8 Tuku Age He Faʼifaʼitaki Lelei

TONA FAKAʼUHIGA

Ko te ʼu matuʼā ʼae ʼe natou tuku he faʼifaʼitaki lelei ʼe natou maʼuliʼi te ʼu meʼa ʼae ʼe natou akoʼi age ki ʼanatou fanau. Ohage la, ʼe faigataʼa anai ki hau tamasiʼi hana fakaha atu te moʼoni mo kapau ʼe logo atu ʼe ke loi fenei: “Ui atu ʼe au puli” moka ʼe haʼu he tahi kio koe.

ʼE ui fenei e David: “ ʼE ʼi ai te takuga lea fenei: “Fai te meʼa ʼae ʼe au ui atu kae mole ko te meʼa ʼae ʼe au fai.” Kae ko te ʼu fanau ʼe mole natou tui ki ai. Koteʼuhi ʼe natou hage pe ko he meʼa holoholo ʼe homi fuli te ʼu meʼa ʼae ʼe ui mo ʼae ʼe fai. Pea ko te ʼu fanau totonu pe anai ʼae ka natou ui fakahagatonu mai pe ʼe fehoanaki ʼatatou aga mo ʼae neʼe tou akoʼi age.”

PELESEPETO FAKATOHI-TAPU: “Pea ia koe ʼae ʼe ke faifakamafola ʼo ui fenei: “ ʼAua naʼa ke kaihaʼa,” kaʼe ʼe mole ke kaihaʼa koa la koe?”—Loma 2:21.

TONA MAʼUHIGA

ʼE malave lahi age te aga ʼa te ʼu matuʼā ki te ʼu fanau, ʼi he tahi kehe age ʼo feia mo ʼonatou kaumeʼa. Koia ʼe ha mai ai, ko kotou totonu pe ʼae ʼe tonu ke kotou takitaki lelei ʼakotou fanau mo tuku he faʼifaʼitaki lelei.

ʼE ui fenei e Nicole: “ ʼE feala pe ke tou palalau liuliuga pea tou feʼekeʼaki peʼe natou fagono mai koa. Kae ʼi te temi pe ʼae ʼe mole tou fai ai te ʼu meʼa ʼae neʼe tou akoʼi age, pea ʼe natou fakatokagaʼi mai. Ko te ʼu fanau ʼe natou tokagaʼi pe ia meʼa fuli ʼe tou fai, tatau aipe pe ʼe tou ui ʼe mole lagi natou tokagaʼi.”

PELESEPETO FAKATOHI-TAPU: “Ko te poto ʼae mai ʼoluga  . . . ʼe mole malualoi.”—Sakopo 3:17.

TE MEʼA ʼAE ʼE FEALA KE KE FAI

Sivisivi ʼau aga. Kotea ʼae ʼe ke sioʼi tuʼumaʼu? ʼE feafeaʼi tau aga ki tou hoa mo ʼau fanau? ʼE feafeaʼi ʼou kaumeʼa? ʼE ke aga lelei koa? Moʼo fakanounou, ʼe ke loto koa ke liliu ʼau fanau ohage ko koe?

ʼE ui fenei e Christine: “ ʼE mole mā faigaʼi ke muliʼi e ʼamā fanau he faʼahiga fai ʼe mole pe la ma maʼuliʼi maua.”

Faifakalelei moka neʼe ke lakahala: ʼE iloʼi pe ʼe tau fanau ʼe mole ke haohaoa. Koia, kapau ʼe ʼaoga, faifakalelei ki tou ʼohoana pea mo tau fanau. ʼE ke foaki ai anai he ako maʼuhiga ʼaupito ʼo ʼuhiga mo te aga fakahagatonu pea mo te agavaivai.

ʼE ui fenei e Robin: “Kapau neʼe ke lakahala, ʼe tonu anai ke logo tau fanau ki tau faifakalelei. He kapau ʼe mole ke fai feia, pea ʼe fufu atu anai e tau fanau tana lakahala.”