You Fit Dey Sure Say Jehovah Love You

1. Wetin make you promise Jehovah say you go use all your life serve-am? (Still check the picture.)

YOU remember when you pray to Jehovah and tell-am say you want use all your life serve-am? You do like that because you don learn about-am and you really love-am. You promise-am say you go put im worship as the number one thing for your life and say you go continue to love-am with all your heart, all your soul, all your mind, and all your power. (Mark 12:30) Since that time, your love for Jehovah don continue to de grow. So wetin you go talk if person ask you say: “You really love Jehovah?” We dey sure say you no go waste time to talk say, “I love Jehovah pass any other person or any other thing!”

2-3. Wetin Jehovah want make we dey sure of, and wetin we go talk about for this article? (Jeremiah 31:3)

² But wetin go be your answer if person ask you say, “You really dey sure say Jehovah love you?” E go hard you to answer because you think say you be person wey Jehovah no fit love? One sister wey them no show-am love when e dey young talk say: “I know say I love Jehovah. I no de doubt that one. But plenty times, e de hard me to believe say Jehovah really love me.” So wetin fit help you know how Jehovah really feel about you?

³ Jehovah want make you dey sure say e love you. (Read Jeremiah 31:3.) The truth be say, na Jehovah draw you to imself. And when you promise-am for prayer say you want use all your life worship-am, and you baptize, e give you one special gift. That gift na im love wey no de fail. This one mean say e really love you and e no go ever leave you. Because of Jehovah love wey no de fail, e de see everybody wey de worship-am well as im “special property.” This one mean say you really dey special to Jehovah. (Mal. 3:17.) Jehovah want make you feel the same way wey apostle Paul feel when e write say: “Because I dey sure say death, or life, or angels, or governments, or things wey dey here now, or things wey de come, or powers, or things wey dey high, or things wey dey deep, or any other thing wey God make, no go fit separate us from the love wey God get for us.” (Rom. 8:​38, 39) For this article, we go talk about why we need to dey sure say Jehovah love us, and wetin we need to do so that we go fit dey sure more-more.

WHY E DEY IMPORTANT MAKE WE DEY SURE SAY JEHOVAH LOVE US?

4. Wetin Satan want make we believe and how we fit stand against-am?

⁴ If we accept say Jehovah love us, this one go help us fit fight against one of Satan trap. (Eph. 6:11) Satan go do anything wey e fit do to make sure say we comot from Jehovah side. One way e de do this one, na to make us believe say Jehovah no really love us. No ever forget say Satan de look for any opportunity wey e fit use catch us. The best time wey Satan de attack us na when we dey weak. For example, e fit attack us when we dey sad because of wetin happen to us for past, or because of problems wey we de face now, or when we de worry about wetin fit happen for future. (Prov. 24:10) Satan be like lion wey want catch animal wey e go chop. Lion de attack animal when e know say the animal dey weak and e no fit defend imself. Na so Satan de do too. E de try catch us when e see say we dey weak. But if we continue to do things wey go make us dey sure say Jehovah love us, this one go make us fit stand against Satan and all the trap wey e de use try to catch us.—1 Pet. 5:8, 9; Jas. 4:7.

5. Why we need to dey sure say Jehovah love us and value us?

⁵ If we dey sure say Jehovah really love us, our friendship with-am go strong more-more. Why we talk like that? Jehovah create us to fit show love to other people, and for us to like-am when other people show us love. When person show us love, this one de move us to love the person too. So the more we feel say Jehovah love us, the more we go want love-am back. (1 John 4:19) As our love for Jehovah de strong more-more, na so Jehovah love for us go de strong too. Bible tell us say: “Make una come near God, and e go come near una.” (Jas. 4:8) Wetin we fit do to really dey sure say Jehovah love us?

WETIN FIT HELP US TO DEY SURE SAY JEHOVAH LOVE US?

6. If you no dey sure say Jehovah really love you, wetin you fit pray about?

⁶ Continue to pray to Jehovah make e help you to understand say e really love you. (Luke 18:1; Rom. 12:12) Pray to Jehovah make e help you see yourself the way e de see you. You fit pray about this matter many times everyday. The truth be say, if your heart de condemn you, e fit no really easy for you to accept say Jehovah love you. But remember say Jehovah big pass your heart. (1 John 3:​19, 20) E know you pass the way you know yourself, and e de see the better-better character wey you get even the one wey you no know say you get. (1 Sam. 16:7; 2 Chron. 6:30) So no waste time to tell-am how you de feel and beg-am make e help you to dey sure say e love you. (Ps. 62:8) After you don pray to-am, e dey important make you do this things wey we go talk about.

7-8. How the book of Psalms de help us dey sure say Jehovah really love us?

⁷ Believe wetin Jehovah talk. Jehovah use im powerful holy spirit to move people wey write the Bible, so we fit believe wetin them talk about-am for Bible. See the better way wey David describe Jehovah for the book of Psalms. E talk say: “Jehovah dey near people wey de feel say their own don finish; E de save people wey life don tire.” (Ps. 34:18.) When you de feel sad, you fit de think say nobody dey to help you. But Jehovah promise say when you de feel like this, e go really dey close to you, because na that time you need-am pass. For another place for the book of Psalms, David still talk say: “Collect my tears put inside your skin bottle.” (Ps. 56:8) Jehovah de see when you dey sad and when you de feel pain. E really care about you and e de feel-am when you de suffer. Just as every drop of water wey dey inside skin bottle dey important to person wey de waka for desert, na so the way we de feel dey important to Jehovah. E de see your tears, e de remember all the time wey you feel pain and cry. Psalm 139:3 talk say: “You [Jehovah] know everything wey I de do.” Remember say Jehovah de see everything wey you de do, but e de really put mind for the good things wey you de do. (Heb. 6:10) Why e de do this one? Na because e value everything wey you de do to make-am happy.a

⁸ Jehovah de use all this kind place for Bible to tell you say e really love you and e care about you. But as we learn before, Satan want make we believe say Jehovah no love us. So if you de doubt sometimes whether Jehovah love you, just ask yourself say: ‘Who I go believe, na Satan wey be “the papa of lie,” or na Jehovah wey be “the God of truth”?’—John 8:44; Ps. 31:5.

9. Wetin Jehovah promise people wey love-am? (Exodus 20:5, 6)

⁹ Think about how Jehovah de feel about people wey love-am. See wetin Jehovah tell Moses and Israel people. (Read Exodus 20:5, 6.) Jehovah promise say e go continue to love people wey love-am. Wetin Jehovah talk show say e no go ever stop to love people wey love-am. (Neh. 1:5) So if you de think say Jehovah no love you, ask yourself say: ‘I love Jehovah?’ If your answer na yes and you de do your best to make-am happy, dey sure say Jehovah really love you. (Dan. 9:4; 1 Cor. 8:3) This one mean say if you dey sure say you really love Jehovah, you no need to doubt say Jehovah love you. You fit dey sure say Jehovah really love you and e no go ever leave you.

10-11. How Jehovah want make you see Jesus sacrifice? (Galatians 2:20)

¹⁰ Think about Jesus sacrifice. The gift wey Jehovah don give us wey dey important pass, na im son Jesus Christ wey e send make e come die for us. (John 3:16) But you de see this gift as something wey Jehovah give you? Yes! Jehovah send im son make e come die for you. Make we see the example of apostle Paul. Remember say e commit some serious sins before e become Christian, and even after e become Christian, e still continue to work on im weak point. (Rom. 7:​24, 25; 1 Tim. 1:​12-14) Even with all this one, e dey sure say Jesus sacrifice na gift from Jehovah to-am. (Read Galatians 2:20.) Remember say na Jehovah make apostle Paul write about this one for Bible. So Jehovah want make we learn from wetin apostle Paul write. (Rom. 15:4) Jehovah want make you see Jesus sacrifice as gift wey come from-am to you. When you think about this wonderful gift wey Jehovah don give you, e go make you dey sure say Jehovah really love you.

¹¹ We thank Jehovah say e send Jesus to this earth make e come die for us. But another reason why Jesus come this earth na to tell people the truth about Jehovah. (John 18:37) One of the things wey Jesus teach na about Jehovah love for us.

JESUS TEACH US HOW JEHOVAH REALLY LOVE US REACH

12. Why we fit believe wetin Jesus talk about Jehovah?

¹² When Jesus dey this earth, e happy to tell people the kind person wey Jehovah be. (Luke 10:22) Why we fit believe wetin Jesus talk about Jehovah? Na because Jesus don live with im papa for heaven for many-many years before e come this earth. (Col. 1:15) Jesus know say im papa really love-am. And e don see how im papa de show love to angels wey continue to worship-am, and to people wey de worship-am for this earth. How Jesus de help other people to fit dey sure say Jehovah really love them?

13. How Jesus want make we de see Jehovah?

¹³ Jesus want make we de see Jehovah the way e de see Jehovah. E pass 160 times wey Jesus call Jehovah “Papa” for Matthew, Mark, Luke and John. And when e de talk to im disciples, e use words like “una Papa” or “una Papa wey dey heaven.” (Matt. 5:16; 6:26) The study note for Matthew 5:16 talk say: “Before Jesus come this earth, plenty servants of Jehovah use titles to call Jehovah. Them use titles like ‘the Almighty,’ ‘the God Wey High Pass,’ and the ‘Person Wey Create Everything.’ But Jesus de always call Jehovah ‘Papa.’ This one mean say Jehovah want make we dey close to-am just as pikin de dey close to im papa.” So Jesus de teach us say Jehovah really love us, just as papa de love im pikin. Make we talk about two example for Bible when Jesus call Jehovah “Papa.”

14. How Jesus show say each of us dey important for Jehovah eye? (Matthew 10:​29-31) (Still check the picture.)

¹⁴ Make we see the first example for Matthew 10:​29-31. (Read-am.) The bird wey them de call sparrow, na very small bird and birds no de worship Jehovah. But Jesus talk say our Papa for heaven know when any of them de fall for ground. If na so Jehovah value each of this small bird, we dey sure say e value us pass them because we love-am and we de worship-am. Wetin Jesus mean when e talk say Jehovah know “the number of hair wey dey una head”? The study note for verse 30 talk say: “Because Jehovah know us reach like this, this one make us dey sure say e really care about each person wey de worship-am.” E dey clear say Jesus want make we know say each of us dey important for Jehovah eye.

15. From wetin Jesus talk for John 6:​44, wetin you learn about your Papa for heaven?

¹⁵ See another place for Bible where Jesus call Jehovah “Papa.” (Read John 6:44.) That place show say na your Papa for heaven help you to fit know-am and love-am. Why e do this one? Na because e see say you get good heart. (Acts 13:48) When Jesus de talk wetin dey John 6:​44, e fit be say e de quote wetin Jehovah talk wey dey Jeremiah 31:3. For that verse, Jehovah talk say: “The love wey I don use draw you come meet me no de fail.” (Jer. 31:3; compare Hosea 11:4.) Wetin this one mean? E mean say our Papa for heaven de continue to see the better-better character wey you get even the ones wey you no know say you get.

16. (a) Wetin Jesus teach us, and why we suppose trust-am? (b) Wetin fit help you dey sure say Jehovah na the best Papa wey you fit get? (Check the box “Papa Wey All of Us Need.”)

¹⁶ As Jesus call Jehovah our Papa, Jesus de try talk say Jehovah no be only im Papa, but e still be your Papa too. And e want make you dey sure say e really love you and care for you. If sometimes you de feel say Jehovah no love you, make you remember wetin Jesus talk and trust-am. You need to do this one because e de always talk true and e know our Papa pass any other person.—1 Pet. 2:22.

CONTINUE TO DEY SURE MORE-MORE SAY JEHOVAH LOVE YOU

17. Why e good make we continue to dey sure say Jehovah really love us?

¹⁷ We need to do everything wey we fit do wey go help us continue to dey sure say Jehovah really love us. Remember say Satan wey be our enemy, de try use all kind of cunning way to stop us make we no de worship Jehovah. E want make we dey weak, so e go continue to de try to make us believe say Jehovah no love us. Make we no ever believe Satan lie!—Job 27:5.

18. Wetin you fit do so that you go continue to dey sure say Jehovah love you?

¹⁸ For this article, we don learn say Jehovah really love us. So continue to pray to-am make e help you fit see the better-better character wey e see say you get wey make-am love you. Think about Bible verses wey describe how Jehovah love people wey love-am. Remember say Jehovah go always love people wey love-am. No forget say Jehovah send Jesus come this earth make e come die for you. And dey sure say Jehovah na your Papa just as Jesus talk. So if anybody ask you if Jehovah really love you, you go fit answer-am say: “Yes, e love me! And I de do my best everyday to show-am say I really love-am!”