Wetin Bible Talk About to Give?
The answer wey Bible give
Bible tell us say make we de give from our heart and for the correct reason. Bible show say the person wey de give and the one wey de collect the gift de always dey happy. (Proverbs 11:25; Luke 6:38) Jesus talk say: “Na when person give, e go dey happy pass when e receive.”—Acts 20:35.
Which way to give de make God happy?
When we give from our heart, e de make God happy. Bible talk say: “Make each person do just as e decide for e heart, make e no complain or do-am by force, because God love person wey de glad as e de give.”—2 Corinthians 9:7, footnote.
To give from the heart na part of “the kind worship” wey God want. (James 1:27, footnote) Person wey de help people wey get problem de do wetin God like, and Bible talk say that person de borrow something to God. (Proverbs 19:17) Bible de teach say God go pay the person back.—Luke 14:12-14.
Which way to give no de make God happy?
If person de give for the wrong reason. Some examples na:
To make people praise us.—Matthew 6:2.
To gain something back from people.—Luke 14:12-14.
To try to buy everlasting life.—Psalm 49:6, 7.
If the gift na to support things wey God hate. For example, na bad thing to give person money to play gamble or to buy alcohol or bad drugs like cigar. (1 Corinthians 6:9, 10; 2 Corinthians 7:1) E still no good to give money to person wey fit work to care for e self but e no want work.—2 Thessalonians 3:10.
If we de give plenty things to other people but we no de care for our own family. Bible talk say family head must give e family the things wey they need. (1 Timothy 5:8) E no go good make family head give plenty things to other people sotey e own family de suffer. Na so Jesus condemn some people wey no be want help their old papa and mama because them de claim say all the things wey they get “na gift to God.”—Mark 7:9-13.