Kāpite 11

ʼE Tuʼu Koa Tokotou Higoa ʼi Te Tohi ʼo Te Maʼuli?

SĀTE

1. Neʼe feafeaʼi te ʼaluʼaga fakalaumālie ʼo te kōkelekāsio ʼo Sāte, pea neʼe kamata feafeaʼi e Sesu tana logo?

IĀ KILOMETA e 48 ʼi te potu sautē ʼo te kolo foʼou ko Akhisar (Tiatile), neʼe tuʼu ai te kōkelekāsio ʼo Sāte, ʼaē neʼe momoli kiai te tahi logo ʼa Sesu ʼaē kua faka kolōliaʼi. ʼI te ono sēkulō ʼi muʼa ʼo totatou temi, ko te kolo ʼaia neʼe ko te kolo maʼuhiga pea mo fialahi ʼo te puleʼaga ʼo Litia pea neʼe ko te nofoʼaga ʼo te hau koloaʼia ʼaē ko Crésus. ʼI te temi ʼo Soane, neʼe felāveʼi ia Sāte mo te ʼu temi faigataʼa, pea ko tona matalelei ʼāfea ʼi te temi ʼo Crésus, neʼe gata ʼaki pē tona temi. ʼO toe fēia aipē, ko te kōkelekāsio faka Kilisitiano ʼaē neʼe tuʼu ʼi te kolo ʼaia, neʼe liliu ʼo masiva ʼi te faʼahi fakalaumālie. Ko te hoki fakahā ʼaē e Sesu ia te logo neʼe mole kamata ʼaki he ʼu palalau fakavikiviki. Kae neʼe ʼui māʼana: “Pea ki te ʼāselo ʼo te kōkelekāsio ʼaē ʼi Sāte, haga ʼo tohi: Koʼenī te ʼu meʼa ʼaē ʼe ʼui e ia ʼaē ʼe ina maʼu ia te ʼu laumālie e fitu ʼo te ʼAtua pea mo te ʼu fetuʼu e fitu: ‘ ʼE au ʼiloʼi tau ʼu gāue, pea ʼe au ʼiloʼi ʼe ke logona ʼe kei ke maʼuli, kae kua ke mate.’ ”—Fakahā 3:1.

2. (a) Koteā tona faka ʼuhiga ki te kau Kilisitiano ʼo Sāte te ʼui ʼaē ko Sesu ʼe ina maʼu ia “te ʼu laumālie e fitu”? (b) Koteā ʼaē neʼe ʼui ʼo ʼuhiga mo te kōkelekāsio ʼo Sāte, kae neʼe feafeaʼi ʼi tona ʼaluʼaga moʼoni?

² He koʼē neʼe ʼui e Sesu ʼo ʼuhiga mo ia totonu, “ ʼe ina maʼu ia te ʼu laumālie e fitu”? Koteʼuhi ko te ʼu laumālie ʼaia ʼe natou fakatātā te kātoa ʼo te laumālie māʼoniʼoni ʼo Sehova. Ki muli mai, ʼo ʼuhiga pea mo te ʼu laumālie ʼaia, neʼe ʼui e Soane ʼe ko tonatou ʼu “mata e fitu,” ʼo hā ʼaki mai ko te laumālie māʼoniʼoni ʼo Sehova, neʼe ina faka fealagia kiā Sesu ke ina maʼu ia te sio mamaʼo. (Fakahā 5:6) ʼE mahino mai, ʼe feala kiā ia ke ina fakahā pea mo fakatonutonuʼi he faʼahiga fihifihia ʼe feala ke hoko. (Mateo 10:26; 1 Kolonito 4:5) Neʼe logona te kōkelekāsio ʼo Sāte ʼe maʼuli pea mo gāue mālohi. Kae neʼe sio ia Sesu ko te kōkelekāsio ʼaia neʼe kua mate ʼi te faʼahi fakalaumālie. ʼE moʼoni, tokolahi iā nātou neʼe natou toe tō ki tanatou fakaʼaoʼaoganoa, ohagē ko te temi ʼaē neʼe mole heʼeki natou liliu ai ko he kau Kilisitiano.​—Vakaʼi ia Efeso 2:1-3; Hepeleo 5:11-14.

3. (a) He koʼē neʼe tonu ki “te ʼāselo ʼo te kōkelekāsio ʼaē ʼi Sāte” ke ina fakatokagaʼi te ʼaluʼaga ʼaē ko Sesu totonu ʼaē ʼe ina maʼu ia “te ʼu fetuʼu e fitu”? (b) Koteā te tokoni mālohi ʼaē neʼe foaki e Sesu ki te kōkelekāsio ʼo Sāte?

³ Neʼe toe fakamanatuʼi age e Sesu ki “te ʼāselo ʼo te kōkelekāsio ʼaē ʼi Sāte,” ʼe ina maʼu ia “te ʼu fetuʼu e fitu.” ʼE ina puke te ʼu tagata ʼāfea ʼo te kōkelekāsio ʼaia ʼi tona nima mataʼu, ko tona faka ʼuhiga ʼe ina puleʼi pea mo takitaki ia nātou ʼi tanatou gāue tauhi ovi. ʼE tonu anai ke natou tuku kātoa tonatou loto ke natou ‘ ʼiloʼi lelei te ʼu agaaga ʼo te ʼu ovi.’ (Tāʼaga Lea 27:23) Koia ʼaē, neʼe tonu ai ke natou fakalogo lelei ki te ʼu palalau ʼaenī ʼa Sesu ʼe hoa mai: “Liliu ʼo nofo tokaga, pea mo ke fakaloto mālohiʼi ia te ʼu meʼa ʼaē ʼe kei toe kae kua teitei pē ke mamate, he neʼe au maʼu mai neʼe mole ke fakahoko kātoa tau ʼu gāue iā muʼa ʼo toku ʼAtua. Koia, ke ke manatuʼi tuʼumaʼu pē neʼe feafeaʼi tau tali pea mo tau fagono, mo haga taupau maʼu, pea mo ke fakahemala. ʼIo, kapau ʼe mole ke ʼala ake, pea ʼe au haʼu anai ohagē ko he tagata kaihaʼa, pea ʼe mole ke ʼiloʼi anai peʼe ko te hola fea ʼaē kā au haʼu anai kiā koe.”—Fakahā 3:2, 3.

4. Neʼe tonu ke tokoni feafeaʼi ia te ʼu palalau ʼa Petelo ki te kōkelekāsio ʼo Sāte moʼo “fakaloto mālohiʼi ia te ʼu meʼa ʼaē [neʼe] kei toe”?

⁴ Neʼe maʼua ke manatuʼi e te kau tagata ʼāfea ʼo Sāte, te fiafia ʼaē neʼe natou ʼuluaki maʼu ʼi te temi ʼaē neʼe natou ʼiloʼi ai te moʼoni, pea mo te ʼu tapuakina ʼaē neʼe foaki age kiā nātou. Kae ʼi te temi ʼaia, neʼe kua natou mamate ʼo ʼuhiga mo tanatou gāue fakalaumālie. Neʼe kua vaivai te mālama ʼo tonatou kōkelekāsio, heʼe mole kei lahi te ʼu gāue ʼo tanatou tui. ʼI te ʼu taʼu ki muʼa atu, neʼe faitohi ia te ʼapositolo ko Petelo ki te ʼu kōkelekāsio ʼo Asia (ʼaē kau ki ai Sāte) moʼo fakatupu iā nātou he loto fakafetaʼi ki te logo lelei faka kolōlia ʼaē neʼe tali e te kau Kilisitiano pea neʼe tala “ ʼaki te laumālie māʼoniʼoni ʼaē neʼe fekauʼi mai lagi”​—ʼaē neʼe fakafofoga e te ʼu laumālie e fitu ʼi te meʼa ʼaē neʼe hā kiā Soane. Neʼe toe fakamanatuʼi age e Petelo ki te kau Kilisitiano ʼaia ʼi Asia, ʼe natou kau ki ‘he faʼahiga hahaʼi kua fili, ko he kau pelepitelō fakahau, ko he puleʼaga māʼoniʼoni, ko he hahaʼi kua tuku ke natou liliu ko he koloa makehe, ke natou faka mafola ia te ʼu kalitātē ʼo ia ʼaē neʼe ina pāui nātou mai te fakapōʼuli ki tona mālama taulekaleka.’ (1 Petelo 1:12, 25; 2:9) Ko te metitāsioʼi ʼo te ʼu moʼoni fakalaumālie ʼaia, neʼe tonu ke tokoni ki te kōkelekāsio ʼo Sāte ke fakahemala pea mo ina “fakaloto mālohiʼi ia te ʼu meʼa ʼaē [neʼe] kei toe.”​—Vakaʼi ia 2 Petelo 3:9.

5. (a) Neʼe feafeaʼi ia te kau Kilisitiano ʼo Sāte ʼo ʼuhiga mo tonatou loto fakafetaʼi? (b) Koteā ʼaē neʼe tonu ke hoko mo kanapau lā neʼe mole tali e te kau Kilisitiano ʼo Sāte ia te tokoni ʼa Sesu?

⁵ Kae ʼi te temi ʼaia, ko tonatou loto fakafetaʼi pea mo tonatou ʼofa ki te moʼoni, neʼe kua hagē ko he afi kua vave mate. Neʼe kei kakaha pē te ʼu kiʼi toega mamala. Neʼe fakaloto mālohiʼi nātou e Sesu ke natou tafutafu pea mo fakakakaha te afi, ke natou fakahemala ʼo ʼuhiga mo tanatou ʼu agahala ʼaē neʼe tupu ko tanatou fakaʼaoʼaoganoa, pea mo natou toe liliu ko he kōkelekāsio ʼe maʼuli ʼi te faʼahi fakalaumālie. (Vakaʼi ia 2 Timoteo 1:6, 7.) Heʼe kapau ʼe mole natou fai ia te faʼahi ʼaia, pea kā haʼu fakapunamaʼuli anai ia Sesu​—“ohagē ko he tagata kaihaʼa”​—moʼo fakahoko ia te fakamāu, pea ʼe mole heʼeki tokalelei anai ia te kōkelekāsio ʼo Sāte.​—Mateo 24:43, 44.

ʼE Haʼu “Ohagē Ko He Tagata Kaihaʼa”

6. Neʼe haʼu feafeaʼi ia Sesu “ohagē ko he tagata kaihaʼa” ʼi te taʼu 1918, pea neʼe feafeaʼi te ʼaluʼaga ʼo nātou ʼaē neʼe natou ʼui ko tana ʼu tisipulo?

⁶ Ko te fakatokaga ʼaē ʼa Sesu ʼe haʼu anai “ohagē ko he tagata kaihaʼa,” ʼe toe fakapipiki kiai mo totatou temi. Neʼe ʼi ai tona hoko tāfito ki te kau Kilisitiano ʼaē neʼe kei māʼuʼuli ʼi te ʼaho ʼo te ʼAliki. Mole faʼa fualoa ʼi te hili ʼo te taʼu 1914, neʼe hoko ia te lea faka polofetā ʼaenī ʼa Malakia: “ ‘Fokifā pē, ʼe haʼu anai ki Tona fale lotu te ʼAliki moʼoni ʼaē ʼe kotou kumi, pea mo te tagata ʼave logo ʼo te fuakava, ʼaē ʼe kotou fiafia ai. Koʼenī! ʼE haʼu moʼoni anai,’ ko te ʼui ʼaia ʼa Sehova ʼo te ʼatu kautau.” (Malakia 3:1; Fakahā 1:10) ʼI tona ʼuhiga “tagata ʼave logo ʼo te fuakava,” neʼe haʼu ia Sesu ʼo ʼaʼahi pea mo fakamāuʼi ia nātou ʼaē neʼe natou lau ko tana ʼu tisipulo. (1 Petelo 4:17) ʼI te temi ʼaia, ʼi te taʼu 1918, neʼe kau te Keletiate ʼi te ligi toto ʼo te ʼUluaki Tau Faka Mālamanei pea neʼe kua mate moʼoni ʼi te faʼahi fakalaumālie. Māʼia mo te kau Kilisitiano moʼoni, ʼaē neʼe fai faka mafola ʼaki he loto faʼafai ʼi muʼa ʼo te tau, neʼe natou fakalaka ʼi te temi neʼe natou māʼumoea ai ʼi te faʼahi fakalaumālie. Ko ʼihi ʼi tanatou kau tagata ʼāfea tāfito neʼe pilisoniʼi, pea ko te gāue fai faka mafola neʼe teitei pē ke mole kei fai. ʼI te temi ʼaē neʼe haga ai te laumālie ʼo Sehova ʼo fakaʼala ake ia te kau Kilisitiano ʼaia ʼi te taʼu ʼaē neʼe hoa mai kiai, neʼe mole heʼeki natou tokalelei fuli. Ko ʼihi, ohagē ko te kau tāupoʼou vavale ʼaē ʼe talanoa ki ai ia te lea fakatātā ʼa Sesu, neʼe mole natou tokalelei ʼi te faʼahi fakalaumālie ʼo ʼuhiga mo te pilivilēsio ʼaē ko te tauhi kiā Sehova. Kae meʼa lelei, heʼe ko te tokolahi neʼe natou mulimuli ki te faʼifaʼitaki ʼa te kau tāupoʼou popoto, ʼo natou fakaʼaogaʼi ia te fakatokaga ʼaenī ʼa Sesu: “Ke kotou nonofo fakaonoono, heʼe mole kotou ʼiloʼi te ʼaho peʼe ko te hola.”​—Mateo 25:1-13.

7. He koʼē iā ʼaho nei, ʼe tonu ki te kau Kilisitiano ke natou nonofo ʼalaʼala?

⁷ ʼI te kamata ʼo te ʼaho ʼo te ʼAliki, neʼe kei maʼua ki te kau Kilisitiano ke natou nonofo tokaga. ʼI tana lea faka polofetā lahi ʼo ʼuhiga mo “te fakaʼiloga mokā tonu anai ki te ʼu meʼa fuli ʼaia ke natou kaku ki tonatou fakaʼosi,” neʼe fai e Sesu ia te fakatokaga mālohi ʼaenī: “Pea ki te ʼaho ʼaia peʼe ko te hola ʼaia, ʼe mole he tahi ʼe ina ʼiloʼi. . . . Kotou haga lamalama, pea kotou nonofo ʼalaʼala, heʼe mole kotou ʼiloʼi peʼe ko ʼāfea te temi ʼaē kua fakakatofa. Kae ko te meʼa ʼaē ʼe au tala atu kiā koutou, ʼe au tala foki ki te hahaʼi fuli: Ke kotou nonofo fakaonoono.” (Maleko 13:4, 32, 33, 37) ʼEī, ʼo kaku ki te hola ʼaē neʼe fakakatofa, ko tātou takitokotahi, peʼe tou kau ki te kau fakanofo peʼe ki te toe hahaʼi tokolahi, ʼe tonu ke tou nonofo ʼaʼala pea ke tou tauʼi ia te māʼumoea fakalaumālie. Kā hoko fakapunamaʼuli mai anai te ʼaho ʼo Sehova “ohagē ko he tagata kaihaʼa ʼi te pōʼuli,” ʼofa pē ke hoko mai ʼe tou ʼalaʼala lelei, ke fai kiā tātou he fakamāu ʼe lelei.​—1 Tesalonika 5:2, 3; Luka 21:34-36; Fakahā 7:9.

8. Iā ʼaho nei, ʼe fakaloto mālohiʼi feafeaʼi e te kalasi ʼo Soane ia te hahaʼi ʼa te ʼAtua ke natou māʼuʼuli ʼi te faʼahi fakalaumālie?

⁸ Iā ʼaho nei, ʼe ʼiloʼi lelei e te kalasi ʼo Soane ʼe tonu ke natou fakaloto mālohiʼi ia te hahaʼi ʼa te ʼAtua ke natou māʼuʼuli ʼi te faʼahi fakalaumālie. ʼO ʼuhiga mo te faʼahi ʼaia, ʼe fakatuʼutuʼu ʼi te mālamanei kātoa te ʼu fakatahi makehe ʼe fai putuputu ʼi te taʼu fuli. ʼI te tahi taʼu, neʼe fai te ʼu fakatahi faka tisitilike e 2 981, neʼe kau ai te toko 10 953 744, pea mo tanatou kau papitema foʼou e toko 122 701. Kua hili nei kiai taʼu e teau tupu, ʼe fakaʼaogaʼi e te kalasi ʼo Soane te nusipepa ʼaē ko Te Tule Leʼo moʼo kalagaʼi ia te huafa ʼo Sehova pea mo tona finegalo. Moʼo tali ki te ʼu fakataga fakamataku ʼaē neʼe fai lolotoga te ʼu tau faka mālamanei e lua, neʼe uga e Te Tule Leʼo Fakafalani te kau Fakamoʼoni ʼa Sehova ke natou toe lotomālohi, ʼaki te ʼu ʼalatike ʼaenī “Fiafia Ia Nātou ʼAē ʼe Mole Manavasiʼi” (1920), “Ko He Pāui Ki Te Gāue” (1926), pea “Neʼe Mole Mālo Te ʼu Fakataga” (1942, Fakapilitānia).

9. (a) Ko te ʼu fehuʼi fea ʼaē ʼe tonu ke haga fai e te kau Kilisitiano fuli? (b) Koteā te tokoni fakaloto mālohi ʼaē neʼe foaki ʼi Te Tule Leʼo?

⁹ Ohagē ko te kau Kilisitiano ʼo te kōkelekāsio ʼo Sāte, ʼe maʼuhiga ki te kau Kilisitiano ʼo te ʼu kōkelekāsio ʼo te temi nei, ke natou sivisivi tuʼumaʼu ia nātou totonu. ʼE tonu anai kiā tātou fuli ke tou haga fai ia te ʼu fehuʼi ʼaenī: ʼE tou ‘fakahoko kātoa koa tatatou ʼu gāue’ iā muʼa ʼo totatou ʼAtua? ʼO mole tou valoki niʼihi, ʼe tou gāueʼi takitokotahi koa ia te maʼuli faka sākilifisio pea mo faiga mālohi koa ke tou tauhi ki te ʼAtua ʼaki totatou nefesi kātoa? ʼO ʼuhiga mo te faʼahi ʼaia, neʼe ʼi ai te ʼu tokoni fakaloto mālohi ʼi Te Tule Leʼo ʼaki te ʼu ʼalatike ʼaenī “Koutou Sivi Tuʼumaʼu Ia Koutou Peʼe Koutou Feafeaʼi” pea mo “ ʼE Mole Kei Tou Māʼuʼuli Maʼa Tatou Totonu.”a ʼAki te ʼu tokoni faka Tohi-Tapu ʼaia, tou vakavakaʼi fakalelei totatou loto pea mo tou haga haʼele ʼaki te agavaivai pea mo te faikole, ʼo tou nonofo agatonu iā muʼa ʼo Sehova.​—Pesalemo 26:1-3; 139:23, 24.

“Te ʼu Higoa e Tokosiʼi”

10. Koteā te ʼaluʼaga fakaloto mālohi ʼaē neʼe fakatokagaʼi e Sesu ʼi te kōkelekāsio ʼo Sāte, pea koteā tona pikipikiga mo tātou?

¹⁰ ʼE toe fakaloto mālohi age ia te ʼu palalau ʼaenī ʼa Sesu ki te kōkelekāsio ʼo Sāte. Neʼe ʼui māʼana: “Kae ʼe ke maʼu te ʼu higoa e tokosiʼi ʼi Sāte, neʼe mole natou ʼulihi tonatou ʼu kofu tuʼa, pea ʼe natou haʼele anai mo au ʼaki te ʼu kofu tuʼa hina, heʼe natou tāu mo feʼauga. Koia, ʼe kofuʼi fēiaʼi anai ia ia ʼaē kā mālo, ʼaki te ʼu kofu tuʼa hina; pea ʼe mole au molehi anai tona higoa ʼi te tohi ʼo te maʼuli, kae ʼe au fakamoʼoni anai ki tona higoa iā muʼa ʼo taku Tamai pea mo iā muʼa ʼo tana kau ʼāselo.” (Fakahā 3:4, 5) ʼE mole ʼeke koa la tātou e te ʼu palalau ʼaenī ke tou lotomālohi pea mo tou nonofo agatonu? Ko te fakaʼaoʼaoganoa ʼa he kolesi ʼo te kau tagata ʼāfea, ʼe feala ke ina fakatō he kōkelekāsio kātoa ki te mate moe fakalaumālie. Logolā te faʼahi ʼaia, kae ʼe faiga mālohi anai niʼihi ke natou taupau ke maʼa pea mo heʼe mele tonatou ʼuhiga Kilisitiano, pea mo haga taupau he higoa matalelei iā muʼa ʼo Sehova.​—Tāʼaga Lea 22:1.

11, 12. (a) Māʼia pē lā ʼi te temi ʼo te ʼapositasia lahi, koteā ʼaē neʼe fai e ʼihi ke natou nonofo agatonu ohagē ko “te ʼu higoa e tokosiʼi” ʼaē ʼi Sāte? (b) Lolotoga te ʼaho ʼo te ʼAliki, ko te ʼāteaina fea ʼaē neʼe maʼu e te kau Kilisitiano ʼaē ʼe fakatatau ki te fulumeto?

¹¹ ʼEī, ko te ʼu “kofu tuʼa” ʼaia, ʼe ina fakaʼiloga ia ia ʼaē ko he Kilisitiano faitotonu. (Vakaʼi ia Fakahā 16:15; 19:8.) Neʼe lagi lotofiafia ia Sesu ʼi tana sio ʼaē, logolā ia te fakaʼaoʼaoganoa ʼa te tokolahi, neʼe ʼi ai “te ʼu higoa e tokosiʼi” ʼa ʼihi Kilisitiano fakanofo ʼi Sāte, neʼe natou taupau aipē tonatou ʼuhiga Kilisitiano. ʼO fēia aipē, logolā ko nātou ʼaē neʼe natou lau ko te kau Kilisitiano neʼe toho nātou e Papiloni Lahi, ia te kautahi faka mālamanei ʼo te ʼu lotu hala, kae lolotoga te ʼu sēkulō ʼo te ʼapositasia lahi, neʼe ʼi ai tuʼumaʼu pē he tokosiʼi neʼe natou faiga ke natou fai ia te finegalo ʼo te ʼAtua, logolā ia te ʼu fakafeagai. Neʼe hagē te kau agatonu ʼaia, ko te fulumeto ʼaē neʼe ū ʼi te tuʼuga vao kovi.​—Fakahā 17:3-6; Mateo 13:24-29.

¹² Neʼe fakapapau e Sesu ʼe nofo anai mo te kau Kilisitiano ʼaia ʼaē ʼe natou tatau mo te fulumeto, “ ʼi te ʼaho fuli pē, ʼo kaku ki te fakaʼosi ʼo te tuʼu ʼo te ʼu faʼahiga meʼa ʼaenī.” ʼE ina ʼiloʼi lelei ia nātou, pea mo ina ʼiloʼi kua natou maʼu tonatou higoa matalelei. (Mateo 28:20; Tagata Tānaki 7:1) Kotou fakakaukauʼi age muʼa ia te fiafia ʼo te kau agatonu “tokosiʼi” ʼaia, ʼaē neʼe kei māʼuʼuli ʼi te kamata ʼo te ʼaho ʼo te ʼAliki! Neʼe toʼo kehe ia nātou mai te Keletiate ʼaē kua mate ʼi te faʼahi fakalaumālie, pea mo tānaki ia nātou ʼi te kōkelekāsio faitotonu ʼaē ʼe hokohoko lelei ki te kōkelekāsio ʼo Simenia.​—Mateo 13:40-43.

13. Ko te ʼu tapuakina fea ʼaē ʼe fakatalitali kiai te kau Kilisitiano fakanofo ʼaē ʼe mole natou “ ʼulihi tonatou ʼu kofu tuʼa”?

¹³ Ko te kau Kilisitiano ʼaia ʼo Sāte, ʼaē neʼe nonofo agatonu ʼo aʼu ki te fakaʼosi pea neʼe mole natou ʼulihi tonatou ʼuhiga Kilisitiano, neʼe natou kaku ki te hoko ʼo te ʼamanaki fakaofoofo. ʼI te ʼosi fakatuʼu ʼo te Puleʼaga Faka Mesianike ʼo Sesu ʼi te taʼu 1914, neʼe fakatuʼuake ia nātou ki te maʼuli fakalaumālie pea ʼi tonatou ʼuhiga Kilisitiano ʼaē kua mālo, neʼe fakakofuʼi nātou ʼaki te ʼu kofu tuʼa hina, ʼaē ko he fakatātā ʼo tanatou faitotonu ʼaē ʼe heʼe mele pea mo maʼa. ʼUhi ko tanatou haʼele ʼaē ʼi te ala fāveliveli ʼaē ʼe iku ki te maʼuli, ʼe natou maʼu anai he fakapale ʼe heʼegata.​—Mateo 7:14; vakaʼi mo Fakahā 6:9-11.

Kua Tohi ʼo Talu Ai Tonatou ʼu Higoa ʼi Te Tohi ʼo Te Maʼuli!

14. Koteā koa “te tohi ʼo te maʼuli,” pea ko te ʼu higoa ʼo ai ʼaē ʼe tohi ai?

¹⁴ Koteā koa “te tohi ʼo te maʼuli,” pea ʼo ai te ʼu higoa ʼaē ʼe tohi ai? Ko te tohi ʼaia, peʼe ko te takaiga tohi ʼo te maʼuli, ʼe talanoa ki te ʼu gāue ʼa te ʼu kaugana ʼa Sehova ʼaē ʼe natou ʼamanaki ke foaki age ia te maʼuli heʼegata. (Malakia 3:16) ʼI henī, ʼi te Fakahā, ʼe talanoa tāfito ki te ʼu higoa ʼo te kau Kilisitiano fakanofo. Kae ʼe toe kau ai foki mo te ʼu higoa ʼo nātou ʼaē ko tanatou ʼamanaki ko te māʼuʼuli ʼo heʼegata ʼi te kele. Tahi ʼaē, ʼe ʼi ai te ʼu higoa ʼe feala ke ‘molehi’ ai. (Ekesote 32:32, 33) Kae ko nātou ʼo te kalasi ʼo Soane ʼaē kua tohi tonatou ʼu higoa ʼi te tohi ʼo te maʼuli ʼo aʼu ki tonatou mate, ʼe foaki anai kiā nātou ia te maʼuli tuputupua ʼi te lagi. (Fakahā 2:10) Ko te ʼu higoa tāfito ʼaia ʼaē ʼe fakamoʼoni kiai ia Sesu iā muʼa ʼo tana Tamai pea mo iā muʼa ʼo Tana kau ʼāselo. ʼI fakapale taulekaleka leva!

15. ʼE tohi feafeaʼi anai ki te tohi ʼo te maʼuli, ia te ʼu higoa ʼo te toe hahaʼi tokolahi ke mole toe molehi?

¹⁵ Ko te toe hahaʼi tokolahi ʼaē neʼe tohi mo tonatou ʼu higoa ʼi te tohi ʼo te maʼuli, ʼe natou hao anai ʼi te toe mamahi lahi. Kapau ʼe natou haga tui ʼi te lolotoga ʼo te ʼAfio ʼa Sesu Iā Taʼu e Afe pea mo te lolotoga ʼo te ʼahiʼahi fakaʼosi ʼaē kā hoa kiai, pea ʼe fakapale anai nātou ʼaki ia te maʼuli heʼegata ʼi te Palatiso ʼi te kele. (Taniela 12:1; Fakahā 7:9, 14; 20:15; 21:4) Koia, ʼe mole feala anai ke toe molehi tonatou ʼu higoa ʼi te tohi ʼo te maʼuli. ʼI takotou ʼiloʼi ʼaē ia te ʼu meʼa ʼaē ʼe tala ʼaki ia te laumālie māʼoniʼoni, ʼe mole koa lā kotou tali fakafiafia anai ki te fakaloto mālohi ʼaē neʼe fai liuliuga e Sesu: “Ko ʼaē ʼe ʼi ai hona taliga ke logo ki te meʼa ʼaē ʼe ʼui e te laumālie ki te ʼu kōkelekāsio!”—Fakahā 3:6.

[Kiʼi nota]

[Paki ʼo te pasina 57]

ʼOfa pē ke tohi tokotou higoa ʼi te tohi ʼo te maʼuli