Selemia

37 Neʼe kamata ʼafio leva ia te Hau ko Setesiasi,+ foha ʼo Sosiasi ʼo fetogi ia Konia,*+ foha ʼo Soakimi he neʼe fakanofo ke hau ʼi te fenua ʼo Suta+ e te Hau ʼo Papiloni ko Nepukanesa. 2 Kae neʼe mole fakalogo ia, mo ʼana tagata faifekau mo te hahaʼi ʼo te fenua ki te ʼu folafola ʼa Sehova ʼae neʼe fakaha kia natou e te polofeta ko Selemia.

3 Neʼe fekauʼi leva e te Hau ko Setesiasi ia Seukale,+ foha ʼo Selemi pea mo Sofoni,+ foha ʼo te pelepitelo ko Maasesa ke olo ʼo ui ki te polofeta ko Selemia: “Fakalelei siʼou loto kae ke faikole kia Sehova, totatou ʼAtua ke tokoni mai.” 4 ʼI te temi ʼaia, neʼe kei fealuʼaki faʼifaʼitaliha ia Selemia ʼi te hahaʼi he neʼe heʼeki pilisoniʼi.+ 5 Pea neʼe mavae ia te foʼi kautau ʼa Falaone mai Esipito.+ Pea ʼi te logo leva ki ai ʼa te kau Kaletea ʼae neʼe natou ʼa takai ia Selusalemi, neʼe natou mavae ai.+ 6 Pea neʼe palalau ia Sehova ki te polofeta ko Selemia, ʼo ina ui: 7 “Koʼeni te folafola ʼa Sehova, te ʼAtua ʼo Iselaele: ‘Koʼeni te meʼa ʼae ka kotou ui age ki te hau ʼo Suta ʼae neʼe ina fekau ke kotou ʼomai ʼo fakafehuʼi au: “ ʼE toe liliu anai ki Esipito, tona fenua, ia te foʼi kautau ʼa Falaone ʼae ʼe haʼu ʼo tokoni atu.+ 8 Kae ʼe toe liliu mai anai ia te kau Kaletea ʼo tauʼi ia te kolo ʼaeni. ʼE natou maʼu anai ʼo tutu.”+ 9 Koʼeni te folafola ʼa Sehova: “ ʼAua naʼa kotou kakaʼi pe ia koutou totonu ʼo ui: ‘ ʼE mahino ia, ʼe olo mamaʼo anai te kau Kaletea ia tatou,’ kae ʼe mole natou olo anai. 10 Tatau aipe pe ʼe kotou malo anai ʼi te foʼi kautau katoa ʼa te kau Kaletea ʼae ʼe natou tauʼi koutou, pea ko ʼanatou tagata lavevea pe ʼae ʼe kei toe, ʼe natou toe tutuʼu ake pe anai ʼo mavae mai ʼonatou fale la mo tutu te kolo ʼaeni.” ’ ”+

11 Neʼe mavae te foʼi kautau ʼa te kau Kaletea mai Selusalemi ʼuhi ko te foʼi kautau ʼa Falaone.+ 12 Neʼe fia mavae ai ia Selemia mai Selusalemi ʼo alu ki te fenua ʼo Pesamino,+ ke ina maʼu te vahe ʼae ʼe tonu ke foaki age kia ia ʼi tana hahaʼi. 13 Kae ʼi te kaku atu ʼa te polofeta ko Selemia ki te Matapa ʼo Pesamino, neʼe puke ia ia e te pule ʼo te kau leʼo. Neʼe higoa ko Sileisa, foha ʼo Selemi, foha ʼo Hanania. Neʼe ina ui age ki ai: “ ʼE ke fia hola ki te kau Kaletea!” 14 Neʼe tali age e Selemia: “Kailoa! ʼE mole au fia hola ki te kau Kaletea.” Kae neʼe mole fakalogo ki ai ia Sileisa. Neʼe ina puke leva ia Selemia ʼo ʼave ki te ʼu tama ʼaliki. 15 Neʼe iita te ʼu tama ʼaliki ʼo natou ta ai mo pilisoniʼi ia Selemia+ ʼi te fale ʼo te sikalaipe ko Seonatane ʼae neʼe fakaliliu ko he fale pilisoni. 16 Pea lolotoga ni ʼaho, neʼe pilisoniʼi ʼi ai ia Selemia ʼi he koga fale ʼi te lalo kele.

17 Neʼe fekauʼi ai e te Hau ko Setesiasi ke ʼaumai ia ia ke ina fakafehuʼi fakafufu ʼi tona fale hau.+ Neʼe ina fehuʼi age: “Neʼe ui atu koa e Sehova ia he meʼa?” Neʼe tali age e Selemia: “ ʼEi.” Pea neʼe ina hoko atu: “ ʼE tuku anai koe ki te nima ʼo te hau ʼo Papiloni.”+

18 Neʼe toe ui e Selemia ki te Hau ko Setesiasi: “He koʼe neʼe pilisoniʼi au? Kotea taku agahala ʼae neʼe au fai kia koe, mo ʼau tagata faifekau pea mo te hahaʼi ʼaeni? 19 Pea kofea ʼakotou polofeta ʼae neʼe natou fakakikite atu ʼe mole tauʼi anai koutou mo te fenua ʼaeni e te hau ʼo Papiloni?+ 20 Kae fakalelei siʼou loto, siʼoku ʼaliki hau, fakalogo mai! Fakalelei siʼou loto ʼo tali siʼaku kole. ʼAua naʼa ke toe fakaliliu au ki te fale ʼo te sikalaipe ko Seonatane+ naʼa au mate ai.”+ 21 Neʼe fakatotonu leva e te Hau ko Setesiasi ke pilisoniʼi ia Selemia ʼi te Malaʼe ʼo Te Kau Leʼo.+ Pea ʼi te ʼaho fuli, neʼe foaki kia Selemia tana foʼi pane mai te ala ʼo te kau taʼo pane+ ʼo kaku ki te mole kei maʼu ʼo he foʼi pane ʼi te kolo.+ Pea neʼe nofo aipe ia Selemia ʼi te Malaʼe ʼo Te Kau Leʼo.