Wetin Be the New Jerusalem?
Wetin Bible talk
For Bible, na two times them talk about “New Jerusalem,” but no be ordinary city e be. This city represent some of Jesus disciples wey go rule with Jesus for heaven. (Revelation 3:12; 21:2) Bible still show say them fit call this group of people wey go rule with Jesus, bride of Christ.
Wetin fit help us understand wetin New Jerusalem be
New Jerusalem dey for heaven. Any time wey Bible talk about New Jerusalem, e de always talk say e de come down from heaven, where angels de protect the gate of the city. (Revelation 3:12; 21:2, 10, 12) Another thing be say, the way the city big reach show say the city no dey this earth. The city be like box wey get six side and the measurement for each side na about “2,220 kilometer.” (Revelation 21:16; King James Version) All the side of the city high reach almost 560 kilometers (350 mi). This one mean say the city high well-well sotey e reach heaven.
Na some of Jesus disciples wey Bible call Jesus bride be the New Jerusalem. Bible call New Jerusalem “the bride wey be the Lamb wife.” (Revelation 21:9, 10) This one no be ordinary Lamb (small sheep), but the Lamb represent Jesus Christ. (John 1:29; Revelation 5:12) “The Lamb wife,” or Jesus bride, represent Christians wey go join Jesus for heaven. The Bible compare the relationship between Jesus and this Christians wey de go heaven, to relationship between husband and wife. (2 Corinthians 11:2; Ephesians 5:23-25) Them write “the 12 names of the 12 apostles of the Lamb” ontop the 12 stones wey them take do foundation of the city wall. (Revelation 21:14) This information help us know wetin New Jerusalem really be, since them build Christians wey de go heaven “ontop the foundation of the apostles and prophets.”—Ephesians 2:20.
New Jerusalem na part of God Kingdom. For Bible time, na Jerusalem be the capital of Israel, the place where King David, im son Solomon, and other kings wey come from David family take rule. Bible talk say them sitdown for “Jehovah throne.” (1 Chronicles 29:23) For Bible time, them de call Jerusalem “the holy city.” This one show say Jehovah de use the king for David family rule Israel people. (Nehemiah 11:1) Bible still de call New Jerusalem “the holy city.” Na the people wey go rule with Jesus for heaven “as kings over the earth” be the New Jerusalem.—Revelation 5:9, 10; 21:2.
Na New Jerusalem God go use bless people for this earth. Bible talk say New Jerusalem de “come down from heaven from God.” This one show say na New Jerusalem God go use change things for this earth. (Revelation 21:2) This one still show say connection dey between New Jerusalem and God Kingdom. Because na this Kingdom God go use to make wetin e want happen for “this earth as e dey for heaven.” (Matthew 6:10) This na some of the blessing wey God get for mind for this earth:
Sin no go dey again. Bible show say “one river wey the water de give life” de flow comot from New Jerusalem, and na this river de give water to “trees wey de give life” and the “trees na to heal the nations.” (Revelation 22:1, 2) This one mean say God go comot sin from our body and we go still get better friendship with-am. This one go make-am possible for humans to dey perfect the way God want-am from the beginning.—Romans 8:21.
Humans go get better relationship with God again. Na sin make humans no get better relationship with God. (Isaiah 59:2) Na when God go remove sin, this promise for Bible go happen, wey talk say: “The tent of God dey with people, and e go stay with them, and them go be im people. And God imself go dey with them.”—Revelation 21:3.
Suffer-suffer and death no go dey again. God go use im Kingdom, “clean all the tears comot from their eyes, and death no go dey again, sorrow, cry-cry, and pain no go dey again. The things wey de happen before don go.”—Revelation 21:4.