How We De Gain as Jehovah De Forgive Us?

1. Why e hard to know wetin person really mean when e talk say e don forgive you?

“I DON FORGIVE YOU.” If person tell you this word, e go really make your mind come down, especially if you don talk or do wetin really pain the person. But wetin e really mean when person talk say, “I don forgive you”? The person mean say una fit be friend again? Or e de talk say e no want talk about the matter again? People mean different-different things when them tell person say them don forgive-am.

2. How Bible describe the way Jehovah de forgive? (Still check the footnote.)

² The way Jehovah de forgive us really different from the way we de forgive people wey offend us. Nobody fit forgive like Jehovah. The person wey write Psalm 130, write about Jehovah say: “Na you de forgive finish, and na this one de make people respect you.”a (Ps. 130:4) True-true, when Jehovah forgive person, e de forgive-am finish. Na Jehovah de show us wetin e really mean to forgive person. For some verse them for the part of Bible wey them use Hebrew language write, the word wey them use describe the way Jehovah de forgive, different from the word wey them use describe the way people de forgive.

3. How the way Jehovah de forgive us dey different from the way we de forgive other people? (Isaiah 55:6, 7)

³ When Jehovah forgive person, e don wipe the sin comot. And the person go be Jehovah friend again just like before. We really happy say when Jehovah forgive us, e de forgive us finish and e always ready to forgive us.—Read Isaiah 55:6, 7.

4. How Jehovah help us understand the way e de forgive?

⁴ If the way Jehovah de forgive us different from how we de forgive people wey offend us, wetin go help us fit understand wetin e really mean for Jehovah to forgive person? Jehovah use some better-better example help us understand how e de forgive us. We go talk about some of them for this article. This examples go show us say when we repent, Jehovah de remove our sin and make us im friend again. As we de talk about this examples, e go help us love Jehovah more because e de forgive us for many way.

JEHOVAH DE REMOVE OUR SIN

5. Wetin de happen when Jehovah forgive us?

⁵ Sometimes for Bible, them de describe sin as heavy load. King David talk about im own sin say: “My [sin] dey ontop my head; like heavy load, them don too much for me to carry.” (Ps. 38:4) But Jehovah de forgive person wey sin if e repent. (Ps. 25:18; 32:5) The Hebrew word wey them translate as “forgive” for this verse mean to “carry” or “lift something up.” So when Jehovah forgive us, e de remove the sin wey be like heavy load wey we carry. E just be like say e carry the heavy load comot from our head.

6. From wetin dey Psalm 103:​12, wetin Jehovah de do to our sin when e forgive us?

⁶ Bible use another example show us say when Jehovah forgive us, e de carry our sin far from us. Psalm 103:12 talk say: “As the place wey sun de come out far from where sun de go down, na so e don put our [sin] far from us.” Sun de come out for east and de go down for west. The two place far from each other well-well. Sun no go ever fit come out and go down for the same place, and for the same time. This one mean say when Jehovah forgive us, e de comot our sin far well-well from us. This one de really make our mind come down say Jehovah de forgive us finish!

7. How Micah 7:​18, 19 take describe wetin Jehovah de do to our sin when e forgive us?

⁷ Even though say Jehovah de carry our sin far from us, e de continue to keep them? No. King Hezekiah talk about Jehovah say: “You don throw all my sin for your back.” (Isa. 38:9, 17.) This one mean say when person repent, Jehovah de troway the person sin and e no de think about-am again. We fit still talk wetin King Hezekiah talk like this: “You don make-am be like say I no commit the sin.” Bible use another example take make this point clear more. The example dey Micah 7:​18, 19. (Read-am.) That place talk say Jehovah de throw our sin for bottom of the sea. For Bible time, e no dey possible for person to fit bring wetin them throw for bottom of the sea.

8. Wetin we don learn?

⁸ From the example wey we don talk about, e dey clear say when Jehovah forgive us, e de remove our sin kpatakpata. So the sin no need to de worry our mind again. Wetin David talk na true, e talk say: “People wey de do bad wey God don forgive and wey e don cover their [sin] go happy; the person wey Jehovah no go hold for im sin again go happy.” (Rom. 4:7, 8) This na wetin e really mean to forgive finish!

JEHOVAH DE WIPE OUR SIN COMOT

9. Which example Jehovah use show us say e de forgive finish?

⁹ Jehovah use another example help us see how e de use Jesus sacrifice wipe our sin comot if we repent. Bible talk say Jehovah de wash and rinse our sin comot. This one go make us dey clean for Jehovah eye. (Ps. 51:7; Isa. 4:4; Jer. 33:8) Jehovah describe wetin de happen when e wash person sin comot, e talk say: “Even if una sin be like red color, I go make-am white like snow; and even if e be like red cloth, I go make-am white like wool.” (Isa. 1:18) E go hard well-well to fit wash white cloth wey them stain with red color, to make-am white again. Jehovah use this example show us say no matter how our sin be, e go fit wash-am comot sotey the sin no go de show again.

10. How Bible show say Jehovah de open hand forgive us?

¹⁰ As we don talk for the article before this one, sin just be like when we de owe person money. (Matt. 6:12; Luke 11:4) So anytime wey we sin, e just be like say we de add join the money wey we de owe Jehovah. We de owe Jehovah “big money!” But when e forgive us, e just be like say e cancel all the money wey we de owe-am. E no de hold us again for sin wey e don forgive us. Just as person mind de come down when them cancel the money wey e de owe, na so e de make our mind come down when Jehovah forgive us!

11. Wetin Bible mean when e talk say Jehovah de wipe our sin comot? (Acts 3:19)

¹¹ Jehovah no de just cancel wetin we de owe-am, but e de wipe them comot. (Read Acts 3:19.) If them cancel the money wey person de owe, them fit write one big cancel mark (X) for the paper wey them write the amount put, to show say them cancel-am. But person fit still see the amount for the paper even though say them don cancel-am. But to wipe something comot dey different. To understand this example, we need to remember say the kind ink wey them de use write for Bible time, na the type wey person fit wipe comot. Person fit use wet rag wipe the thing wey e don write comot. So when them wipe wetin person de owe comot, nobody de see-am again. E go come be like say the person no ever owe the money before. E de really make us happy say Jehovah de cancel our sin, and still wipe them comot kpatakpata!—Ps. 51:9.

12. Wetin we learn from the example of the thick cloud?

¹² Jehovah use another example show how e de wipe our sin comot. E use the example wey resemble the one wey we don talk about before. E talk say: “I go wipe your [sin] comot just like say cloud cover-am, and I go wipe your sin comot like say thick cloud cover-am.” (Isa. 44:22) When Jehovah forgive us, e just be like say e de use thick cloud cover our sin make e no see-am again.

13. Wetin we fit learn from all this example?

¹³ Wetin we fit learn from all this example? When Jehovah forgive us, make we no allow the bad thing wey we do continue to worry us. Jehovah don use the blood of im Son cancel our sin kpatakpata. So when Jehovah forgive us for the sin wey we commit, e go just be like say we no ever commit the sin. This na how Jehovah de forgive person wey repent.

JEHOVAH DE ACCEPT US TO BE IM TIGHT FRIEND AGAIN

14. Why we fit trust Jehovah say when e forgive us, e de forgive us finish? (Still check the picture.)

¹⁴ When Jehovah forgive us, we dey sure say we go fit be im friend again. That one de make our mind come down and help us stop to de worry. We no need to de fear say Jehovah still de vex for us and say e go still punish us for the sin. Jehovah no go ever do like that. When Jehovah talk say e don forgive us, we fit trust-am. Why? Jehovah tell prophet Jeremiah say: “I go forgive them for the bad things wey them do and I no go remember their sin again.” (Jer. 31:34) Apostle Paul quote wetin Jehovah tell prophet Jeremiah, e say: “I no go remember their [sin] again.” (Heb. 8:12) But wetin this one really mean?

15. Wetin Jehovah mean when e talk say e no go remember our sin again?

¹⁵ For Bible, the word “remember” no de always mean say person de think about something wey don happen before. But e fit mean say somebody need to do something. Think about wetin the thief wey them nail for pole near Jesus tell-am. E talk say: “Jesus, remember me when you don enter your Kingdom.” (Luke 23:​42, 43) The man de tell Jesus say make e bring-am back to life when e don enter im Kingdom. No wonder Jesus tell-am say e go bring-am back to life. So when Jehovah talk say e no go remember our sin again, e mean say Jehovah no go punish us for future after e don forgive us.

16. Which example Bible use help us understand the freedom wey we de enjoy when Jehovah forgive us?

¹⁶ Bible use another example help us understand the freedom wey we de enjoy when Jehovah forgive us. E talk say because we get sin for body, we be “[slave] of sin.” But when Jehovah forgive us, we go be like slave wey them don ‘free from sin.’ (Rom. 6:​17, 18; Rev. 1:5) When we know say Jehovah don forgive us, e go make us happy like slave wey them don free.

17. When Jehovah forgive us, how e take be like when them heal person from bad sickness? (Isaiah 53:5)

¹⁷ Read Isaiah 53:5. The last example wey we go talk about, compare us to people wey get serious sickness wey de kill. But because Jehovah send Jesus to die for our sin, Jehovah don heal us. (1 Pet. 2:24) When we sin, we don spoil our friendship with Jehovah. But because of Jesus sacrifice, Jehovah fit forgive us and we fit get tight friendship with-am again. Just as person wey them heal from bad sickness de happy, na so we de happy when Jehovah forgive us and allow us to become im friend again.

HOW WE DE GAIN AS JEHOVAH DE FORGIVE US?

18. Wetin we don learn from all the example wey show how Jehovah de forgive us? (Still check the box, “How Jehovah De Forgive Us.”)

¹⁸ Wetin we don learn from all the example wey show how Jehovah de forgive us? When Jehovah forgive us for the sin wey we commit, e go just be like say we no ever commit the sin, and we fit dey sure say e no go use-am punish us for future. This one de help us fit enjoy better friendship with our Papa for heaven. But we no want forget say Jehovah de forgive us because e love us and e de show us im special favor. This one no be because say we don do something wey mean say e must forgive us.—Rom. 3:24.

19. (a) Wetin we suppose de thank Jehovah for? (Romans 4:8) (b) Wetin we go talk about for the next article?

¹⁹ Read Romans 4:8. We really happy say Jehovah de forgive us finish! (Ps. 130:4) But if we want make Jehovah forgive us, we must do something wey dey important well-well. Jesus talk say: “If una no forgive people their sin, una Papa no go forgive una sin too.” (Matt. 6:​14, 15) So we must copy Jehovah example and de forgive people wey offend us. But how we fit do this one? The next article go tell us.