we go want de do them. If we de make friend with people wey their main plan for life na to do different-different business, and de live big life, this things go be the main things for us too.—Matthew 6:24; 1 Corinthians 15:33.
(1 John 2:17) The world and all the things wey dey inside no go remain, but na the person wey e do wetin God want go stay forever.
w13 8/15 27 ¶18
You Be the Kind Person Wey Jehovah Want Make You Be?
18 Another thing wey e fit help us no love things for this world, na when we de always think about wetin apostle John talk. E talk say: “The world and all the things wey dey inside no go remain, but na the person wey e do wetin God want go stay forever.” (1 John 2:17) This world wey Satan de control, dey like say e no go ever end. But, e must end one day. Anything wey person fit gain from this wicked world, no go last forever. If we de remember this one, Satan no go ever fit catch us.
Fine-Fine Things Wey You See for Bible
(1 John 2:7, 8) My brothers and sisters, I no de give wuna new law, but na old law wey wuna don get from the beginning. This old law na the one wey wuna don hear before. 8 But, this law wey I de give wuna na new one, and na law wey [Jesus Christ] follow and wey wuna de follow too, because darkness de go, and the real light don already de shine.
w13 9/15 10 ¶14
We Fit Trust the Law Wey Jehovah De Give Us?
14 Jesus and e disciples teach us plenty times say make we de show our brothers love. For example, Jesus talk say make we love our neighbor as we love ourself. And this one na the second law wey e high pass other law. (Matt. 22:39) James, the brother of Jesus talk say love na the “law wey e come from king.” (Jas. 2:8) Apostle John write say: “My brothers and sisters, I no de give wuna new law, but na old law wey wuna don get from the beginning.” (1 John 2:7, 8) Which law apostle John talk say na “old law”? Na the law wey talk say make we de show love. We fit talk say this law na “old” law because plenty years don pass since Jesus give the law. And e give them this law “from the beginning” or the time wey they become e disciples. But this law na still “new” law because as the disciples de face new problem for life, their love for their brothers need to dey strong, sotey they ready to die for them. Today, people for this world no get this kind love. But we really like-am as Jehovah de teach us say make we get strong love for our brothers.
(1 John 5:16, 17) If you see your brother de do wetin bad, and na sin wey if person do-am e no go die, make you pray, and God go give your brother life. Yes, this one na for people wey their sin no go make them die. But, sin dey wey if person do-am, e must die. Na for that kind sin I de tell you say make you no pray. 17 All bad things na sin, but sin dey wey if person do-am, e no go die.
it-1 862 ¶5
Na All Sin God De Forgive?
We fit pray make God forgive other people? Yes, we fit even pray for the whole congregation. For example, Moses pray for the people of Israel. E confess their sins and e beg Jehovah to forgive them. And Jehovah answer e prayer. (Nu 14:19, 20) And when the people of Israel de dedicate the temple for the time of King Solomon, e pray make Jehovah forgive e people when they repent from their sin. (1Ki 8:30, 33-40, 46-52) When the Jews come back from Babylon, Ezra confess their sin to Jehovah and pray make Jehovah forgive them. This prayer and the advice wey e give the people make them change their way so that Jehovah go forgive them. (Ezr 9:13–10:4, 10-19, 44) If person sin, James talk say make e confess to the elders and they go pray so that Jehovah go forgive e sin. (Jas 5:14-16) But sin dey wey “if person do-am, e must die.” This one na sin against the holy spirit. God no go forgive this sin because the person know say wetin e de do, na sin but e no want repent. We no go pray for this kind person.—1Jo 5:16; Mt 12:31; Heb 10:26, 27; still check SIN, I; SPIRIT.
NOVEMBER 11-17
FINE-FINE LESSON FROM BIBLE | 2 JOHN 1–JUDE
“We Must Struggle to Remain for Truth”
(Jude 3) My brothers and sisters, before, I really want write to wuna about how God go save us, but now, I don see say e dey important make I write to encourage wuna say make wuna really fight to keep the faith wey [God] don give the holy ones, once and forever.
w04 9/15 11-12 ¶8-9
“Jehovah Go continue De Give You Power”
8 We know all the style wey Satan de use because we don learn-am for Bible. (2 Corinthians 2:11) Job na good man but Satan use different-different things tempt Job. E destroy everything wey Job get, e kill all the children wey Job born, e make Job wife advice Job to curse God, e make Job sick, and e bring bad friends to talk lie against Job. All this things really make Job weak sotey e start de feel say God no dey e side again. (Job 10:1, 2) Na true say today, Satan no de cause this kind problem for us the way e do for Job. But plenty Christians de face this kind problem and Satan fit use them as trap for us.
9 For this last days, bad things don really plenty and they fit spoil our friendship with Jehovah. Plenty people de put money first before Jehovah. Film and television program de always show sex wey the law of God condemn. They go make-am be like say na good thing and hide the problem wey person fit get because of this kind life. And plenty people today really like enjoyment pass God. (2 Timothy 3:1-5) This kind thing fit make us no stand well for Jehovah side. So, e dey important make we ‘really fight to keep our faith.’—Jude 3.
Fine-Fine Things Wey You See for Bible
(Jude 4) This one na because some people wey the prophets don talk since say they go get this judgment, don hide join wuna. This people no de fear God and them de use the favor of God as excuse to de do useless things and they don leave Jesus Christ, our only master and Lord.
(Jude 12) When wuna gather to celebrate and show wuna brothers love, them dey there. But, they just be like big-big rock wey hide under water. They be shepherds but they no de shame say na only theirself them de care for; they just be like cloud wey breeze de blow left and right, but no rain; they be tree, but they don uproot them and they don die, so they no fit produce fruit for their season;
it-2 279
Christian Celebration
Bible no talk how they do this celebration or how many times in a year they do-am. (Jude 12) No be Jesus Christ or e apostles talk say make they do-am. And e clear say no be something wey they must do, or wey they go do forever. Some people talk say that time, this celebration de happen when the rich people for congregation cook different-different kind of food, and invite their poor brothers and sisters to come chop. So, when they come, all of them go chop together as one family; whether na pikin wey e papa don die, woman wey e husband don die, rich person or poor person.
it-2 816
Rock
E clear say spi·lasʹ na another Greek word for rock wey e dey under water. Jude use-am as example to talk about some kind people for the congregation. They no come worship Jehovah with clean mind. Just as rock for under water fit destroy ship, na so this kind people fit destroy or spoil the friendship wey people for congregation get with Jehovah. Jude talk for this verse say this people “just be like big-big rock wey e hide under water.”—Jude 12.
(Jude 14, 15) And Enoch, the seventh person from Adam, don still talk about them when e talk say: “See! Jehovah come with e plenty holy angels 15 to judge all people, and to condemn all the wicked people because of all the wicked things wey they don do, and because of all the bad things wey this wicked people don talk against [God].”
wp17.1 12 ¶1
E Really Make God Happy
Wetin Enoch talk say go happen? E talk say: “See! Jehovah come with e plenty holy angels to judge all people, and to condemn all wicked people because of all the wicked things wey they don do, and because of all the bad things wey this wicked people don talk against [God].” (Jude 14, 15) When Enoch de talk this thing, e talk-am like say God don already do-am. Na this style plenty prophets after Enoch still use. Why? Na because they know say the things wey they write about must happen, so they write them like say they don already happen!—Isaiah 46:10.
wp17.1 12 ¶3
E Really Make God Happy
Enoch get faith. This kind faith fit make us ask ourself say, ‘I de see this wicked world the way Jehovah de see-am?’ That judgement message wey Enoch preach about, go still affect our time as e affect people that time. Wetin Enoch talk, first happen for the time of Noah, when Jehovah use heavy rain destroy all the bad people. But, that destruction na just small one. Na example of wetin God go do to this wicked world. (Matthew 24:38, 39; 2 Peter 2:4-6) As Jehovah use e holy angels destroy bad people that time, e don still ready with e angels to punish wicked people for our time. E dey important make we always remember this warning wey Enoch give us, and still tell other people about-am. E fit be say our family members and friends no de worship Jehovah. And we fit de feel say we dey alone. But, just as Jehovah no leave Enoch, e no go ever leave all e faithful servant today!
NOVEMBER 18-24
FINE-FINE LESSON FROM BIBLE | REVELATION 1-3
“I Know All Your Work”
(Revelation 1:20) The seven star wey you see for my right hand and the seven lampstand wey they make with gold, na secret from God. The seven star mean the angels of the seven congregation, and the seven lampstand mean the seven congregation.
w12 10/15 14 ¶8
The Way You De Behave Go Make God Happy?
8 Bible talk say Jesus hold “seven star for e right hand.” This “seven star” de represent anointed elders. But e still represent all elders for congregation. And Jesus de direct them for the correct way. So, when we remember this one, e go make us de always respect the elders. (Rev. 1:16, 20) Jesus na the Head of the congregation. And e eyes be like “fire wey de burn.” So, e mean say Jesus de see everything wey the elders de do. If any elder really need correction, Jesus go make sure say e correct the elder for the right way and the right time. (Rev. 1:14) But for now, make we de respect the people wey Jehovah use e holy spirit appoint. Apostle Paul advice us say: “Make wuna de obey people wey de direct wuna, and know say wuna dey under them, because them de always care for wuna and they go answer for the way they care for wuna; so that they go do-am with joy no be with vex, so that wuna no go enter trouble.”—Heb. 13:17.
(Revelation 2:1, 2) “Write to the angel for the congregation for Ephesus say: The person wey e hold the seven star for e right hand and de waka round the seven golden lampstand, talk say: 2 ‘I know all your work, and everything wey you don do and the way you don endure, and say you no fit leave bad people make they stay with you, and you don test people wey they call theirself apostle, but you don see say they be liars.
w12 4/15 29 ¶11
Jehovah De Help Us Make We No Leave E Side
11 The vision for Revelation chapter 2 and 3, show say Jesus Christ the King, see everything wey happen that time for the seven congregation for Asia Minor. The vision still show say Jesus Christ no de only see wetin de happen for the whole congregation but wetin each person de do. For example, e call some name and talk about things wey they do. People wey do well, e praise them but the ones wey do bad, e warn them. So wetin we learn from this one? The seven congregation for the vision represent anointed Christians after 1914. The correction wey Jesus give the seven congregation still concern all congregation today. So, we correct if we talk say Jehovah de use e son, Jesus Christ, de direct e people today. How we fit gain from this one?
w01 1/15 20-21 ¶20
Continue De Progress as Jehovah Organization De Progress
20 Jehovah organization de progress, so we too go continue de progress. And to do this one, we must always remember say Jehovah don choose Jesus Christ, as “head of the congregation.” (Ephesians 5:22, 23) E still dey important to remember wetin Jehovah talk for Isaiah 55:4. E talk say: “See! I don choose [Jesus] as leader and commander, and to tell the whole world about me.” And Jesus really know how to lead. E still know e sheep and things wey them de do. In short, when Jesus say make John write to the seven congregations for Asia Minor, e tell them five times say: ‘I know all wuna work.’ (Revelation 2:2, 19; 3:1, 8, 15) And just like Jehovah, Jesus know the things wey we need. Before Jesus teach e disciples how to pray, e tell them say Jehovah know the things wey they need even before they ask.—Matthew 6:8-13.
Fine-Fine Things Wey You See for Bible
(Revelation 1:7) See! E de come with cloud, and everybody go see-am, even the people wey chuck-am; and people for all the country for this earth go cry and de regret because e come. Yes, this one must happen, Amen.
kr 226 ¶10
God Go Use E Kingdom Destroy All E Enemy
10 Jesus go judge some as sheep and some as goat. The next thing wey go happen go make all enemy of the Kingdom fear more-more. Jesus talk say: “They go see the Son of man de come inside cloud with great power and glory.” (Mark 13:26) This powerful sign wey they go see for heaven go show them say Jesus don come to judge the whole world. For another Bible verse, Jesus still talk more about how the judgement for the last days, go happen. And e dey inside the story of the sheep and the goats. (Read Matthew 25:31-33, 46.) That time, Jesus go judge all the people wey use all their heart support the Kingdom, as sheep. And as Bible talk, they go “raise their head up” because they know say the time wey God go save them don near. (Luke 21:28) But, Jesus go judge people wey no support the Kingdom as “goat.” And because they know say this one mean “everlasting destruction” for them, they go de cry and de regret.—Matt. 24:30; Rev. 1:7.
(Revelation 2:7) Make the person wey e get ear, hear wetin the spirit de tell the congregations: If person win, I go allow the person chop from the tree of life. This tree dey for the paradise of God.’
w09 1/15 31 ¶1
Lesson From the Book of Revelation—I
2:7—Wetin be “the paradise of God”? Wetin Jesus talk for this verse concern anointed Christians. So, e clear say the paradise wey this verse talk about na heaven, the place wey God dey. Because this anointed Christians worship Jehovah well till they die, Jehovah go allow them chop “from the tree of life.” And this one mean say they no go ever die again.—1 Cor. 15:53.
NOVEMBER 25–DECEMBER 1
FINE-FINE LESSON FROM BIBLE | REVELATION 4-6
“The Vision of the Four Horsemen—How E Concern You?”
(Revelation 6:2) As I look, I see one white horse, and the man wey sitdown ontop carry bow and arrow; and God give this man crown. And e comot go fight, and de win de go until e win finish.
wp17.3 4 ¶3
Wetin the Four Horsemen De Represent?
Who dey ontop the white horse? Another chapter for this book of Revelation go help us know the answer. That place call the person wey de ride this white horse, “The word of God.” (Revelation 19:11-13) And we know say Bible call Jesus Christ “The Word,” because na Jesus, God de use tell people and angels wetin e want make they do. (John 1:1, 14) The Book of Revelation still call Jesus “King of kings and Lord of lords”. And e talk say Jesus na “Person wey we fit trust and wey de talk true.” (Revelation 19:16) E clear say Jehovah don give Jesus power to rule and fight war. E no de use e power anyhow or for bad thing. But, this one fit make people ask questions.
wp17.3 4 ¶5
Wetin the Four Horsemen De Represent?
Which time this four men start their journey with their horse? The first horseman, na Jesus. And Bible show say e start e journey, when e receive e crown. (Revelation 6:2) Which time Jesus receive e crown as King? No be as e just reach heaven e become King. Bible help us understand say e wait for some time, before e become King. (Hebrews 10:12, 13) Jesus tell e disciples things wey go help them know when e go start to rule for heaven. E talk say when e start de rule, things go really bad pass before. War go dey plenty place, food no go plenty, and different-different kind disease go dey. (Matthew 24:3, 7; Luke 21:10, 11) After World War I start for 1914, e just clear say we don enter “last days,” as Bible talk.—2 Timothy 3:1-5.
(Revelation 6:4-6) Then another one come out, and na red horse. And they give the person wey sitdown ontop long sword and power to remove peace from this earth so that people go de kill-kill theirself. 5 As e open the third seal, I hear as the third angel talk say: “Come!” And as I look, I see black horse, and the person wey sitdown ontop, hold balancing scale for hand. 6 And for the center of the four angels, I hear voice wey e sound like person voice, and e talk say: “One quart of wheat go be one denarius and three quart of barley go be one denarius; but make wuna no waste the olive oil and the wine.”
wp17.3 5 ¶2
Wetin the Four Horsemen De Represent?
The second horseman de represent war. And as Bible talk, e come remove peace from this earth, no be only for some country but for the whole world. The first time wey the whole world fight war na 1914. After this one, they still fight another world war wey even bad pass the first one. Some people don calculate say the number of people wey die because of war and other fight, since 1914 don pass 100 million. And, plenty people today de suffer different kind of things because of war.
wp17.3 5 ¶4-5
Wetin the Four Horsemen De Represent?
“And as I look, I see black horse, and the person wey sitdown ontop, hold balancing scale for hand. I hear voice wey e sound like person voice, and e talk say: ‘One quart of wheat go be one denarius and three quart of barley go be one denarius; but make wuna no waste the olive oil and the wine.’”—Revelation 6:5, 6.
The person wey de ride this horse represent hunger. This thing wey Bible talk for here, show say food go scarce sotey people go buy one quart (0.7 kilos) of wheat for one denarius. And that time, one denarius na money for one day work. (Matthew 20:2) And na the same amount of money them de use buy three quarts (2.1 kilos) of barley. And people believe say wheat better pass barley. But wetin 0.7 kilo or 3 cups of wheat fit really do for big family? So for the vision, they warn people say make they no waste the food wey people de chop every day that time, like olive oil and wine.
(Revelation 6:8) And as I look, I see horse wey e color don fade. And the name of the person wey sitdown ontop na Death. And Grave de follow-am for back. And they give them power over one-quarter of the earth, make they fit kill people with long sword, hunger, different-different kind of bad disease and wild animal.
wp17.3 5 ¶8-10
Wetin the Four Horsemen De Represent?
The fourth person wey de ride horse represent death. And na different-different disease and other things de cause this death. Small time after 1914, one bad disease wey the name na Spanish flu kill millions of people. E be like say e reach 500 million people wey this disease affect that time. And this one mean say out of three people that time, one person must get that disease.
But this disease na just one of the many disease wey don kill people for this our time! Some people talk say between 1901 and 2000, another disease wey the name na smallpox kill millions of people. Go reach tomorrow, AIDS, tuberculosis, and malaria still de kill people even though different-different medicine de come out.
Whether na war, hunger, or disease cause-am, the end na the same, na death! Grave just de open mouth de swallow people, e no de ever belleful.
Fine-Fine Things Wey You See for Bible
(Revelation 4:4) And 24 throne dey round this throne, and 24 elders sitdown for the 24 throne and they wear white cloth, and golden crown.
(Revelation 4:6) And for front of the throne, something wey e resemble big water dey there. And e just be like glass, and e clear like crystal. And four angels dey the center where the throne dey, and they still surround the throne. And they get eyes for front and back of their body.
re 76-77 ¶8
Jehovah Sitdown for E Throne With Power and Glory
8 John know say for the time of Moses, na priests de serve for tabernacle. E fit be say e surprise because of the next thing wey e see. E talk say: “And 24 throne dey round this throne, and 24 elders sitdown for the 24 throne and they wear white cloth, and golden crown.” (Revelation 4:4) So instead of priests, na 24 elders John see. They wear crown and they sitdown for throne. Who this elders be? They be anointed Christians. Jehovah don resurrect them and make them kings for heaven as e promise them. Why we dey sure of this one?
re 80 ¶19
Jehovah Sitdown for E Throne With Power and Glory
19 Who this four angels de represent? The vision wey Ezekiel see, help us know the answer. Ezekiel see Jehovah for e throne ontop chariot. And the four angels wey de follow Jehovah, resemble the ones wey John talk about. (Ezekiel 1:5-11, 22-28) After, Ezekiel still see Jehovah for e throne ontop chariot with the same angels. But this time e call this angels cherubs. (Ezekiel 10:9-15) This four angels wey John see represent all the cherub wey Jehovah get. And cherubs na angels wey their position high pass other angels for heaven. For the ark of the covenant wey represent the throne of Jehovah, they use gold make two cherub ontop the cover. So, e no go surprise John to see cherub near Jehovah. And that time, Jehovah de talk with the people of Israel, from the center of the two cherub.—Exodus 25:22; Psalm 80:1.
(Revelation 5:5) But one of the elders tell me say: “No cry again. See! The Lion wey come from the tribe of Judah, and family of David, don win and e qualify to open the scroll and the seven things wey they use seal-am.”
cf 36 ¶5-6
“See! The Lion Wey Come From the Tribe of Judah”
5 Plenty times, when people de talk about animal wey no de fear, na lion de come their mind. You don see mature lion face-to-face before? If you don see-am, e fit be say na big iron fence separate you and the lion for zoo. Even with the fence, serious fear go still catch you. As you and the lion de look each other eye to eye, you think say the lion go run because e de fear you or anything? Bible talk say na lion strong pass all animal for bush, and e no de fear anything. (Proverbs 30:30) Na so Jesus be.
6 Make we talk about three different way wey Jesus show say like lion, e no de fear. (1) E defend the truth, (2) e no do partial, and (3) e no fear to suffer for the truth. We go see say all of us fit copy Jesus example, whether we de normally fear or we no de fear.