Te ʼUluaki Nuanua

ʼE KOUTOU ʼiloʼi koa te ʼuluaki meʼa ʼaē neʼe fai e Noe pea mo tona famili ʼi tanatou hū ki tuʼa mai te aleka? Neʼe ina fai te mōlaga peʼe ko he meʼa ʼofa ki te ʼAtua. ʼE feala hakotou sio ki te meʼa ʼaē neʼe ina fai ʼi te paki ʼaē ʼe tuʼu ʼi lalo. Neʼe momoli e Noe te ʼu manu ko tona mōlaga ʼaia moʼo fakafetaʼi ki te ʼAtua ʼi tana hāofaki tona famili ʼi te tulivio lahi.

ʼI takotou manatu neʼe leleiʼia koa e Sehova te mōlaga ʼaia? ʼE mahino papau ia. Pea koia neʼe ina fakapapau age ai kia Noe ʼe mole ina toe fakaʼauha anai te malamanei ʼaki he tulivio.

Neʼe mole fualoa pea moamoa te kele, pea kamata ai te maʼuli foʼou ʼo Noe mo tona famili ʼi tuʼa ʼo te aleka. Neʼe tapuakiʼi nātou e te ʼAtua pea mo ina ʼui age kia nātou: ‘Ke koutou liliu ʼo kaugamālie pea ke koutou fakafonu te kele.’

Kae ki muli age, mokā logo anai te hahaʼi ki te talanoa ʼo ʼuhiga mo te tulivio lahi, ʼe feala anai ke nātou matataku naʼa toe hoko mai he tulivio feiā. Koia neʼe foaki age ai e te ʼAtua te meʼa ke manatuʼi e te hahaʼi tana fakapapau ʼaē ʼe mole ina toe ʼaumai anai he tulivio ki te kele. ʼE koutou ʼiloʼi koa te meʼa ʼaē neʼe ina foaki age ki te hahaʼi ke nātou manatuʼi ai tana fakapapau? Ko te nuanua.

ʼE tautau hā te nuanua ʼi te lagi ʼi te ʼosi tō ʼo he ʼua pea mo te toe hā ʼo te laʼā. ʼE matalelei te ʼu lanu ʼo te nuanua. Neʼe kua koutou sisio koa ki he nuanua? ʼE koutou sisio koa ki te nuanua ʼaē ʼi te paki?

Koʼeni te meʼa ʼaē neʼe ʼui age e te ʼAtua: ‘ ʼE ʼau fakapapau ʼe mole ʼau toe fakaʼauha anai te hahaʼi pea mo te ʼu manu ʼaki he tulivio. ʼE ʼau fakatuʼu he nuanua ʼi te ʼu ʼao. Pea ʼi te temi ʼaē ʼe hā ai te nuanua, ʼe ʼau sio anai kiai pea ʼe ʼau manatuʼi ai anai taku fakapapau ʼaenī.’

Koia mokā koutou sisio ki he nuanua, koteā anai te meʼa ʼaē ʼe tonu ke koutou manatuʼi? ʼE mahino ia, ko te fakapapau ʼa te ʼAtua ʼaē ʼe mole ina toe fakaʼauha anai te malamanei ʼaki he tulivio lahi.