Neʼe Hāofaki Feafeaʼi Te Kiʼi Tamasiʼi Ko Moisese

ʼE KOUTOU sio ki te kiʼi tamasiʼi ʼaē ʼe tagi, pea ʼe ina toʼo te kauʼi tuhi ʼo te taʼahine. Ko te kiʼi tamasiʼi ʼaia ʼe ko Moisese. ʼE koutou ʼiloʼi koa pe ko ai te taʼahine finemui ʼaia? Ko te fineʼaliki ʼo Esipito, ko te ʼofafine ʼo Falaone.

Ko te faʼe ʼa Moisese neʼe ina fufū tana kiʼi tamasiʼi ʼo aʼu ki tona māhina tolu, koteʼuhi neʼe mole ina loto ke matehi e te kau Esipito. Kae neʼe ina ʼiloʼi ʼe maʼu anai ia Moisese, koia ʼaē neʼe ina fai ai te puleʼaki ʼaia moʼo hāofaki ʼo tana kiʼi tamasiʼi.

Neʼe ina toʼo te kato pea ina gaohi fakalelei ke ʼaua naʼa ulu te vai ki loto. Pea neʼe ina ʼai ia Moisese ki te kato, pea neʼe ina tuku ʼi te ʼu kaho ʼo te Vaitafe ko Nilo. Pea neʼe ina fakatotonu kia Miliame te tokolua ʼo Moisese, ke nofo ōvi ki ai ʼo fakasiosio pe koteā anai te meʼa ʼaē ka hoko.

Mole tuai pea hifo te ʼofafine ʼo Falaone ʼo maʼanu ʼi te Vaitafe. Fokifā pe neʼe sio ki te kato ʼaē ʼi te ʼu kaho. Neʼe ina pāuiʼi tana fafine kaugana: ‘ ʼAlu ʼo ʼaumai te kato kia ʼau.’ ʼI te avahi e te fineʼaliki te kato, neʼe sio ia ki te kiʼi tamasiʼi matalelei! Neʼe tagi ia Moisese, pea neʼe ʼofa te fineʼaliki ki ai. Neʼe mole loto ia ke tāmateʼi.

Pea neʼe fakaōvi mai ia Miliame. ʼE feala hakotou sio ki ai ʼi te paki. Neʼe fehuʼi age e Miliame ki te ʼofafine ʼo Falaone: ‘ ʼE ke loto ke ʼau ʼalu ʼo kumi mai he fafine Iselaelite ke ina fafaga te tamasiʼi maʼa koe?’

Pea ʼui age e te fineʼaliki: ‘ ʼAlu.’

Pea neʼe foimo lele atu aipe ia Miliame ʼo fakahā te meʼa ʼaia ki tana faʼe. ʼI te kaku mai ʼa te faʼe ʼa Moisese ki te fineʼaliki, neʼe ina ʼui age: ‘Toʼo te kiʼi tamasiʼi pea ke ke fafaga maʼa ʼaku, pea ʼe ʼau totogi anai koe.’

Pea neʼe tokaga lelei te faʼe ʼa Moisese ki tana tamasiʼi. Ki muli age ʼi te kua lahi leva ʼa Moisese, neʼe ina ʼave ia ia ki te ʼofafine ʼo Falaone, ʼaē neʼe ina gaohi ohage pe ko hana tamasiʼi totonu. Koʼena la te tupuʼaga ʼo te lahilahi ake ʼa Moisese ʼi te ʼapi ʼo Falaone.