Why We Value-Am Say Jehovah De Forgive Us?

1-2. How our condition take be like the young man own wey paragraph 1 talk about?

THINK about one young man wey im papa and mama get money well-well. But one day, im papa and mama get accident and die. This one na really bad news. To make things bad more, e hear say im papa and mama don spend all the money wey them get and even borrow full everywhere. Now, instead make e inherit the plenty money wey e be think say im papa and mama get, na how to pay the plenty money wey im papa and mama owe e de think about. And people wey im papa and mama de owe de draw-am say make e come pay. But the money wey im papa and mama de owe pass im power to pay back.

² Somehow, our condition be like this young man own. Adam and Eve wey be our first papa and mama, be dey perfect and de live for garden of Eden wey be Paradise. (Gen. 1:27; 2:​7-9) Them for live and enjoy life forever. But them sin and everything come change. Jehovah comot them from garden of Eden and them no fit live forever again. Wetin come remain for their children? Bible talk say: “One man [Adam] make sin enter the world and death come because of sin, and so death spread to everybody because all of them don sin.” (Rom. 5:12) Na sin we inherit from Adam, and na the sin de make us die. This sin wey we inherit from Adam just be like big money wey pass our power to pay.—Ps. 49:8.

3. Why sin be like money wey person “de owe”?

³ Jesus compare sin to money wey person “de owe.” (Matt. 6:12; Luke 11:4) When we sin, e just be like say we de owe Jehovah. And we must pay Jehovah wetin we de owe-am. If Jehovah no help us, na our life we go use pay and we no go get hope to live again.—Rom. 6:7, 23.

4. (a) If to say Jehovah no help us, wetin for happen to all of us? (Psalm 49:​7-9) (b) Wetin “sin” mean for Bible? (Check the box, “Sin.”)

⁴ E dey possible for us to get wetin Adam and Eve lost by ourself? No! (Read Psalm 49:​7-9.) If Jehovah no help us, we no go get hope say we go live for Paradise for future, or say God go bring us back to life if we die. The truth be say we for just be like animals wey no get hope to come back to life again when them die.—Eccl. 3:19; 2 Pet. 2:12.

5. How our Papa for heaven help us pay for the sin wey we inherit from Adam? (Check the picture .)

⁵ Think about the young man wey we talk about for the beginning of this article. How you think say e go feel, if one rich man talk say e go help-am pay all the money wey im papa and mama de owe people wey them die leave for-am to pay? The truth be say, e go gree make the man help-am and e go really happy. For the same way, our Papa wey be Jehovah don give us one gift wey pay for the sin wey we get from Adam. See the way Jesus talk about-am, e say: “God love the world well-well, na im make e give im special Son, so that anybody wey show say e de put faith for-am, them no go destroy-am, but e go get life wey no go end.” (John 3:16) Another thing be say, this gift make-am dey possible for us to get friendship with Jehovah.

6. Wetin we go talk about for this article, and why?

⁶ How we de gain from this better gift and how this gift don make-am possible for God to forgive our sin? To answer this question, we go talk about some word for Bible wey concern this matter and wetin them mean. For this article, we go talk about them one by one. As we de think deep about wetin Jehovah don do to forgive us, e go make us value-am more.

JEHOVAH WANT MAKE WE BE IM FRIEND

7. (a) Which other thing Adam and Eve lost? (b) Wetin we need as we be Adam and Eve children? (Romans 5:​10, 11)

⁷ When Adam and Eve sin, no be only say them no fit live forever again, the sin still make them become Jehovah enemy. Before Adam and Eve sin, them be dey part of Jehovah family. (Luke 3:38) But when them disobey Jehovah, e no allow them dey for im family again. This one happen before them start to born children. (Gen. 3:​23, 24; 4:1) Because of this one, nobody among Adam and Eve children go fit be part of Jehovah family. So we need help to fit get good friendship with Jehovah. (Read Romans 5:​10, 11.) We need to become Jehovah friend, and stop to be im enemy. The sweet thing be say na Jehovah make this one fit dey possible. How?

JEHOVAH MAKE-AM POSSIBLE FOR US TO BE IM FRIEND

8. Wetin Jehovah provide, and wetin this one allow us fit do?

⁸ Jehovah arrange wetin go make-am possible for us to become im friend. How? E arrange make we get wetin Adam lost back. Jehovah do this one when e provide something wey get the same value with wetin Adam lost. Bible tell us wetin Jehovah don do to make-am possible for us to be im friend.—Rom. 3:25.

9. Wetin Jehovah do to fit forgive Israel people sin?

⁹ For Israel people to fit get better friendship with Jehovah, e arrange wetin go make-am possible for-am to fit forgive their sin. Israel people de do one special celebration one day every year. Them de call-am Atonement Day. That day, the high priest de sacrifice animal for the people sin. The truth be say, animal sacrifice no go fit clean their sin comot kpatakpata because animal life no get value reach human being own. But if Israel person wey repent with all im heart do the sacrifice wey the Law say make them de do, Jehovah ready to forgive-am. (Heb. 10:​1-4) The sacrifice wey Israel people de do for Atonement Day and for other times, help them really see say them be sinners and say them need wetin go fit remove their sin kpatakpata.

10. Wetin Jehovah do so that e go fit forgive our sin kpatakpata?

¹⁰ Wetin Jehovah do to make-am possible for-am to fit forgive our sin kpatakpata? E arrange make im Son “give imself as sacrifice once and for all to carry the [sin] of plenty people.” (Heb. 9:28) Jesus “give im life as price to free many people.” (Matt. 20:28) How e take do this one?

JESUS DIE TO PAY FOR WETIN ADAM LOST

11. (a) Why person need to pay for our sin? (b) Which kind person fit pay for our sin?

¹¹ Bible help us understand say, Jehovah decide say somebody go need to pay the price for wetin Adam and Eve lost so that e go fit forgive our sin, and we go fit be im friend. So wetin be the price wey the person need to pay for wetin Adam and Eve lost? Remember say Adam and Eve lost their perfect life, and them no fit live forever again. So the price go be the same value of wetin Adam lost. (1 Tim. 2:6) The kind person wey go fit pay this price na mature man wey (1) dey perfect; (2) wey go fit live forever for this earth; and (3) wey ready to give that im life for us. Na only this one go make-am fit pay for wetin Adam lost.

12. Why Jesus fit pay to get wetin Adam lost back?

¹² Make we talk about three reason why Jesus fit pay to get wetin Adam lost back. (1) E dey perfect—“e no sin at all.” (1 Pet. 2:22) (2) Because of that one, e for fit live forever for this earth. (3) E ready to die and sacrifice that life for us. (Heb. 10:9, 10) Since Jesus na perfect man, im life get the same value wey Adam life get before Adam sin. (1 Cor. 15:45) So as Jesus die for us, e pay the exact or correct price of wetin Adam lost. (Rom. 5:19) Na this one make Jesus be “the last Adam.” This one mean say we no need another perfect person to come pay for wetin Adam lost again. Jesus die “once and for all.”—Heb. 7:27; 10:12.

13. Wetin make-am possible for us to fit get better friendship with Jehovah?

¹³ Wetin make-am possible for us to fit get better friendship with Jehovah? Na because Jehovah provide wetin go make-am dey possible for-am to forgive us. Jesus sacrifice im perfect life to pay the exact or correct price for our sin.—Eph. 1:7; Heb. 9:14.

JEHOVAH FREE US FROM SIN AND DEATH, AND TALK SAY WE DON DEY RIGHTEOUS

14. Wetin we go talk about now, and why?

¹⁴ Wetin we gain from the things wey Jehovah do for us? To fit answer this question, we go talk about two things for Bible wey help us understand how we de gain as Jehovah de forgive us. And this one go help us see how e take affect each of us.

15-16. (a) Wetin we gain as Jesus use im life pay for our sin? (b) How we de feel as Jehovah and Jesus free us from sin and death?

¹⁵ Bible talk say na because of the sacrifice of Jesus make Jehovah free us from sin and death. See the way apostle Peter talk about-am, e say: “Una know say no be things wey de spoil like silver or gold them use free una [for Greek na, “use pay the price to free una; use release una”] from the useless life wey una be de live just as una papa-papa them teach una. But them free una with the precious blood of Christ wey be like the blood of lamb wey no get any mark or stain.”—1 Pet. 1:​18, 19; ftn.

¹⁶ Because of Jesus sacrifice, we don free from sin and death wey de make us suffer. (Rom. 5:21) Na the precious blood of Jesus make this one possible. We de happy no be small, and we de thank Jehovah and Jesus as them make-am possible for us to dey free.—1 Cor. 15:22.

17-18. (a) Wetin e mean for Jehovah to talk say we dey righteous? (b) How we de gain as Jehovah talk say we dey righteous?

¹⁷ Bible talk say God don talk say im servants dey righteous. This one mean say we no go use our life pay for our sin. As Jehovah talk this one, e no mean say e change how e de see wetin correct. And no be because of wetin we de do make Jehovah talk say we dey righteous, and e no still mean say Jehovah like-am as we de sin. Instead, e show say Jehovah ready to forgive our sin because we put faith for wetin im and Jesus do to pay for our sin.—Rom. 3:24; Gal. 2:16.

¹⁸ How we de gain as Jehovah talk say we dey righteous? Among the people wey God talk say them dey righteous, e choose some of them to rule with Jesus for heaven and them don become children of God. (Titus 3:7; 1 John 3:1) Jehovah don forgive their sin. E just be like say them never ever commit sin, so them qualify to dey for the Kingdom. (Rom. 8:1, 2, 30) The rest people wey Jehovah talk say them dey righteous go live forever for this earth. Jehovah don forgive their sin, and them don become im friend. (Jas. 2:​21-23) The plenty-plenty people wey go survive Armageddon get the hope say them no go ever die. (John 11:26) God go bring “people wey do the correct thing for [im] eye and people wey no do the correct thing for [im] eye,” back to life. (Acts 24:15; John 5:​28, 29) For the end, everybody wey worship Jehovah well wey go live forever for this earth “go get the wonderful freedom of the children of God.” (Rom. 8:21) E de hungry us to see the time wey we go be perfect children of our Papa Jehovah!

19. How our condition don take change because of wetin Jehovah and Jesus do for us? (Still check the box, “How We Take Gain?”)

¹⁹ Before, our condition just be like the young man own wey we talk about for the beginning of this article, wey need to suffer to pay the plenty money wey im papa and mama de owe people before them die, and e no go ever fit pay-am finish. But we thank Jehovah say e help us. Our condition don better because Jehovah provide wetin make-am dey possible for-am to fit forgive us and Jesus use im life pay for wetin Adam lost. Our faith for Jesus sacrifice free us from sin and death. So when Jehovah forgive us, e go just be like say we no ever commit the sin. The one wey dey important pass be say, now, we go fit enjoy better friendship with Jehovah wey be our Papa for heaven.

20. Wetin we go talk about for the next article?

²⁰ E de really make us happy when we think deep about all the things wey Jehovah and Jesus don do for us. (2 Cor. 5:15) If to say them no help us, we for no get hope at all! For the next article, we go talk about different-different example wey Bible use help us see say when Jehovah forgive us for the bad thing wey we do, we no need to continue to worry about-am again.