ʼE Maʼuli Te Folafola ʼa Sehova
Ko He ʼu Puani Maʼuhiga ʼi Te Tohi ʼo Sosue
NEʼE lagi malave ki te kau Iselaele ʼaē neʼe nonofo ʼi te ʼu Malaʼe ʼo Moape ʼi te taʼu 1473 ʼi muʼa ʼo totatou temi, tanatou logo ki te ʼu palalau ʼaenī: “Koutou teuteuʼi hakotou ʼu meʼa kai, heʼe hili anai ʼaho e tolu ʼe koutou fakalaka anai ʼi te Solotane ʼaenī ʼo hū pea mo toʼo te fenua ʼaē ʼe foaki atu e Sehova tokotou ʼAtua ko hokotou tofiʼa.” (Sosue 1:11) Kua vave ʼosi pe tanatou feʼoloʼaki ʼi te toafa lolotoga taʼu e 40.
Hili kiai taʼu e ʼuafulu tupu, pea tuʼu ia te tagata takitaki ko Sosue ʼi te lotomalie ʼo te fenua ʼo Kanaane pea mo ina ʼui fēnei ki te kau tagata ʼāfea ʼo Iselaele: “Koʼeni: kua au foaki atu ko he tofiʼa ki ʼokotou telepi, ia te ʼu puleʼaga ʼaē ʼe kei toe pea mo te ʼu puleʼaga fuli ʼaē neʼe au fakaʼauha, mai te Solotane ʼo aʼu ki te Tai Lahi ʼi te tōʼaga ʼo te laʼā. Neʼe ko Sehova tokotou ʼAtua ʼaē neʼe ina kapu nātou ʼi ʼokotou muʼa, pea neʼe ina faʼao tonatou fenua ʼuhi ko koutou, pea neʼe koutou toʼo tonatou fenua, ohage pe ko tona fakapapauʼi atu e Sehova ia tokotou ʼAtua.”—Sosue 23:4, 5.
Ko te tohi ʼo Sosue ʼaē neʼe tohi tonu e Sosue ʼi te taʼu 1450 ʼi muʼa ʼo totatou temi, ʼe ko he tohi ʼe maʼu ai te ʼu fakamatala maʼuhiga ʼo ʼuhiga mo te ʼu meʼa ʼaē neʼe hoko lolotoga te ʼu taʼu ʼaia e 22. ʼE hage pe tatatou ʼamanaki hū ki te mālama foʼou ʼaē neʼe fakapapauʼi mai, ko te ʼamanaki toʼo ʼo te Kele ʼo Te Fakapapau e te ʼu foha ʼo Iselaele. Koia, ʼaki hatatou fia ʼiloʼi te ʼu faʼahi ʼaia, tou vakavakaʼi te tohi ʼo Sosue.—Hepeleo 4:12.
ʼI “TE ʼU MALAʼE TOAFA ʼO SELIKO”
Neʼe ko he toe pilivilesio neʼe maʼu e Sosue ʼi te ʼui fēnei age e Sehova: “Kua mate taku tagata kaugana ko Moisese; koia ʼi te temi nei tuʼu ki ʼaluga pea ke fakalaka ʼi te Solotane ʼaenī, ia koe pea mo tau hahaʼi fuli, ʼo hū ki te fenua ʼaē ʼe au foaki age kiā nātou, ia te ʼu foha ʼo Iselaele.” (Sosue 1:2) Neʼe tonu ke taki e Sosue ia te hahaʼi e toko lauʼi miliona ki te Kele ʼo Te Fakapapau. ʼI muʼa ʼo tanatou hū kiai, neʼe ina fekauʼi muʼa ia te ʼu malomu e toko lua ke nā ʼolo ʼo fakasiosio ia Seliko—te ʼuluaki kolo ʼaē neʼe tonu ke ʼohofiʼi. Neʼe nofo ʼi te kolo ʼaia ia te fafine paomutu ko Laape, ʼaē neʼe kua logo ki te ʼu gāue fakaofoofo ʼaē neʼe fai e Sehova maʼa tana hahaʼi. Koia neʼe ina puipui pea mo tokoni ki te ʼu malomu ʼaia, pea neʼe nā fakapapauʼi age kiā ia ʼe hāofaki anai mokā fakaʼauha ia te kolo.
ʼI te toe liliu mai ʼa te ʼu malomu, neʼe kua tokalelei ia Sosue mo te hahaʼi ke hoko atu tanatou fagona pea mo fakalaka ʼi te Solotane. Logope ia te loloto ʼo te vaitafe, kae neʼe mole ko he fihifihia ia kiā nātou he neʼe haga ia Sehova ʼo tāʼofi ia te tatafe ʼo te vai pea mo fakamamaha ʼo aʼu ki te Tai Mate. ʼI tanatou ʼosi fakalaka ʼi te Solotane, neʼe fakatuʼu te nofoʼaga ʼo te kau Iselaele ʼi Kilekale, ʼo ōvi ki Seliko. Hili kiai ʼaho e fā, pea ʼi te afiafi ʼo te ʼaho 14 ʼo Apipe, neʼe nātou fai ia te Pāsikate ʼi te ʼu malaʼe toafa ʼo Seliko. (Sosue 5:10) ʼI te ʼaho ake, neʼe nātou kamata kai ia te ʼu fuaʼi ʼakau ʼo te fenua, pea ʼi te temi ʼaia neʼe gata ai leva ia tanatou kai te mane. Lolotoga te temi ʼaia, neʼe silikosisioʼi e Sosue ia te hahaʼi tagata fuli ʼaē neʼe tutupu ʼi te toafa.
Te ʼu Tali Ki Te ʼu Fehuʼi Faka Tohi-Tapu:
2:4, 5—He koʼe koa neʼe kākāʼi e Laape ia te ʼu tagata faifekau ʼa te hau ʼaē neʼe nātou kumi ia te ʼu malomu? Logola ia te tuʼutāmaki ʼaē neʼe feala ke hoko kiā ia, kae neʼe hāofaki e Laape ia te ʼu malomu, koteʼuhi neʼe tui kiā Sehova. Koia neʼe mole maʼua ke ina fakahā ia te ʼu malomu ki te ʼu tagata ʼaē neʼe nātou kumi ke nātou fakamamahiʼi te hahaʼi ʼa te ʼAtua. (Mateo 7:6; 21:23-27; Soane 7:3-10) ʼI tona fakahagatonu, ko Laape neʼe “fakatonuhia iaʼia aki he u gaue,” he neʼe mole ina fakahā fakahagatonu ki te ʼu tagata kaugana ʼa te hau pe neʼe ʼolo ʼifea ia te ʼu malomu ʼaia.—Sakopo 2:24-26.
5:14, 15—Ko ai “te tama ʼaliki ʼo te kautau ʼa Sehova”? Ko te tama ʼaliki ʼaia ʼaē neʼe haʼu moʼo fakaloto mālohiʼi ia Sosue ʼi tana kamata hū ki te Kele ʼo Te Fakapapau neʼe ko “te Folafola”—ko Sesu Kilisito ʼi muʼa ʼo tana tupu tagata. (Soane 1:1; Taniela 10:13) ʼE mahino ia ʼe tou lotomālohi ʼi tatatou ʼiloʼi papau, ko Sesu Kilisito ʼaē kua faka kolōliaʼi, ʼe tokoni ki te hahaʼi ʼa te ʼAtua ʼi tanatou tau fakalaumālie!
Te ʼu Puani ʼe Tou Lava Tāʼofi:
1:7-9. ʼE fua lelei ki tatatou ʼu faiga fakalaumālie mo kapau ʼe tou lau ia te Tohi-Tapu ʼi te ʼaho fuli, mo metitāsioʼi pea mo maʼuliʼi ia te ʼu meʼa ʼaē ʼe tou ako.
1:11. Neʼe ʼui age e Sosue ki te hahaʼi ke nātou teuteuʼi hanatou meʼa kai, kae ke ʼaua tanatou fakatalitali ʼaē ke hoki foaki age e te ʼAtua ia te ʼu meʼa ʼaia. ʼE fakatokaga mai e Sesu ke ʼaua naʼa tou hoha fau ki te ʼu meʼa ʼaē ʼe ʼaoga ki totatou maʼuli, heʼe ina fakapapauʼi mai “e foaki atu anai kia koutou ia meafuape alâ,” kae mole leva faka ʼuhiga ʼe mole kei ʼaoga ke tou fai he ʼu puleʼaki ʼo ʼuhiga mo te ʼu meʼa ʼaē ʼe ʼaoga ki totatou maʼuli.—Mateo 6:25, 33.
2:4-13. ʼI te logo ʼa Laape ki te ʼu gāue lalahi ʼaē neʼe fai e Sehova pea mo tana mahino ki te meʼa ʼaē ka hoko, neʼe ina fai tana tonu ʼaē ke lagolago ki te kau atolasio ki te ʼAtua. Kapau kua fualoa hakotou ako te Tohi-Tapu pea mo koutou mahino ai ʼe tou māʼuʼuli nei ʼi “te u aho fakamuli,” ʼe mole tonu koa la ke koutou fakatuʼutuʼu ke koutou tauhi ki te ʼAtua?—2 Timoteo 3:1.
3:15. ʼI te lelei ʼo te fakamatala ʼa te ʼu malomu ʼaē neʼe fekauʼi ke ʼolo ʼo fakasiosio ia Seliko, neʼe foimo fai puleʼaki atu aipe ia Sosue, ʼo mole fakatalitali ke hifo te vai ʼo te Solotane. Koia kapau ʼe tonu ke tou fai he ʼu gāue ʼo ʼuhiga mo te tauhi moʼoni, tou lototoʼa, ʼaua naʼa tou fakatalitali ke tokalelei totatou maʼuli pea hoki tou fakahoko leva te ʼu gāue ʼaia.
4:4-8, 20-24. Neʼe toʼo te ʼu foʼi maka e 12 ʼi te vaitafe ʼo Solotane moʼo fakamanatu ki Iselaele ia tanatou fakalaka ʼi ai. Ka hāofaki e Sehova tana ʼu kaugana mai tonatou ʼu fili ia ʼaho nei, ʼe ko he tahi pe ʼaia fakamanatu ʼe nofo mo nātou.
TE HOKO ATU ʼO TE FAKAʼAUHA ʼO TE FENUA
Ko te kolo ʼo Seliko neʼe “punupunu lelei . . . neʼe mole he tahi neʼe hū ki tuʼa pea mo hū ki loto.” (Sosue 6:1) ʼE fakaʼauha feafeaʼi anai ia te kolo? Neʼe fakahā age e Sehova kiā Sosue ia te puleʼaki. Mole tuai pea holo te ʼu kaupā, pea fakaʼauha ai te kolo. Neʼe ko Laape pe pea mo tona famili ʼaē neʼe hāofaki.
Ko te tahi kolo ʼaē ka fakaʼauha, neʼe ko te kolo hau ko Ai. Neʼe fakamatala e te ʼu malomu ʼaē neʼe ʼolo ʼo fakasiosio, ʼe mole faʼa hahaʼi ia te kolo, pea neʼe mole ʼaoga ke hahaʼi fau he kau tagata tau moʼona fakaʼauha. Kae ko te kau solia e toko 3 000 ʼaē neʼe fekauʼi ke nātou ulufi ia te kolo, neʼe nātou feholaki mai te kau tagata tau ʼo Ai. Koteā tona tupuʼaga? Neʼe mole kau ia Sehova mo te kau Iselaele. Neʼe agahala ia Akani ʼo te telepi ʼo Suta, ʼi te temi ʼaē neʼe nātou ulufi ai ia Seliko. ʼI te kua ʼosi fakatokatoka leva ʼo te fihifihia ʼaia, neʼe toe liliu ia Sosue ʼo tauʼi ia Ai. ʼI tana mālo ʼuluaki ʼi te kau Iselaele, neʼe toe fia tauʼi e te hau ʼo Ai ia te kau Iselaele. Kae neʼe fai e Sosue ia te fakatuʼutuʼu moʼo fakaʼauha te kau tagata tau ʼo Ai, ʼaē neʼe nātou tui papau ki tanatou mālo, pea neʼe ulufi ai leva e Sosue ia te kolo.
Ko Kipeone neʼe ‘ko he kolo lahi—ʼe lahi age ʼi te kolo ʼo Ai, pea neʼe ko ʼona ʼu tagata fuli neʼe mālolohi ʼaupito.’ (Sosue 10:2) Kae ʼi te logo ʼa te ʼu tagata ʼo Kipeone neʼe fakaʼauha e Iselaele ia Seliko pea mo Ai, neʼe nātou fai ia te puleʼaki ke fai e Sosue ia he fuakava ʼo ʼuhiga mo te tokalelei pea mo nātou. Maʼa te ʼu puleʼaga ʼi ʼonatou ʼu tafaʼaki, ko te meʼa ʼaē neʼe nātou fai ʼe feala ke nātou tuʼutāmakiʼia ai. Koia ko hau e toko nima ʼo te ʼu puleʼaga ʼaia neʼe nātou kau fakatahi moʼo tauʼi ia te kau Kipeonite, kae neʼe hāofaki e te kau Iselaele ia te kau Kipeonite, ʼo nātou fakaʼauha fuli ia tonatou ʼu fili. ʼI te ʼu mālo ʼa Iselaele ʼaē neʼe takitaki e Sosue, neʼe ʼi ai ia te ʼu kolo ʼo te potu saute pea mo te potu uesite, pea mo te fakaʼauha ʼo te ʼu hau ʼo te potu noleto ʼaē neʼe nātou kau fakatahi moʼo tauʼi ʼo nātou. Neʼe ko hau e toko 31 ʼaē neʼe fakaʼauha ʼi te potu uesite ʼo Solotane.
Te ʼu Tali Ki Te ʼu Fehuʼi Faka Tohi-Tapu:
10:13—E feafeaʼi ia he lava hoko ʼo he meʼa feiā? “ ʼE ʼi ai koa he meʼa ʼe faigataʼa fau kiā Sehova?” (Senesi 18:14) Kapau ʼe loto ia Sehova, ʼe feala pe hana fetogi ia te takaminomino ʼo te kele ke hage ki he tahi ʼe nofo ʼi te kele ʼe mole gaūgaūe ia te laʼā pea mo te māhina. Peʼe feala hana tuku ke hoko atu pe te takaminomino ʼa te kele pea mo te tuʼu maʼu ʼa te māhina , kae ina ōfeʼi te mālama ʼaē ʼe haʼu mai te laʼā pea mo te māhina ke mū hoholo. Logope he faʼahiga ʼaluʼaga, kae “neʼe mole ʼi ai he tahi ʼaho neʼe tatau mo te ʼaho ʼaia” ʼi te hisitolia ʼo te tagata.—Sosue 10:14.
10:13—Koteā te tohi ʼo Sasale? Ko te tohi ʼaia ʼe tuʼu ia 2 Samuele 1:18 pea ʼe talanoa ki te ʼu palalau fakatuketuke ʼe higoa ko “Te Nahau”—ko te hiva fakaʼofaʼofa ʼo ʼuhiga mo Saulo ia te Hau ʼo Iselaele pea mo tona foha ko Sonatane. Neʼe lagi kau te tohi ʼaia ki te ʼu kātiko pea mo te ʼu palalau fakatuketuke ʼo ʼuhiga mo te ʼu meʼa maʼuhiga neʼe hoko ʼi te hisitolia ʼo Iselaele, pea neʼe ʼiloʼi lelei e te kau Hepeleo.
Te ʼu Puani ʼe Tou Lava Tāʼofi:
6:26; 9:22, 23. Ko te faitutuku ʼaē neʼe fai e Sosue ʼi te temi ʼaē neʼe fakaʼauha ai ia Seliko, neʼe hoko hili kiai taʼu e 500. (1 Hau 16:34) Ko te tautea ʼaē neʼe fai e Noe ki tona mokopuna ko Kanaane neʼe hoko moʼoni ʼi te temi ʼaē neʼe liliu ai ia te kau Kipeonite ko te kau sinifu. (Senesi 9:25, 26) ʼE hoko tuʼumaʼu ia te folafola ʼa Sehova.
7:20-25. ʼE feala ki ʼihi ke nātou ʼui ʼe mole faʼa maʼuhiga ia te kaihaʼa ʼaē neʼe fai e Akani, ʼo lagi nātou ʼui neʼe mole fua kovi ia tana aga ʼaia ki niʼihi. ʼE lagi nātou manatu feiā anai ʼo ʼuhiga mo he ʼu kaihaʼa veliveli pea mo he ʼu kiʼi hala veliveli ʼe fakafeagai ki te ʼu lao ʼaē ʼe tuʼu ʼi te Tohi-Tapu. ʼE mole tonu ke tou manatu feiā, kae tou manatu ohage ko Sosue ʼo tou fakatotonu fakamalotoloto ke tou tauʼi ia te ʼu aga ʼaē ʼe fakafeagai ki te lao pea mo te ʼu aga heʼeʼaoga.
9:15, 26, 27. ʼE tonu ke tou fakahoko fakalelei ia tatatou ʼu fakapapau pea mo te ʼu meʼa ʼaē neʼe tou talanoa kiai.
NEʼE FAI E SOSUE IA TANA TOE GĀUE LAHI
ʼI te kua matuʼa ʼa Sosue, ʼi tana fakaōvi ki tona taʼu 90, neʼe ina vaevae leva ia te fenua. Neʼe ko he toe gāue! Ko te ʼu telepi ʼo Lupeni, mo Kate pea mo te vaelua ʼo te telepi ʼo Manase, neʼe kua nātou maʼu tofiʼa ʼi te potu esite ʼo Solotane. Neʼe filifili te ʼu kele ʼo te potu uesite, pea neʼe foaki age leva ko he tofiʼa ki te ʼu telepi ʼaē neʼe kei toe.
Ko te tapenakulo neʼe tuʼu ʼi Silo ʼi te telituale ʼo Efalaime. Neʼe foaki age kiā Kalepe ia te kolo ʼo Hepelone, pea neʼe foaki age kiā Sosue te kolo ʼo Timenate-sela. Neʼe ko kolo e 48 ʼaē neʼe foaki age ki te kau Levite, pea ʼi te ʼu kolo ʼaia neʼe kau ai te ʼu kolo e 6 ʼo te hāofaki. ʼI tanatou liliu mai ki tonatou tofiʼa ʼi te potu esite ʼo Solotane, ko te kau solia ʼo Lupeni, mo Kate, pea mo te vaelua ʼo te telepi ʼo Manase, neʼe nātou fakatuʼu ia te ʼaletale “lahi neʼe hā lelei.” (Sosue 22:10) Pea ko te faʼahi ʼaia neʼe faka ʼuhiga e te ʼu telepi ʼo te potu uesite ʼo Solotane ʼe ko he ʼapositasia, pea neʼe teitei aipe ke nātou fehōkosi faka telepi, kae neʼe mole hoko he ligi toto he neʼe nātou fefakalavelaveʼaki.
Ki muli age neʼe nofo ia Sosue ʼi te kiʼi temi ʼi Timenate-sela, neʼe ina fakatahitahi ai te kau tagata ʼāfea, mo te kau pule telepi, mo te kau tuʼi fakamāu, pea mo te kau tagata tau ʼo Iselaele, pea neʼe ina fakaloto mālohiʼi nātou ke nātou lototoʼa pea mo nonofo agatonu kiā Sehova. Ki muli age, neʼe fakamāʼopoʼopo e Sosue ia te ʼu telepi fuli ʼo Iselaele ʼi Sikemi. Pea ʼi te temi ʼaia, neʼe ina toe fakamanatuʼi age ia te ʼu gāue ʼa Sehova mai te temi ʼo Apalahamo ʼo aʼu mai ki tonatou temi, pea neʼe ina toe fakaloto mālohiʼi aipe nātou ke nātou “manavasiʼi kiā Sehova pea mo . . . tauhi kiā te ia ʼaki te faitotonu pea mo te moʼoni.” Pea neʼe tali fuli ia te kau Iselaele: “Ko Sehova tomatou ʼAtua ʼaē ka mātou tauhi anai ki ai, pea mo fakalogo anai ki tona leʼo!” (Sosue 24:14, 15, 24) Pea ki muli age leva, neʼe mate ia Sosue ʼi tona taʼu 110.
Te ʼu Tali Ki Te ʼu Fehuʼi Faka Tohi-Tapu:
13:1—ʼE mole fakafeagai koa mo te ʼu palalau ʼaē ʼe tuʼu ia Sosue 11:23? Kailoa, heʼe ko te ulufi ʼo te Kele ʼo Te Fakapapau, neʼe ko ʼona ʼaluʼaga e lua: ʼuluaki, ko te tau faka fenua ʼaē neʼe fakaʼauha ai ia te ʼu hau e toko 31 ʼo te fenua pea mo fakagata ai te mālohi ʼo te kau Kanaane, pea lua ʼe ko te toʼo ʼo te fenua kātoa ʼaki te ʼu tau ʼa te ʼu telepi pea mo te tau ʼa te ʼu hahaʼi takitokotahi. (Sosue 17:14-18; 18:3) Logola neʼe mole fakaʼauha e te ʼu foha ʼo Iselaele ia te kau Kanaane fuli, kae ko nātou ʼaē neʼe hāo mai te ʼu tau ʼaia neʼe mole feala hanatou fai he meʼa ki te maʼuli tokalelei ʼo Iselaele. (Sosue 16:10; 17:12) ʼE ʼui fēnei ia Sosue 21:44: “Neʼe foaki age e Sehova [ia te kau Kanaane] ki ʼonatou nima.”
24:2—Ko Tela ia te tāmai ʼa Apalahamo, neʼe tauhi koa ki te ʼu tamapua? ʼI te kamata, ko Tela neʼe mole atolasio kiā Sehova ʼAtua. ʼE lagi neʼe tauhi ki te ʼatua māhina ʼe higoa ko Sin—ko te ʼatua ʼiloa ʼo Ule. ʼO mulimuli ki te talatisio ʼa te kau Sutea, ʼe mahalo pe neʼe lagi faʼu tamapua ia Tela. Kae ʼi te temi ʼaē neʼe mavae ai ia Apalahamo mai Ule ʼo mulimuli pe ki te fakatotonu ʼa te ʼAtua, neʼe ʼalu ia Tela mo ia ki Alane.—Senesi 11:31.
Te ʼu Puani ʼe Tou Lava Tāʼofi:
14:10-13. Logola te taʼu 85 ʼo Kalepe, kae neʼe ina kole ke ina fai te gāue faigataʼa: ko te kapu ʼo te hahaʼi ʼi te fenua ʼo Hepelone. ʼI te kolo ʼaia, neʼe nonofo ai ia te ʼu tagata lalahi ʼaupito ko te kau Anakime. ʼAki te tokoni ʼa Sehova, neʼe mālo te kau Iselaele ʼi te tau ʼaia, pea neʼe liliu ia Hepelone ko te kolo ʼo te hāofaki. (Sosue 15:13-19; 21:11-13) Ko te faʼifaʼitaki ʼo Kalepe ʼe ina fakaloto mālohiʼi tatou ke ʼaua naʼa tou fakafisi ki te ʼu maʼua faka teokalatike faigataʼa ʼo te kokelekasio.
22:9-12, 21-33. ʼE tonu ke tou tōkakaga naʼa tou mahalohalo kovi ki te ʼu gāue ʼaē ʼe fai e ʼihi.
‘Neʼe Hoko Fuli Tana ʼu Folafola’
ʼI tana kua matuʼa leva, neʼe ʼui age e Sosue ki te ʼu tagata takitaki ʼo Iselaele: “neʼe mole hala mo hoko he folafola ʼi te ʼu folafola lelei fuli ʼaē neʼe tala atu e Sehova, tokotou ʼAtua. Neʼe hoko fuli ia maʼa koutou.” (Sosue 23:14) ʼE hā lelei te ʼu meʼa fakaofoofo ʼaia ʼi te hisitolia ʼo Sosue!
Neʼe tohi fēnei e te ʼapositolo ko Paulo: “Ko mea nee tohi i te temi mua, nee tohi o uhiga mo totatou akoʼi, ke tou mau te falala aki te kataki, mo te poupouki o te Tohi-tapu.” (Loma 15:4) ʼE tou tui papau ko tatatou falala ki te ʼu fakapapau ʼa te ʼAtua ʼe hoko moʼoni anai. ʼE hoko moʼoni anai ia tana ʼu fakapapau fuli.
[Paki ʼo te pasina 9]
ʼE koutou ʼiloʼi koa pe koʼe ko te fafine paomutu ko Laape neʼe tala ʼe faitotonu?
[Paki ʼo te pasina 10]
Neʼe fakaloto mālohiʼi e Sosue ia te kau Iselaele ke nātou “manavasiʼi kiā Sehova pea mo . . . tauhi kiā te ia”
[Mape ʼo te pasina 10]
(Vakaʼi te nusipepa)
Neʼe maʼu te fenua ʼi te temi takitaki ʼo Sosue
KILEATE
PASANE
ALAPA
NEKEPE
Vaitafe ʼo Solotane
Tai Kona
Vai ʼo Sapoke
Vai ʼo Alanone
Asole
Matone
Lasalone
Simelone
Sokeneame
Tole
Mekito
Katesi
Taanake
Efele
Tilesa
Afeke
Tapua
Petele
Kilekale
Seliko
Kesele
Selusalemi
Maketa
Salemute
Atulame
Lipena
Lakise
Ekelone
Hepelone
Tepile
Alate
[Paki ʼo te pasina 12]
Ko te kaihaʼa ʼa Akani neʼe mole ko he kihiʼi hala, neʼe ʼi ai tona ʼu fua kovi ʼaupito
[Paki ʼo te pasina 12]
“Aki te tui, nee holo te u kaupa o Seliko.”—Hepeleo 11:30