STUDY 2

Talk Like Say You De Discuss

2 Corinthians 2:17

WETIN YOU NEED TO DO: Dey natural and real when you de talk. E go show how you de feel about wetin you de talk and the people you de talk to.

Pray and prepare well. Pray make Jehovah help you, so that you no go de direct attention to yourself, but to the message. Get the main points wey you want talk for your mind. Use your own words to talk; no just de talk word for word as e dey for paper.

If you plan to read from the Bible or from another book, know the passage well so that you go read-am well. If you de quote wetin people don talk, read-am with feeling but no over do-am.
Speak from your heart. Think about why people need to hear the message. Focus on the people. The way you stand or sitdown, the way you de move your body when you de talk, and the way your face be, go show say you mean wetin you de talk and you dey friendly.

Dey natural when you de talk but no turn-am to play-play. Use clear and correct grammar to show respect for your message.
Look the people wey you de talk to. If for your place, no be problem to look person for face, then you fit de look the person wey you de talk for face as you de talk. When you de give talk, no just de look everybody as group, instead, de look people one by one.