THINGS WEY FIT HELP FAMILY
How You Fit Control Your Temper
Your husband or wife talk or do something and the thing vex you, and you try to hide your vex. Then your husband or wife notice say something de worry you and e start to ask you. And this one even vex you more. So, how you fit control yourself for this kind situation?
Wetin you need to know
If you de allow vex to control you e fit cause sickness for you. Doctors don study and talk say when we no control our temper, e de cause high blood pressure, heart problem, de make person feel sad, and de make body no de digest food well. Vex still de make person no fit sleep, de make person de worry, de cause skin problem, and stroke. Na this one make Bible talk say: “Stop to vex . . . , because e de only bring trouble.”—Psalm 37:8, footnote.
If you de hide your vex, e fit still cause problem for you. If you continue to vex, e fit be like sickness inside you and e de chop you inside. For example, e fit make you to always de complain about people. This kind behavior go make-am hard for people to live with you and e fit bring serious problem for your marriage.
Wetin you fit do
De look for the good qualities wey your husband or wife get. Think about three things wey you like about your husband or wife. Anytime wey e do something and e vex you, think about those three good things wey you say you like about your husband or wife. This one fit help you control your vex.
Bible advice: “Make wuna show say wuna value the good wey person do.”—Colossians 3:15.
Make you learn to always forgive. Try to see things the way your husband or wife de see them. This one go make you do wetin Bible talk say: “De feel for one another.” (1 Peter 3:8) After, ask your self say, ‘Wetin de make me vex really serious sotey I no fit forgive?’
Bible advice: “Na fine thing if . . . person no look the bad wey other people do.”—Proverbs 19:11.
Use sense and dey kind when you de talk how you de feel. Try de use “I” when you de talk. For example, instead make you say, “You no de think about me when you no call to tell me the place wey you dey,” talk say, “I de worry when time don go for night and I no know whether you dey okay.” If you dey calm when you de talk how you de feel, e fit help you control your vex.
Bible advice: “Make wuna talk de sweet all the time, make e get salt.”—Colossians 4:6
Listen with respect. After you don talk how you de feel, allow make your husband or wife talk and no stop your husband or wife as e de talk. When your husband or wife don talk finish, say wetin you hear from wetin e talk so that you go dey sure say you hear your husband or wife well. If you just listen e fit help you control your vex.
Bible Advice: “Dey ready to listen more, no de talk quick.”—James 1:19.