Jehovah Love De Last Forever

1-2. Which problems many Christians de face?

IMAGINE say one boat dey for river and heavy breeze de blow. The wave for the water just de carry the boat up and down. The boat go just de go anywhere wey the water carry-am go unless them put anchor inside the water to fit hold the boat. Anchor na something wey go make the boat stay for one place so that the heavy breeze no go carry-am go.

² When you de face some kind problem, e go just be like say the problem de carry your mind up and down the way the breeze de carry the boat. Your mind fit no settle. You fit dey sure say Jehovah love you and say e de help you, but the way you de feel fit change and you fit de think if Jehovah de even see wetin de happen to you. (Ps. 10:1; 13:1) But your mind fit later come down if your friend encourage you. (Prov. 17:17; 25:11) But after some time, you fit start to doubt again. You fit even de wonder if Jehovah still dey your side. If this kind thing de happen to you, how you fit dey calm like that boat wey them put im anchor for water? Or how you fit dey sure, and continue to dey sure say Jehovah love you and say e go help you?

3. (a) Wetin be the meaning of “love wey no de fail” wey Psalm 31:7 and 136:1 talk about? (b) Why we fit talk say Jehovah na the number one example of person wey de show love wey no de fail? (Still check the picture.)

³ When you remember Jehovah love wey no de fail, this one fit help you make your mind come down when you de face problem. (Read Psalm 31:7; 136:1.) Love wey no de fail na love wey strong well-well wey person de get for another person and wey de make-am continue to dey with that person. Jehovah na the number one example of person wey get this kind love. Na this one make Bible talk say “e de always show love wey no de fail.” (Ex. 34:6, 7) Bible still talk say Jehovah “get love wey no de fail well-well for people wey put their heart” for-am. (Ps. 86:5) This one mean say Jehovah no go ever leave people wey de worship-am well. When you remember say Jehovah love no de ever fail, this one fit make your mind come down when you de face problem.—Ps. 23:4.

REMEMBER SAY JEHOVAH LOVE NA ONE OF THE IMPORTANT TRUTHS WEY WE FIRST LEARN

4. (a) Give example of some important truth wey we first learn from Bible. (b) Explain why e fit hard for anybody to make us stop to believe them.

⁴ To fit make your mind come down when you de face problem, you need to remember say the love wey Jehovah get for us na one of the important truths wey we first learn from Bible. But when you hear the word, “important truth wey we first learn from Bible,” wetin de come your mind? You fit de remember the truth wey Bible teach wey you don learn when you de study Bible. For example, you learn say God name na Jehovah, say Jesus na God special Son, say people wey don die no know anything again, and say this earth go be Paradise for future and people go live forever for there. (Ps. 83:18; Eccl. 9:5; John 3:16; Rev. 21:3, 4) After you don believe say this things wey you don learn na true, e go hard for anybody to make you stop to believe them. Why? Na because you know say this things wey you don learn na the truth wey dey inside Bible. As we don see say Jehovah love na part of the important truths wey we first learn for Bible, make we talk about how this one fit help us stop to de doubt if Jehovah de care about us or if e de see the problems wey we de face.

5. Explain how person fit stop to believe lie-lie things about Bible.

⁵ When you first start to study Bible, wetin help you stop to de believe lie-lie wey people de teach about Bible? E fit be say you compare wetin you de learn from Bible with wetin them de teach for your religion. For example, e fit be say you believe before say Jesus na Almighty God. But as you de study Bible, you fit don ask yourself say, ‘This thing wey I believe really correct?’ After you don learn wetin Bible teach about this matter you come dey sure say Jesus no be Almighty God. So instead make you continue to believe wetin no correct, you start to believe wetin Bible teach about Jesus. For example, Bible talk say: Jesus “na the firstborn for everything wey God make,” and say na im be “the special Son of God.” (Col. 1:15; John 3:18) Na true say e no easy for person to stop to believe wetin e believe before. (2 Cor. 10:4, 5) But after you stop to believe them, you no ever go back to the lie-lie things wey you believe before.—Phil. 3:13.

6. Why you fit dey sure say Jehovah “love wey no de fail de last forever”?

⁶ Just as you believe the things wey you first learn from Bible, na so you need to believe say Jehovah love you. When you de face problem and you de doubt if Jehovah love you, make you ask yourself say, ‘This thing wey I de think correct?’ Then compare how you de feel with wetin Bible talk for Psalm 136:1 wey be the Bible verse wey them take the topic of this article from. Just think-am, why Jehovah move the person wey write this book of Psalm to talk say Im “love no de fail”? Why them repeat the word “im love wey no de fail de last forever” 26 times for Psalm 136? As we don learn, the love wey Jehovah get for im people wey no de fail, dey part of the other things wey you first learn from Bible wey you really believe. So if you de feel say Jehovah no value you or say you dey useless, make you know say this one na big lie. Make you no ever believe this lie, just as you no go ever believe any lie-lie thing wey people de teach about Bible.

7. Give example of some Bible verse wey show say Jehovah really love you.

⁷ Bible still talk many other things wey show say Jehovah really love us. For example, Jesus tell im disciples say: “Una get value pass plenty sparrow.” (Matt. 10:31) Jehovah still tell people wey de worship-am say: “I go make you strong, yes I go help you. I go really hold you with my right hand wey de do wetin correct.” (Isa. 41:10) Notice say wetin Jesus and Jehovah talk really dey clear. Jesus no talk say ‘E fit be say una get value pass plenty sparrow,’ and Jehovah no talk say ‘maybe I go fit help you.’ Instead, them talk say: “Una get value pass plenty sparrow” and “I go help you.” If you de doubt whether Jehovah love you because you de face problem, this kind Bible verse fit help you correct the way you de feel and e fit even make you dey sure say Jehovah really love you. The things wey all this Bible verse de talk na true. If you pray to Jehovah about how you de feel, and you think deep about wetin all this Bible verse de talk, e go help you fit talk wetin dey 1 John 4:16. That place talk say: “We don know and believe say God love us.”a

8. Wetin you fit do if you still de doubt sometimes if Jehovah really love you?

⁸ Wetin you fit do if you still de doubt sometimes if Jehovah really love you? Make you compare how you de feel with wetin you know about Jehovah. Sometimes, the way we de feel fit no correct, but wetin Bible talk about the love wey Jehovah get for us na true. 1 John 4:8 talk say “God na love.” But if we no believe say Jehovah really love us, e just be like say we de talk say wetin dey that Bible verse na lie.

THINK DEEP ABOUT THE “STRONG LOVE” WEY JEHOVAH GET FOR YOU

9-10. Wetin Jesus de talk about when e tell im disciples say: “My Papa imself get strong love for una” as e dey for John 16:26, 27? (Still check the picture.)

⁹ We fit learn more things about the love wey Jehovah get for us if we think deep about wetin Jesus tell im disciples. E tell them say: “My Papa imself get strong love for una.” (Read John 16:​26, 27.) Jesus no talk this word just to make im disciples happy. When we read the other verses wey dey before this verse, we go see say Jesus no de talk about how im disciples de feel. Instead, Jesus de talk about prayer.

¹⁰ Before Jesus talk wetin dey verse 26 and 27, e tell im disciples say make them use im name pray, e no talk say make them pray to-am. (John 16:​23, 24) E dey important for the disciples to know this one. Why? Na because after Jesus don come back to life, the disciples fit want pray to Jesus. After all, Jesus na their friend. Them fit de think say, because Jesus love them, e go want listen to their prayer and beg im Papa to help them. But wetin Jesus tell them show say e no want make them think like that. E tell them say: “My Papa imself get strong love for una.” This thing wey Jesus talk na part of the first things wey we learn about prayer when we start to study Bible. Think how this one take affect you: As you de study Bible, you don know Jesus and you don love-am. (John 14:21) But like Jesus disciples you fit pray to God, and dey sure say e go hear your prayer because you know say Jehovah “imself get strong love” for you. You de show say you really believe this one everytime wey you de pray to Jehovah.—1 John 5:14.

KNOW WETIN DE MAKE YOU DOUBT JEHOVAH LOVE

11. Why Satan go happy if we start to doubt say Jehovah really love us?

¹¹ Wetin fit make us de doubt say Jehovah love us? You fit talk say na Satan de make us feel like this. If you talk like that, truth dey inside wetin you talk. Satan “de find person wey e go chop,” so e go happy if we de doubt say Jehovah really love us. (1 Pet. 5:8) Jehovah send Jesus to die for us because E love us. But Satan want make we feel say because of our sin, we no go fit gain from Jesus sacrifice. (Heb. 2:9) So if you de doubt whether Jehovah love you, na Satan go happy. And e go really happy too if we allow our problem make us tire and stop to serve Jehovah. Just think-am, Satan want make we feel say Jehovah no love us, but na im Jehovah no love. The truth be say, one of the main “traps” wey Satan de set for us, na to make us feel say Jehovah no love us and say e don condemn us. (Eph. 6:11) When we understand this thing wey Satan de try do, e go dey easy for us to ‘stand against-am.’—Jas. 4:7.

12-13. How the sin wey we get for body de make us doubt whether Jehovah love us?

¹² E still get another thing wey fit make us doubt if Jehovah really love us. Wetin be that? Na the sin wey dey our body. (Ps. 51:5; Rom. 5:12) The sin wey we inherit from Adam and Eve affect our friendship with Jehovah. E don still affect the way we de think, the way we de feel, and the way our body be.

¹³ Sin de affect the way person de feel for bad way. E de make mind judge person, de person overworry, de make person fear, and e de make person de shame. If we commit sin, we fit get this feelings. But we fit still de feel like this because of the sin wey we inherit, but no be like this Jehovah make us from the beginning. (Rom. 8:​20, 21) If motor tire don less, e no de fit move well. Na so we self be because of the sin wey dey our body. Sin no de make us fit live our life the way Jehovah create us to live. Because of this one, sometimes we de doubt whether Jehovah really love us. But if we de feel like this, make we remember say Jehovah na “the great and wonderful God . . . wey de show love wey no de fail to people wey love-am and de do wetin e talk.”—Neh. 1:5.

14. If we de think about Jesus sacrifice, how this one go help us dey sure say Jehovah love us? (Romans 5:8) (Still check the box “No Allow ‘the Power Wey Sin Get to Deceive’ You.”)

¹⁴ Sometimes we fit de feel say Jehovah no suppose show us love. And that one na true. Na because of this one make the love wey Jehovah de show us dey special to us. The truth be say, e no get anything wey we fit do to qualify to get Jehovah love. But because Jehovah love us, e send Jesus to die for us so that e go fit forgive our sin. (1 John 4:10) No forget say na sinners Jesus come save no be perfect people. (Read Romans 5:8.) Nobody wey get sin for body go fit do the correct thing everytime, and Jehovah no even expect this one from us. If we understand say the sin wey we get for body fit de make us doubt whether Jehovah love us, this one go help us fit fight the way sin de make us think.—Rom. 7:​24, 25.

CONTINUE TO HOLD JEHOVAH TIGHT

15-16. If we continue to hold Jehovah tight, wetin we fit dey sure of, and why? (2 Samuel 22:26)

¹⁵ Jehovah want make we continue to de do the correct thing, and e want make we ‘hold-am tight.’ (Deut. 30:​19, 20) If we do like this, we dey sure say Jehovah no go leave us. (Read 2 Samuel 22:26.) If we continue to do our part, we dey sure say Jehovah go help us endure any problem.

¹⁶ As we don learn, we get plenty things wey suppose make our mind come down when we de face problem. We know say Jehovah really love us and say e no go leave us. This one na wetin Bible teach. If we de doubt for our mind whether Jehovah love us, make we no put mind for how we de feel, instead, make we think deep about the things wey we know about the love wey Jehovah get for us. Make we continue to dey sure say the love wey Jehovah get for us wey no de fail, de last forever.