Think About the Main Points Again

E de hard you to remember wetin you don learn sometimes? E de happen to all of us. So wetin fit help you? Na to think about the main points of wetin you don learn.

As you de study, try to stop from time to time to think about wetin you don learn. See wetin apostle Paul encourage the brothers and sisters to do as them de study the letter wey e write to them. E talk say: “Now the main point of wetin we de talk na . . . ” (Heb. 8:1) This one help the brothers and sisters to understand wetin e don talk and help them see how the different-different things wey e don talk, connect to each other.

When you don study finish, you fit use ten minutes to think about the main points wey you don learn or gather from your study. If you no fit remember them, you fit check the small-small topics or the first sentence for each paragraph to help you remember. If you learn some new things, try explain-am for the way you understand-am. If you de take time to think again about wetin you don study, this one go help you fit remember-am. And e go still help you see how you fit use-am for your life.