Wetin Go Help You No De Fear Death Again?

Wetin Bible talk

We de fear death because na our big enemy and this one de make us do our best to protect our life. (1 Corinthians 15:26) But, plenty people de fear death anyhow because of lie-lie story and different-different things wey people believe about death and this one don make death “hold [them] as slave all their life.” (Hebrews 2:​15) If you know the truth about death, e go help you no de fear-am anyhow. This kind fear fit make you no really enjoy your life.​—John 8:​32.

The truth about death

• People wey don die no know anything at all. (Psalm 146:4) Bible talk say death be like sleep. Since death be like sleep, you no need to fear say when you die, you go de feel pain or go somewhere go de suffer.​—Psalm 13:3; John 11:​11-​14.

• People wey don die no fit do us anything bad. Even people wey hate us before them die, no get power to do us anything after them don die. (Proverbs 21:16) Bible talk say people wey don die no fit hate or jealous people again.​—Ecclesiastes 9:6.

• If person die, e no mean say im own don finish kpatakpata. This one na because, God go bring people wey don die back to life.​—John 5:​28, 29; Acts 24:15.

• God don promise us say time go come when “death no go dey again.” (Revelation 21:4) And when that time come, people no go fear death again. Bible talk say: “Na righteous people go stay for this earth, and them go stay inside forever.”​—Psalm 37:29.