QUESTIONS WEY YOUNG PEOPLE DE ASK
How Bible Fit Help Me?—Part 2: Make Your Bible Reading Sweet
One young person wey e name na Will talk say: “To read Bible fit tire person if you no know the correct way to read-am “
You go like know wetin fit help you to enjoy Bible reading? This article go help you.
Make wetin you de read dey real to you
Put mind for wetin you de read. You fit do-am like this:
Choose one story for Bible wey you go like study. You fit pick one story for Bible or one part wey talk about the life of Jesus for this earth, or you fit choose one story from the part wey be, Bible Wey They Read Like Drama for jw.org.
Read the story. You fit read-am by yourself, or you fit read-am loud with your friends or family people. One person fit be the person wey de talk the story and other people go take other parts.
Try follow some of the advice wey we mention for under:
Draw pictures to explain the story. Or you fit draw simple pictures to explain how things happen. For each picture, write something under to explain wetin de happen.
Draw lines to connect. For example, when you de read about one faithful person for Bible, you fit draw line to connect the qualities of the person and wetin e do with the blessings wey e get.
Talk the story like say you de read news. Talk wetin happen for different ways and interview the main people for the story and other people wey see wetin happen.
If one of the people for the story make mistake, think of another thing wey for happen for the end if the person no make that mistake. For example, think of how Peter deny Jesus. (Mark 14:66-72) Wetin Peter for do when e face the temptation to deny Jesus?
If you be person wey like to write story, make you write your own drama from the story wey you don read from Bible. Mention the lessons wey people fit learn from the story.—Romans 15:4.
You fit make the stories for Bible dey real to you!
Do research!
If you check all the information about the story wey you de read, you fit see other better things wey you fit learn. Sometimes just one word or two fit open your eye to other better things wey you fit learn from the story.
For example, compare Matthew 28:7 with Mark 16:7.
Why Mark add the information say Jesus go soon appear to e disciples “and Peter”?
See this one: E be like say na Peter give Mark this information because Mark no dey there when this things happen.
The better thing wey you learn: As Jesus talk say e go like see Peter, how this one go don really encourage Peter? (Mark 14:66-72) How Jesus show say e be better friend to Peter? How you fit copy the example of Jesus and be better friend to other people?
When you make wetin you de read dey real to you and do research, Bible reading go de sweet you!