E Get Any Better Government Wey Fit Rule the World Well?—Wetin Bible Talk?

Governments for this world dey confuse. Even for countries wey be like say them get better governments, this governments de worry about the bad-bad report wey people de spread about them, elections result wey plenty people no agree with, serious quarrel wey de happen between different group of people because of politics matter, and the way people de riot.

Bible talk about one better government. You fit don even hear about that government. Na the one wey Jesus Christ talk about for the prayer wey e teach im disciples.

“So, make una de pray like this: ‘Our Papa wey dey heaven, make your name dey holy. Make your Kingdom come. Make wetin you want happen for this earth as e dey for heaven.’”—Matthew 6:9, 10.

Wetin Bible talk about that Kingdom?

The Kingdom na better government

This Kingdom de rule from heaven.

Jesus call this government “the Kingdom wey dey heaven.” (Matthew 4:17; 5:3, 10, 19, 20) Because of this one, Jesus talk say: “My Kingdom no be part of this world.”—John 18:36.

The Kingdom go replace all the government for this world.

Bible talk say, this kingdom “go destroy and end all [the government for this world] and na only that kingdom go remain forever.”—Daniel 2:44.

Them no go ever destroy this Kingdom wey Jesus Christ be the King.

Bible talk say: “E go rule forever and im kingdom no go ever end.”—Daniel 7:13, 14.

The Kingdom go make peace dey everywhere for this earth, and everybody go dey safe.

Bible talk say: ‘Everybody go live in peace for their own farm and under their own fig tree, and nobody go make them fear.’—Micah 4:4, Good News Translation.

Learn more about the Kingdom

When Jesus dey this earth, e spend plenty time “de preach the good news of the Kingdom.” (Matthew 9:35) E still talk say:

“Them go preach this good news of the Kingdom for the whole world, so that all the nations go hear-am, and after that one, the end go come.”—Matthew 24:14.

E pass 240 lands wey them de preach the good news of the Kingdom today. We go like make you learn more about this government and the things wey you go gain when e de rule.

Watch the video Wetin Be the Kingdom of God?