Better Way to See the Character Wey Your Husband or Wife Get Wey You No Like

• You fit be person wey no de plan things down before you do-am, but your husband or wife fit be person wey like to plan or arrange everything down before e do-am.

• You fit be person wey like to dey on im own and no de too talk; but your husband or wife fit be person wey like to de talk and dey around people.

Your husband or wife get character wey de make you vex? If you de only think about this character wey you no like about-am, e fit cause problem for your marriage. No wonder Bible talk say, “The person wey de talk about one matter everytime de scatter tight friend.”​—Proverbs 17:9.

So no allow the character wey your husband or wife get wey you no like to cause problem for una or make una de argue. Instead, try to think about the good side of that character wey you no like.

For this article, we go talk about:

• Better way to see the character wey your husband or wife get wey you no like

• Wetin some husband and wife talk

• Question wey husband and wife go talk about

Better way to see the character wey your husband or wife get wey de make you vex

The character wey your husband or wife get wey de make you vex, fit connect to another character wey you like about-am. Make we see three example:

“My husband no sabi do things quick-quick and even when we get where we de go, e no de quick ready. But na this same character de make-am no de quick vex—even with me. Sometimes, when I see how e de slow, e de make me vex, but this na part of the reason why I like-am.”​—Chelsea.

“My wife de like to plan and arrange everything well and make sure say comma no dey. The way e de put eye for things to make sure say nothing pass im eye, de make me vex. But this character de make-am no run up and down because e don do wetin e suppose do for the correct time.”​—Christopher.

“When something happen, my husband de do as if say e no de worry-am. This kind thing de make me tire. But the way e de sofri take time do things na one of the things wey make me like-am. I like the way e de control imself and dey calm even when e be like say water don pass garri.”​—Danielle.

From wetin Chelsea, Christopher, and Danielle talk, we see say something wey you no like about your husband or wife, fit make you like-am when e show that same character for another way. So na different part of the same character, and you no fit choose one part and leave the other part, just as you no go fit choose one leg of shoe and leave the other one, the two de always go together.

Na true say no be all bad character get good side. For example Bible talk say some people ‘de quick vex.’ This bad character no get better side. (Proverbs 29:22) E go good make person wey de behave like that stop-am. No wonder Bible talk say: “Make una remove every kind of strong bad belle, vex, hot temper, shout-shout, and curse-curse.”a—Ephesians 4:⁠31.

But if na character wey you no just like, e go good make you follow this Bible advice wey talk say, “Make una continue to bear wetin una de do each other . . . even if [you] get reason to complain.”​—Colossians 3:⁠13.

Apart from this one, try to look for the good side of the character wey your husband or wife get wey you no like. E fit be say na one of the character wey make you like-am be that. One man wey don marry wey im name na Joseph talk say: ‘Person wey de only put eye for character wey e no like about im husband or wife be like person wey de only look how knife sharp reach, but e forget say you go fit use that sharp knife do plenty better things.’

Question wey husband and wife go talk about

Make you first answer each of this question by yourself, later make una talk about-am together.

• Your husband or wife get character wey de cause problem for una marriage? If your answer na yes, wetin be the character?

• The character really bad, or you no just like-am?

• The character get any good side? If e get, wetin e be, and why you like the good part of that character wey e get?