QUESTIONS WEY YOUNG PEOPLE DE ASK
How Bible Fit Help Me?—Part 1: Study Your Bible
“I don try to read Bible, but fear de catch me because e too big!”—Briana, 15.
You de feel like that? This article fit help you!
Why e good make you read Bible?
E de tire you to read Bible? If e de tire you, you no dey alone. You fit de think of Bible as one big book with plenty-plenty page and e no get picture. And you fit de feel say Bible no sweet like to watch TV and film!
But you fit reason-am like this: If you see one old fine box wey better-better things full inside, you no go like check wetin dey the box?
Bible just be like that old fine box. Bible get plenty better-better things wey you fit learn from, and e go help you
Make better decisions
Make you no get problem with your papa and mama
Get better friends
Handle stress
Wetin make-am dey possible say this old book fit help us for this our time? Na because “God use holy spirit direct everything wey them write inside Bible.” (2 Timothy 3:16) That one mean say the advice for Bible come from the Person wey get sense pass for heaven and for earth.
Bible just be like one old fine box wey get better-better things inside
How I suppose read Bible?
One way to read Bible na to read-am from beginning to end. That one go help you know wetin dey inside Bible. Plenty ways dey to read Bible. Make we check two examples:
You fit read Bible the way they arrange the 66 books of the Bible, from Genesis to Revelation.
You fit read Bible according to the time wey the stories for Bible happen.
Try this one: Appendix A7 for the New World Translation mention the main things wey happen for the life of Jesus for this earth according to the time wey this things happen.
The second way to read Bible na to choose one story wey concern the problem wey you de face. For example:
You go like get better friends wey you fit trust? Read the story of Jonathan and David. (1 Samuel, chapters 18-20) Look for the fine-fine qualities wey David get wey make Jonathan draw near David.
You go like know wetin you fit do to get the power to run from temptation? Read the story of how Joseph run from temptation. (Genesis, chapter 39) Look for wetin give Joseph the power to run from temptation.
You go like know how prayer fit help you? Read about the story of Nehemiah. (Nehemiah, chapters 1 and 2) Look for how God answer the prayers of Nehemiah.
Try this one: Make sure say the place wey you de read Bible dey quiet, so that you go fit put all your mind for wetin you de read.
The third way wey we fit read Bible na to choose one story or one psalm and read-am, after, check how e affect you. After you read Bible, ask yourself questions like:
Why Jehovah do-am make they put this story for Bible?
Wetin this one show about the kind person wey Jehovah be or how e de do things?
How this thing wey I don learn fit make my life better?
Try this one: Use the study edition of the New World Translation to check for videos, maps, and other things wey fit help you gain from your Bible reading.