ʼUluaki Koloniko

18 Ki muli age, neʼe tauʼi e Tavite te kau Filisitini pea neʼe malo. Neʼe ina toʼo te kolo ko Kiete+ mo te ʼu kolo liliki ʼi ʼona tafaʼaki, mai te ʼu nima ʼo te kau Filisitini.+ 2 Neʼe toe malo ʼi te kolo ko Moape,+ pea neʼe liliu te kau Moape ko he hahaʼi faifekau ʼa Tavite pea neʼe tonu ke natou totogi te tukuhau.+

3 Neʼe malo ia Tavite ia Atatesele,+ te Hau ʼo Tesopa,+ ʼi te tau ʼae neʼe fai ʼo ovi ki Hamate,+ ʼi te alu ʼa te hau ʼaia ʼo toe fakatuʼu tana pule ʼi te Vai Tafe ʼo Efalate.+ 4 Neʼe toʼo e Tavite mai ia ia he ʼu saliote ʼe 1 000, mo te ʼu tagata heka hosi ʼe toko 7 000 pea mo te kau solia neʼe haʼele lalo ʼe toko 20 000.+ Neʼe ina tuʼusi leva te ʼu ivi ʼo te ʼu vaʼe ʼo te ʼu hosi ʼae neʼe toho saliote. Kae neʼe mole ina fai te faʼahi ʼaia ki te ʼu hosi ʼe 100.+ 5 Pea neʼe ʼomai te kau Silia ʼo Tamaso ʼo tokoni kia Atatesele, te Hau ʼo Tesopa, kae neʼe haga ia Tavite ʼo matehi te toko 22 000 kau Silia.+ 6 Neʼe fakatuʼu e Tavite he ʼu nofoʼaga solia ʼi Silia, ʼae ko tona kolo muʼa ko Tamaso. Neʼe liliu ai te kau Silia ko he hahaʼi faifekau ʼa Tavite pea neʼe tonu ke natou totogi te tukuhau. Neʼe foaki e Sehova te malo kia Tavite ʼi te ʼu faʼahi fuli pe ʼae neʼe alu ki ai.+ 7 Neʼe toʼo e Tavite mai te hahaʼi faifekau ʼa Atatesele te ʼu meʼa tali tau aulo takafuafua, ʼo ina ʼave ki Selusalemi. 8 Neʼe toe toʼo foki e Tavite he ʼu tuʼuga kapa mai Tipesa mo Kune, ʼae ko te ʼu kolo ʼo Atatesele. Pea ʼaki te kapa ʼaia, neʼe fai e Salomone te foʼi tane vai, neʼe higoa ko te Tai,+ mo te ʼu pou pea mo te ʼu faʼahiga meʼa kehekehe.+

9 Pea neʼe logo ia Tou te Hau ʼo Hamate ki te malo ʼa Tavite ʼi te foʼi kautau katoa ʼa Atatesele,+ te Hau ʼo Tesopa.+ 10 Koia neʼe ina fekauʼi atu aipe ia tona foha ko Hatolame ke alu ki te Hau ko Tavite, ʼo vakaʼi pe ʼe feafeaʼi mo fakamalo age kia ia ʼi tana tauʼi pea mo malo ia Atatesele (he ʼe ki muʼa atu, neʼe tuʼa lahi te tauʼi e Atatesele ia Tou). Pea neʼe alu mo he ʼu faʼahiga meʼa kehekehe neʼe fai ʼaki te aulo, mo te siliva mo te kapa. 11 Neʼe fakatapuʼi e te Hau ko Tavite te ʼu meʼa ʼaia maʼa Sehova,+ ʼo feia mo te siliva pea mo te aulo ʼae neʼe ina toʼo mai te ʼu puleʼaga fuli: mai Etome pea mo Moape, mo te kau Amone,+ mo te kau Filisitini,+ pea mo te kau Amaleke.+

12 Neʼe matehi e Apisai,+ te tama ʼa Teselusa,+ ia te kau Etome ʼe toko 18 000 ʼi te Potu Fenua ʼo Te Masima.+ 13 Neʼe ina fakatuʼu he ʼu nofoʼaga solia ʼi Etome, pea neʼe liliu te kau Etome fuli ko he hahaʼi faifekau ʼa Tavite.+ Neʼe foaki e Sehova te malo kia Tavite ʼi te ʼu faʼahi fuli pe ʼae neʼe alu ki ai.+ 14 Neʼe pule ia Tavite ʼi Iselaele katoa,+ pea neʼe ina fakamauʼi tana hahaʼi katoa ʼi te faitotonu.+ 15 Neʼe pule ia Soape te tama ʼa Teselusa ki te kautau,+ ko Sosafate+ te foha ʼo Asilute neʼe ko te sikalaipe ʼa te hau, 16 ko Satoke te foha ʼo Ahitupe mo Asimeleke te foha ʼo Apiata neʼe ko he ʼu pelepitelo, pea ko Savesa neʼe ko he sikalaipe. 17 Neʼe pule ia Penaia te foha ʼo Seosata ki te kau Keleti+ mo te kau Peletite.+ Pea ko te ʼu foha ʼo Tavite neʼe ko he ʼu minisi.