Shooting Wey De Happen for Different-Different Part for the World—Wetin Bible Talk?

For the month of July 2022, shooting wey happen for different parts of the world really shock people:

• “As they kill one popular politician wey e name na Shinzo Abe for Japan (e be Japan former Prime Minister), this one make people for the country really vex and e shock the whole world, especially as this kind thing no too de happen before and as Japan get law wey no de allow people carry gun anyhow.”—July 10, 2022, The Japan Times.

• “E shock people for Denmark to see as one person use gun kill three people for where them de sell things for Copenhagen.”—July 4, 2022, Reuters.

• “For South Africa, some men start to shoot gun and kill 15 people for one bar wey dey Soweto town.”—July 10, 2022, The Guardian.

• “For the holiday weekend of July 4, e pass 220 people wey them shoot and kill for America.”—July 5, 2022, CBS News.

We fit believe say this kind wicked thing go end? Wetin Bible talk?

Wicked Things Wey De Hppen Today Go End

Bible talk about the time wey we de live now. E call-am “last days,” time wey people go wicked finish. (2 Timothy 3:1, 3) The kind wicked things wey people de do de make other people fear. (Luke 21:11) But Bible don promise say time de come when wicked things no go dey again and say “people go stay for place wey peace dey, for place wey problem no dey, and place wey they go get rest of mind.” (Isaiah 32:18) How fight-fight and other wicked things go end?

God go comot wicked people and destroy all the things wey them de use fight.

• “But for the wicked, they go cut them comot from the earth.”—Proverbs 2:22.

• “[God] de end all war for the whole earth. E de break the bow and scatter the spear; e de use fire burn the wagon wey them de use for fight.”—Psalm 46:9.

God go comot wetin de cause fight-fight as e de teach people to stay together and peace go dey.

• “Them no go do anything bad, or destroy anything for all my holy mountain, because the knowledge of Jehovah go surely full the whole earth as water cover the sea.”—Isaiah 11:9.

• “Even now, God de teach people for the whole world to comot hand from fight-fight and make they “turn their swords to farm tools and their spears to pruning tools.”—Micah 4:3.

Bible don promise say e dey possible to live for world wey fear no go dey. To learn more about this promise, read the article “Freedom From Fear—Is It Possible?”

To learn more about permanent solution to all kind of fight-fight, read the article “Peace on Earth at Last!”