WHEN YOU DE CHECK THE PERSON AGAIN
LESSON 9
Try to Understand How People De Feel
Advice: “Make una de happy with people wey de happy; make una cry with people wey de cry.”—Rom. 12:15.
The Thing Wey Jesus Do
1. Watch the VIDEO, or read Mark 6:30-34. Then think about this questions:
Why Jesus and im apostles be de hope say “them go dey alone”?
Wetin move Jesus to teach the plenty people?
Wetin We Learn From Jesus?
2. When we de try to understand how people de feel, this one go make us care about them, instead of only our message.
Copy Jesus
3. De listen well. Make you allow the person talk how e de feel. Make you no try to stop-am when e de talk, or de try to show say you no care about how e de feel, the things wey e de worry about, or the things wey e no agree with. When you de listen to the person well, you de show the person say you want know wetin dey im mind.
4. Think about the person wey want learn from Bible. From the things wey una talk, ask yourself say:
‘Why e need to hear the truth?’
‘If e de study Bible, how this one go make im life better now and for future?’
5. Talk about things wey go help the person. No waste time to show the person how Bible study go fit answer the questions wey e get and help-am know how to live im life.