Dey Sure Say Jehovah Don Forgive You

1-2. How we de feel when we dey sure say Jehovah don forgive us for the sin wey we commit? (Still check the picture .)

KING David know how e de pain person if e remember the sins wey e don commit for past. (Ps. 40:12; 51:3; superscription) David make some serious mistakes for im life. But e repent and Jehovah forgive-am. (2 Sam. 12:13) When David see say Jehovah don forgive-am, this one make-am happy.—Ps. 32:1.

² Like David, we too fit dey happy if we dey sure say Jehovah don forgive us. E de make our mind come down when we know say even if we commit serious sin, Jehovah fit forgive us if we repent, pray, go meet the elders, and do our best so that we no go make the same mistake again. (Prov. 28:13; Acts 26:20; 1 John 1:9) And e de make us happy well-well to know say when Jehovah forgive us, e no go ever punish us again because of that sin.—Ezek. 33:16.

3-4. How Sister Jennifer feel after e don baptize, and wetin we go talk about for this article?

³ Sometimes, we fit de feel say Jehovah never really forgive us for the sin wey we commit. Make we see the example of Sister Jennifer wey grow for family wey im papa and mama na Jehovah Witness. When e dey young, e start to do bad things and e de hide-am from im papa and mama. But after some years, e stop to de do the bad things wey e de do, give im life to Jehovah, and e baptize. Sister Jennifer talk say: “Before I baptize, I de do sex wey no clean, de overdrink, de quick vex, and na money dey important pass for my life. For my mind, I know say as I don pray to beg Jehovah say make e forgive me and I don repent, Jehovah go fit forgive me because of Jesus sacrifice. But e hard me to really believe say Jehovah don forgive me.”

⁴ E de hard you sometimes to believe say Jehovah don forgive the sins wey you commit for past? If na so, remember say Jehovah de show pity. David know this one, and this one make-am dey sure say Jehovah don forgive-am. Like David, Jehovah want make we dey sure say e don forgive us and this one go make us happy. For this article, we go talk about why e dey important for us to dey sure say Jehovah don forgive us and wetin fit help us do this one.

WHY E DEY IMPORTANT FOR US TO DEY SURE SAY JEHOVAH DON FORGIVE US?

5. Wetin Satan want make we believe? Give example.

⁵ If we really believe say Jehovah love us and say e don forgive us, this one go make us no fall for one of Satan trap. Satan want make we stop to worship Jehovah. So e ready to do everything wey e fit do to make this one happen. For example, e fit make us feel say our sin dey serious sotey Jehovah no fit forgive us. Think about the example of the man for Corinth wey do sex wey no clean, wey them remove from congregation. (1 Cor. 5:1, 5, 13) Later, the man repent and them bring-am back for congregation. But Satan want make the brothers and sisters no forgive the man and welcome-am back. And if them no forgive-am, Satan want make e feel say Jehovah no go ever fit forgive-am, and this one fit make-am stop to worship Jehovah. Satan want make the man stop to worship Jehovah, and na the same thing e want for all of us today. But we no de fear because “we know the different-different style wey e de use.”—2 Cor. 2:​5-11.

6. Wetin fit help us stop to de feel bad because of the sin wey we don commit for past?

⁶ If we dey sure say Jehovah don forgive us, this one go make us dey happy again. When we commit sin, e de make us sad. (Ps. 51:17) Na good thing to feel like this because this one fit make us to change and do the correct thing. (2 Cor. 7:​10, 11) But if we continue to dey sad for long time even after we don repent, this one fit make us stop to serve Jehovah. When we dey sure say Jehovah don forgive us, this one fit make us stop to de feel bad. Then we go fit continue to serve Jehovah with clean conscience and we go happy again. (Col. 1:​10, 11; 2 Tim. 1:3) But wetin fit help us dey sure say Jehovah don really forgive us?

WETIN FIT HELP US DEY SURE SAY JEHOVAH DON FORGIVE US?

7-8. How Jehovah describe imself to Moses, and wetin this one make us dey sure of? (Exodus 34:6, 7)

⁷ Think about wetin Jehovah don talk about imself. For example, see wetin Jehovah tell Moses for Mount Sinai.a (Read Exodus 34:6, 7.) Even though say Jehovah get many better-better character, e tell Moses say e be “God wey de show pity and wey get strong feeling to help.” So think about-am, if person repent, this kind God no go forgive-am? If Jehovah no forgive, e go mean say e wicked and say e no de show pity. Jehovah no fit ever be like that.

⁸ We dey sure say Jehovah de talk the truth when e talk say e be God wey de show pity. E no de ever lie. (Ps. 31:5) So we fit believe wetin e talk. If e de hard you to believe say Jehovah don really forgive you, ask yourself say: ‘I believe say Jehovah na God wey de show pity, and say e ready to forgive anybody wey really repent?’ If you believe this one, dey sure say Jehovah don forgive you.

9. Wetin e mean when we talk say Jehovah don forgive us? (Psalm 32:5)

⁹ Think about wetin Jehovah teach us for Bible about how e de forgive. For example, make we see wetin David talk about the way Jehovah de forgive. (Read Psalm 32:5.) David talk say: “You forgive my sins.” The Hebrew word wey them translate as forgive for this verse mean to “take something comot” or “carry something comot.” As David de feel bad because of im sin, e just be like say e carry one heavy load. So when Jehovah forgive David, David feel-am say Jehovah don help-am carry im heavy load comot. This one make David mind come down because e know say Jehovah don forgive-am. (Ps. 32:​2-4) We too fit feel like this. If we commit sin and we don repent, we no need to continue to feel bad for wetin we don do because Jehovah don forgive us and e don carry the sin comot.

10-11. When Bible tell us say Jehovah “ready to forgive,” wetin this one de teach us about Jehovah? (Psalm 86:5)

¹⁰ Read Psalm 86:5. For this verse, David talk say Jehovah “ready to forgive.” When one book de talk about this verse, e talk say: “Jehovah na God wey de ‘always forgive’—na the kind God wey e be.” Why e be say Jehovah de always ready to forgive? The next part of that verse answer this question. E talk say: “Your love no de fail for people wey put their heart for you.” As we learn for the article before this one, Jehovah no de ever leave im servants wey de worship-am well because of im love wey no de fail. So if them commit sin and them repent, Jehovah go continue to show them im love wey no de fail and e go forgive them kpatakpata. (Isa. 55:7.) So, if e de hard you to believe say Jehovah don forgive you, you fit ask yourself say: ‘I believe say Jehovah na God wey ready to forgive everybody wey beg-am for prayer and really repent? So why I no go believe say e don forgive me as I don repent and beg-am make e forgive and pity me?’

¹¹ Bible still help us know say Jehovah understand say because we get sin for body, this one de affect us sometimes. E de really make our mind come down if we think about this one. (Ps. 139:1, 2) In fact, wetin David talk for another place for the book of Psalms make this one clear and this one fit help us dey sure say Jehovah ready to forgive us.

NO FORGET WETIN JEHOVAH DE REMEMBER

12-13. As Psalm 103:14 talk, wetin Jehovah de remember about us, and wetin this one de move-am to do?

¹² Read Psalm 103:14. David talk say Jehovah de “remember say we be dust.” This thing wey David talk de show one reason why Jehovah always ready to forgive any of im servant wey really repent. Jehovah really know say we get sin for body. But to understand this one well, make we see wetin this word wey David talk really mean.

¹³ David talk say Jehovah “really know the way our body be.” Jehovah make Adam “from the sand wey dey ground.” Jehovah understand say because Adam na dust or sand, e need to do some things to fit dey alive. E need to chop, sleep, and breathe. (Gen. 2:7) But when Adam and Eve sin, human being come be dust for another way, we come get sin for body, we no dey perfect, and we fit make mistake. Because we be Adam and Eve children, we de struggle to do wetin correct many times. Jehovah no only know say we get sin for body, but David talk say e de “remember” say we get sin for body. The Hebrew word wey David use for that verse fit mean to do something to help other people. So wetin David de talk for this verse be say, Jehovah understand say we go make mistake sometimes and because of this one, when we repent e de forgive us and show us pity.—Ps. 78:​38, 39.

14. (a) Which other thing David talk about the way Jehovah de forgive us? (Psalm 103:12) (b) Wetin we learn about the way Jehovah forgive David? (Check the box “How Jehovah De Forgive and Forget.”)

¹⁴ Wetin be another thing wey we fit learn from Psalm 103 about the way Jehovah de forgive us? (Read Psalm 103:12.) David talk say when Jehovah forgive us, E de put our sin far from where we dey. E just be like say e de put our sin for where “sun de come out” and we dey where “sun de go down,” and this two place no de ever meet, because them really dey far from each other. Wetin this one de tell us about how Jehovah de forgive? One book wey explain this verse talk say: “As God de put our sin far from where we dey, e mean say e de comot everything about the sin wey go fit make-am remember the sin.” Jehovah no de leave anything wey go make-am remember our sin again, and e no de remind us of our sin or punish us for sin wey e don forgive before.—Ezek. 18:​21, 22; Acts 3:19.

15. Wetin we fit do if the sin wey we commit for past still de worry us for mind?

¹⁵ How wetin David talk for Psalm 103 fit help you if e de hard you to believe say Jehovah don forgive you? If the sin wey you commit for past still de worry you for mind, make you ask yourself say: “I de forget wetin Jehovah remember?” Wetin Jehovah de remember be say, we no dey perfect. And e go forgive anybody wey repent. You still need to ask yourself say: “I de remember wetin Jehovah don decide to forget?” Jehovah no de remember any sin wey e don forgive, and e no go punish us for sin wey e don forgive. Jehovah no de continue to think about the sins wey we don commit for past, and we self no suppose de think about them too. (Ps. 130:3) If we really believe say Jehovah don forgive us, we go fit forgive ourself and continue to dey happy as we de worship Jehovah.

16. Give example wey show say e no good for us to continue to worry about sin wey Jehovah don forgive. (Still check the picture.)

¹⁶ Think of this example. If we continue to think about the sins wey we commit for past, e just be like say person de drive motor, but na only the mirror wey de show wetin de happen for back e just de look. The truth be say, e good to de look back sometimes so that e go see if any danger dey im back, but if na only back e just de look, e fit get accident. So e need to put eye for front if e want reach where e de go. Na so e still be with the mistake wey we don make for past. E no bad to think about them sometimes, because this one fit help us no make the same mistake again. But if we always de think about sin wey Jehovah don forgive, we go stop to de happy and we no go fit do more for Jehovah work. E go better if we continue to put mind for wetin we fit do for Jehovah work and continue to think about the better future wey e don promise. For that time, we “no go remember” anything wey we don do before wey go worry us for mind.—Isa. 65:17; Prov. 4:25.

CONTINUE TO BELIEVE FOR YOUR HEART

17. Why we need to continue to believe say Jehovah love us and say e don forgive us?

¹⁷ We need to continue to believe for our heart say Jehovah love us and say e don forgive us. (1 John 3:​19, ftn.) Why? Na because Satan no de rest. E go continue to try to make us feel say Jehovah no fit love us and say e never forgive us. Satan de do like this so that we go stop to serve Jehovah. Satan go continue to do this one more and more because e know say im time dey short. (Rev. 12:12) But make we no ever gree for Satan!

18. Wetin you fit do to fit dey sure say Jehovah love you and say e don forgive you?

¹⁸ The article before this one show us wetin we need to do to dey sure say Jehovah really love us. To fit dey sure say Jehovah don forgive you, remember the way Jehovah describe imself for Bible. Think deep about the things wey Bible talk about the way Jehovah de forgive us. No forget say Jehovah know say you no dey perfect and e ready to forgive you and show you pity. And remember say when Jehovah forgive, e de forgive kpatakpata. Then you go fit dey happy because you dey sure say Jehovah don forgive you, and like David, you fit talk say: “Thank you Jehovah because you ‘forgive my sins’!”—Ps. 32:5.