Sosue

13 Neʼe kua matuʼa leva ia Sosue.+ Pea neʼe ui e Sehova ki ai: “Kua ke matuʼa leva, kae ʼe kei lahi ʼosi te fenua ʼae ʼe tonu ke kotou maʼu. 2 Koʼeni te fenua ʼae ʼe kei toe ke kotou maʼu:+ te ʼu potu fenua fuli ʼae ʼe nonofo ai te kau Filisitini pea mo te kau Kesuli fuli,+ 3 (ʼe kamata mai te tafega vai ʼo te Nile* ʼae ʼi te potu esite ʼo* Esipito ʼo kaku ki te tuʼakoi ʼo Ekelone ʼi te potu noleto, pea neʼe ui ʼi muʼa atu ko he fenua ʼo te kau Kanaane)+ ʼo feia mo te ʼu fenua ʼo te kau ʼaliki ʼe toko nima ʼo te kau Filisitini+ (ʼae ko Kasa, mo Asoti,+ mo Asekaloni,+ mo Kiete,+ pea mo Ekelone+) pea mo te fenua ʼo te kau Avime+ 4 ʼi te potu saute. ʼE kei toe foki ke maʼu ia te fenua katoa ʼo te kau Kanaane, mo Meala, ʼae ʼe maʼu e te kau Sitoni,+ ʼo kaku ki Afeke, ʼae ʼe ovi ki te tuʼakoi ʼo te kau Amole, 5 mo te fenua ʼo te kau Kepale+ pea mo Lipane katoa, ʼi te potu esite, ʼo kamata mai Paale-kati, ʼi te vaʼe Moʼuga ʼo Helemoni ʼo kaku ki Lepo-hamate,*+ 6 mo te potu moʼugaʼia katoa ʼae ʼe kamata mai Lipane+ ʼo kaku ki Misilefoti-maime,+ pea mo te fenua katoa ʼae ʼe nonofo ai te kau Sitoni.+ ʼE au kapu anai te hahaʼi ʼaia mai te fenua pea ʼe au foaki anai ki te kau Iselaele.+ ʼE tonu pe ke ke foaki ki te kau Iselaele te fenua ʼaia ko honatou tofiʼa, ohage pe ko taku fakatotonu atu.+ 7 ʼI te lakaga nei, ʼe tonu ke ke vaevae te fenua ki te ʼu telepi ʼe hiva mo te vaelua ʼo te telepi ʼo Manase ko honatou tofiʼa.”+

8 Neʼe kua maʼu e te kau Lupeni, mo te kau Kate pea mo te tahi vaelua ʼo te telepi ʼo Manase tonatou tofiʼa, ia te fenua ʼae neʼe foaki age e Moisese kia natou ʼi te potu esite ʼo te Solotane, ʼo mulimuli pe ki te ʼu koga meʼa ʼae neʼe hinoʼi age kia natou e Moisese, te tagata faifekau ʼa Sehova:+ 9 neʼe kamata mai Aloele,+ ʼae ʼe tuʼu ʼi he faʼahi maʼoluga ʼe haga ki te Vai Tafe* ʼo Alenone,+ pea mo te kolo ʼae ʼe ovi ki te vai tafe, mo te potu maʼoluga katoa ʼo Metepa ʼo kaku ki Tiponi, 10 mo te ʼu kolo fuli ʼo Sihone, te Hau ʼo te kau Amole, ʼae neʼe pule ʼi Heseponi, ʼo kaku ki te tuʼakoi ʼo te kau Amone,+ 11 ʼo feia mo Kileate pea mo te fenua ʼo te kau Kesuli pea mo te kau Maakate,+ mo te Moʼuga katoa ʼo Helemoni pea mo Pasani katoa+ ʼo kaku ki Salaka,+ 12 mo te puleʼaga katoa ʼo Oke ʼi Pasani, ia Oke ʼae neʼe pule ʼi Asetaloti pea mo Etelei. (Neʼe kau ia natou ʼae neʼe kei toe ʼi te kau Lefaimi.)+ Neʼe malo ia Moisese ʼi te hahaʼi ʼo te ʼu fenua ʼaia pea neʼe ina kapu ia natou.+ 13 Kae neʼe mole kapu e te kau Iselaele+ ia te kau Kesuli pea mo te kau Maakate. Koia, ʼe kei natou maʼuʼuli pe ʼi te lotolotoiga ʼo Iselaele ia ʼaho nei.

14 Neʼe ko te telepi pe ʼo te kau Levite ʼae neʼe mole foaki age e Moisese honatou tofiʼa.+ Ko tonatou tofiʼa ʼe ko te ʼu molaga ʼae ʼe tutu maʼa Sehova, te ʼAtua ʼo Iselaele,+ ohage pe ko tana fakapapau age kia natou.+

15 Pea neʼe foaki e Moisese ki te telepi ʼo te kau Lupeni honatou tofiʼa, ke vaevae ʼi ʼonatou famili. 16 Neʼe kamata tonatou fenua mai Aloele, ʼae ʼe tuʼu ʼi he faʼahi maʼoluga ʼe haga ki te Vai Tafe ʼo Alenone, pea mo te kolo ʼae ʼe ovi ki te vai tafe, mo te potu maʼoluga katoa ʼae ʼe ovi ki Metepa, 17 mo Heseponi mo ʼona kolo fuli+ ʼae ʼe tuʼu ʼi te potu maʼoluga: ko Tiponi, mo Pamoti-paale, mo Pete-paale-meoni,+ 18 mo Saatesi,+ mo Ketemoti,+ mo Mefaati,+ 19 mo Kiliataimi, mo Sipima,+ pea mo Seleti-asaali ʼae ʼe tuʼu ʼi te moʼuga, ʼae ʼe ovi ki te potu fenua laulelei, 20 mo Pete-peoli, mo te ʼu mahifo ʼo Pisika,+ mo Pete-sesimoti,+ 21 mo te ʼu kolo fuli ʼo te potu maʼoluga pea mo te puleʼaga katoa ʼo Sihone, te Hau ʼo te kau Amole, ʼae neʼe pule ʼi Heseponi.+ Neʼe malo ia Moisese ʼi te hau ko Sihone+ ʼo feia mo te ʼu pule ʼo Matiane ko Evi, mo Lekeme, mo Tesule, mo Ulu, pea mo Lepa,+ ʼae neʼe natou fakalogo kia Sihone pea neʼe nonofo ʼi te fenua. 22 Neʼe kau ia Palaame+ ia natou ʼae neʼe matehi e te kau Iselaele ʼaki te heleta. Ko Palaame neʼe ko te foha ʼo Peoli, pea neʼe ko he tagata faifakakikite fakatemonio.+ 23 Ko te tuʼakoi ʼo te fenua ʼo te kau Lupeni neʼe ko te Solotane. Pea ko te fenua ʼaia neʼe foaki ki te kau Lupeni ko honatou tofiʼa pea neʼe vaevae ʼi ʼonatou famili. Neʼe natou maʼu te ʼu kolo ʼaia, ʼo feia mo te ʼu kolo liliki ʼae ʼi ʼonatou tafaʼaki.

24 Pea neʼe foaki e Moisese he tofiʼa ki te telepi ʼo Kate, ia te kau Kate, pea neʼe vaevae ʼi ʼonatou famili. 25 Neʼe natou maʼu ia Saesele+ pea mo te ʼu kolo fuli ʼo Kileate, mo te vaelua ʼo te fenua ʼo te kau Amone+ ʼo kaku ki Aloele, ʼae ʼe haga ki Lapa.+ 26 Neʼe natou toe maʼu te fenua mai Heseponi+ ʼo kaku ki Lamati-misipe mo Petonimi, pea mai Mahanaimi+ ʼo kaku ki te tuʼakoi ʼo Tepile, 27 pea ʼi te potu fenua laulelei, neʼe tuʼu ai ia Pete-alame, mo Pete-nimila,+ mo Sukoti,+ pea mo Tesafoni, ia te toe ʼo te puleʼaga ʼo Sihone, te Hau ʼo Heseponi.+ Ko tonatou tuʼakoi neʼe ko te potu esite ʼo te Solotane ʼo kaku ki te taupotu ʼo te Tai ʼo Kineleti,*+ ʼae ʼi te potu saute. 28 Ko te fenua ʼaia neʼe foaki ki te kau Kate ko honatou tofiʼa pea neʼe vaevae ʼi ʼonatou famili. Neʼe natou maʼu te ʼu kolo ʼaia, ʼo feia mo te ʼu kolo liliki ʼae ʼi ʼonatou tafaʼaki.

29 Pea neʼe foaki leva e Moisese ki te vaelua ʼo te telepi ʼo Manase honatou tofiʼa, pea neʼe vaevae ʼi ʼonatou famili.+ 30 Neʼe kamata tonatou fenua ʼi Mahanaimi+ pea neʼe kau ai ia Pasani katoa, ia te puleʼaga katoa ʼo Oke, te Hau ʼo Pasani, ʼo feia mo te ʼu nofoʼaga fale la ʼo Saile+ ʼae ʼi Pasani. Neʼe maʼu ʼi tonatou fenua ia kolo ʼe 60. 31 Neʼe foaki ki te ʼu foha ʼo Makile,+ te foha ʼo Manase ia te vaelua ʼo Kileate, ʼo feia mo Asetaloti pea mo Etelei,+ ia te ʼu kolo ʼo te puleʼaga ʼo Oke ʼi Pasani. Kae neʼe ko te vaelua pe ʼo te ʼu foha ʼo Makile ʼae neʼe foaki ki ai pea neʼe vaevae ʼi ʼonatou famili.

32 Ko te ʼu tofiʼa ʼaia neʼe foaki e Moisese kia natou ʼi te toafa ʼo Moape, ʼae ʼe tuʼu ʼi te potu esite ʼo Seliko pea mo te tahi faʼahi ʼo te Solotane.+

33 Kae neʼe mole foaki e Moisese ki te telepi ʼo te kau Levite honatou tofiʼa.+ Ko Sehova, te ʼAtua ʼo Iselaele, ʼe ko tonatou tofiʼa, ohage pe ko tana fakapapau age kia natou.+