As Weather De Hot More-More for the Whole World—Wetin Bible Talk About This One?

For July 2022, plenty country for the whole world talk as weather really hot for their area:

• For the second time this month, government for China de warn people say weather for about 70 cities go really hot.”—July 25, 2022, CNN Wire Service.

• As weather de hot more-more for Europe, na so forest continue to de burn for plenty countries.”—July 17, 2022, The Guardian.

• For Sunday, weather for plenty cities for America hot pass as e de be before as the heat wey de blow for summer spread go East Coast and part of South and Midwest.”—July 24, 2022, The New York Times.

Wetin all this one mean? Time de come wey we no go fit stay for this earth again? Wetin Bible talk about this one?

Bible talk-am say weather go de hot as we de see today?

Yes. The way weather de over-hot for the whole earth today agree with wetin Bible don talk say go happen for this our time. For example, Jesus talk say for this our time, “people go de see things wey go make them fear” or “strange things wey go put fear for person body.” (Luke 21:11; Good News Translation) As the weather de hot more-more, plenty people don de fear say time de come wey we no go fit stay for this earth again because of wetin people de do.

Time de come when people no go fit stay for this earth again?

No. God make this earth for people to live forever. (Psalm 115:16; Ecclesiastes 1:4) E no go allow people to destroy this earth. Instead, e go “destroy people wey de destroy the earth” as e don promise. —Revelation 11:18.

Make we see two things wey God don promise say e go do for this earth:

• “Wilderness and dry land go dey glad, and desert go happy and fine like saffron.” (Isaiah 35:1) God no go allow make the earth become where people no go fit stay, instead, e go repair all the part wey people don spoil.

• “You take care of the earth, you make-am produce plenty fruit and make the soil very good.” (Psalm 65:9) God go turn this earth to paradise.

If you want learn more about how the change for weather de fulfill wetin Bible don talk, read the article “Climate Change and Our Future—What the Bible Says.”

To learn about the promise for Bible say God go repair this earth, check the article “Who Will Save the Earth?”