Selemia
43 Neʼe fakaha e Selemia ki te hahaʼi katoa ia meʼa fuli ʼae neʼe ui e Sehova tonatou ʼAtua, te ʼu folafola fuli ʼae neʼe fekau e Sehova tonatou ʼAtua ke alu ʼo ui age kia natou. ʼI tana ʼosi palalau, 2 neʼe ui e Asalia foha ʼo Hosaia, mo Seonane+ foha ʼo Kalease pea mo te ʼu tagata fiameʼalahi fuli kia Selemia: “Ko tau loi! Neʼe mole fekauʼi koe e Sehova tomatou ʼAtua ke ke haʼu ʼo ui mai: ‘ ʼAua naʼa kotou olo ʼo nonofo ʼi Esipito.’ 3 Ko Paluke,+ foha ʼo Nelisa ʼae ʼe ina uga koe ke ke haʼu ʼo ui mai te meʼa ʼaia ke puke matou e te kau Kaletea. ʼE ina loto ke natou matehi matou peʼe ke natou ʼave popula matou ki Papiloni.”+
4 Neʼe mole fakalogo kia Sehova ia Seonane foha ʼo Kalease, mo te ʼu pule solia fuli pea mo te hahaʼi katoa: neʼe mole natou fia nonofo ʼi te fenua ʼo Suta. 5 Koia neʼe ʼave e Seonane foha ʼo Kalease pea mo te ʼu pule solia fuli ia natou fuli ʼae neʼe toe ʼi Suta, natou fuli ʼae neʼe toe liliu mai te ʼu puleʼaga fuli ʼae neʼe mavetevete ai ʼo maʼuʼuli ʼi te fenua ʼo Suta.+ 6 Neʼe natou ʼave ai te hahaʼi tagata mo fafine, mo te ʼu fanau, mo te ʼu ʼofafine ʼo te hau pea mo natou fuli ʼae neʼe tuku e Nepusalatane,+ te pule ʼo te kau leʼo kia Ketalia,+ foha ʼo Asikame,+ foha ʼo Safani.+ Neʼe natou ʼave mo te polofeta ko Selemia pea mo Paluke, foha ʼo Nelisa. 7 Neʼe natou hu leva ki Esipito he neʼe mole natou fakalogo kia Sehova ʼo natou olo ai ki Takepanese.+
8 Neʼe palalau leva ia Sehova kia Selemia ʼi Takepanese, ʼo ina ui: 9 “Toʼo ʼaki ʼou nima ni foʼi maka lalahi, ʼo ke fufu ʼaki he moʼi sima ʼi te fakaheke piliki ʼae ʼe tuʼu ʼi te huʼaga ʼo te fale hau ʼo Falaone ʼi Takepanese, kae sisio ki ai te hahaʼi tagata Sutea. 10 Pea ke ui kia natou: ‘Koʼeni te folafola ʼa Sehova ʼo te ʼatu kautau, te ʼAtua ʼo Iselaele: “ ʼE au pauʼi anai ia te hau ʼo Papiloni ko Nepukanesa, taku tagata faifekau.+ ʼE au fakatuʼu anai tona hekaʼaga fakahau ʼi te ʼu fuga maka ʼaia neʼe au fufu pea ʼe ina folahi ai anai tona fale la fakahau.+ 11 Pea ka haʼu ʼe ina taʼi anai ia Esipito.+ Ko natou ʼae ʼe tonu ke mamate ʼi te taʼi mahaki ʼe mamate anai ʼi te taʼi mahaki, ko natou ʼae ʼe tonu ke mamate popula ʼe ʼave popula anai, ko natou ʼae ʼe tonu ke mamate ʼi te heleta ʼe mamate anai ʼi te heleta.+ 12 ʼE au tutu anai te ʼu fale ʼo te ʼu ʼatua ʼo Esipito+ pea ʼe tutu anai e Nepukanesa ia te ʼu fale ʼaia pea ʼe ina ʼave popula anai ʼanatou fakatata. ʼE ina pulupuluʼi anai ia Esipito ohage pe ko te ʼai e he tagata tauhi ovi tona pulupulu, pea ʼe mavae ai anai ʼi te tokalelei.* 13 ʼE ina laliki anai te ʼu pou ʼo Pete-semesi* ʼi Esipito, pea ʼe ina tutu anai te ʼu fale ʼo te ʼu ʼatua ʼo Esipito.” ’ ”