Kāpite 44

Te Fakahā Pea Mo Koutou

1. (a) Neʼe koteā ia te ʼu palalau fakaloto mālohi ʼaē neʼe fai e te ʼāselo kiā Soane ʼo ʼuhiga mo te ʼu fakapapau taulekaleka fuli ʼaē ʼi te Fakahā? (b) Ko ai ʼaē neʼe ina ʼui fēnei, “ ʼE au haʼu fakavilivili,” pea ʼe “haʼu” ʼi te temi fea?

KĀ KOTOU lau ia te fakamatala fakaofoofo ʼo ʼuhiga mo te Selusalemi Foʼou, ʼe lagi feala ke kotou fai ia te fehuʼi ʼaenī: ‘ ʼE feala koa ke moʼoni ia he meʼa fakaofoofo fēia?’ Neʼe tali e Soane ki te fehuʼi ʼaia ʼo ina fakamatalatala ia te ʼu palalau ʼaē neʼe fai e te ʼāselo: “Pea neʼe ʼui māʼana kiā te au: ‘Ko te ʼu palalau ʼaia ʼe agatonu pea mo moʼoni; ʼio, ko Sehova, te ʼAtua ʼo te ʼu palalau ʼo te kau polofetā, neʼe ina fekauʼi tana ʼāselo ke ina fakahā ki tana ʼu kaugana te ʼu meʼa ʼaē kua vave hoko mai. Logo mai, ʼe au haʼu fakavilivili. Fiafia ia ia ʼaē ʼe mulimuli ki te ʼu folafola ʼo te lea faka polofetā ʼo te takaiga tohi ʼaenī.’ ” (Fakahā 22:6, 7) ʼE hoko moʼoni anai ia te ʼu fakapapau taulekaleka fuli ʼo te Fakahā. ʼI tana palalau ʼi te huafa ʼo Sesu, neʼe ʼui e te ʼāselo kua vave haʼu ia Sesu, pea ʼe haʼu “fakavilivili.” ʼE mahino ia, ʼe faka ʼuhiga ia te haʼu ʼaia ki te haʼu ʼa Sesu “ohagē he tagata kaihaʼa,” moʼo fakaʼauha ia te ʼu fili ʼo Sehova pea mo kamata ia te ikuʼaga lahi pea mo fakafiafia ʼo te Fakahā. (Fakahā 16:15, 16) Koia, ʼe tonu ke tou faka ʼalutahi totatou maʼuli mo te ʼu palalau ʼo “te takaiga tohi ʼaenī,” ia te Fakahā, mo kapau ʼe tou tala ko tātou ʼe tou fiafia ʼi te lakaga ʼaia.

2. (a) Koteā ʼaē neʼe fai e Soane ʼi tana sio ʼaē ki te meʼa fakaofoofo ʼaē neʼe fakahā age e te ʼāselo, pea koteā ʼaē neʼe ʼui e te ʼāselo? (b) Koteā te fakatokaga ʼaē ʼe tou maʼu ʼi te ʼu palalau ʼaē neʼe fai e te ʼāselo, “Tokaga!” pea, “ ʼAtolasio ki te ʼAtua”?

² ʼE tou mahino pe koʼē neʼe hoha ia Soane ʼi tana sio ʼaē ki te fakahā fakaofoofo ʼaia: “Pea neʼe ko au Soane ʼaē neʼe logo pea mo sio ki te ʼu meʼa ʼaia. Pea ʼi taku logo ʼaē pea mo sio kiai, neʼe au tō ki lalo ke au ʼatolasio iā muʼa ʼo te ʼu vaʼe ʼo te ʼāselo ʼaē neʼe ina fakahā mai kiā te au ia te ʼu meʼa ʼaia. Kae neʼe ʼui māʼana kiā te au: ‘Tokaga! ʼAua naʼa ke fai te meʼa ʼaia! Heʼe au kaugā pōpula pē mo koe pea mo tou ʼu tehina ʼaē ko te kau polofetā, pea mo nātou ʼaē ʼe natou mulimuli ki te ʼu folafola ʼo te takaiga tohi ʼaenī. ʼAtolasio ki te ʼAtua.’ ” (Fakahā 22:8, 9; vakaʼi ia Fakahā 19:10.) Neʼe tō lelei ʼi te temi ʼo Soane ia te ʼu fakatokaga tuʼa lua ʼaia ke ʼaua naʼa ʼatolasioʼi te kau ʼāselo, heʼe ko ʼihi neʼe natou fai ia te tauhi ʼaia, peʼe natou ʼui neʼe fakahā age ia te ʼu meʼa makehe e te kau ʼāselo. (1 Kolonito 13:1; Kalate 1:8; Kolose 2:18) ʼI totatou temi, ʼe hā ʼaki mai ai ʼe tonu ke tou ʼatolasio ki te ʼAtua tokotahi pē. (Mateo 4:10) Tou tōkakaga naʼa tou ʼulihi ia te tauhi maʼa ʼi hatatou tauhi ki he tagata peʼe ko he tahi age meʼa.—Isaia 42:5, 8.

3, 4. Koteā ia te tahi ʼu folafola ʼaē neʼe fai e te ʼāselo kiā Soane, pea neʼe fakalogo feafeaʼi ia te toe ʼo te kau fakanofo ki tana ʼu folafola?

³ Neʼe toe ʼui fēnei e Soane: “Neʼe toe ʼui māʼana kiā te au: ‘ ʼAua naʼa ke fakamaʼu ia te ʼu folafola ʼo te lea faka polofetā ʼo te takaiga tohi ʼaenī, heʼe kua ovi mai te temi ʼaē neʼe fakakatofa. Ko ʼaē ʼe ina fai te aga heʼe faitotonu, ke ina toe fai te aga heʼe faitotonu; pea ko ʼaē ʼe heʼemaʼa, ke toe liliu ʼo heʼemaʼa; kae ko te tagata faitotonu, ke ina toe maʼuliʼi ia te faitotonu, pea ko te tagata māʼoniʼoni ke toe fakamāʼoniʼoniʼi.’ ”—Fakahā 22:10, 11.

⁴ ʼI totatou temi, neʼe fakalogo ia te toe ʼo te kau fakanofo ki te ʼu folafola ʼaia ʼa te ʼāselo. Neʼe mole natou fakamaʼu ia te ʼu folafola ʼo te lea faka polofetā. Koia, ko te ʼuluaki nusipepa ʼo Te Tule Leʼo (Phare de la Tour de Sion et Messager de la Présence de Christ, ʼo Sūlio ʼo te taʼu 1879, Fakapilitānia), neʼe ina fakamatalatala ai te ʼu tuʼuga vaega ʼo te Fakahā. Ohagē ko te meʼa ʼaē neʼe tou fakatokagaʼi ʼi te ʼuluaki Kāpite, ʼi te hoholo ʼo te ʼu taʼu, neʼe fai e te kau Fakamoʼoni ʼa Sehova ia te tahi ʼu tohi neʼe natou fakamahino ai ia te Fakahā. ʼI te temi nei, ʼe tou toe fakatokaga ki te hahaʼi fuli ʼaē ʼe natou ʼoʼofa ki te moʼoni, ʼo ʼuhiga mo te ʼu lea faka polofetā fakaofoofo ʼo te Fakahā, pea mo tonatou fakahoko.

5. (a) Koteā ʼaē kā hoko anai kiā nātou ʼaē ʼe mole fia tokagaʼi ia te ʼu fakatokaga pea mo te ʼu tokoni ʼo te Fakahā? (b) Koteā ʼaē ʼe tonu ke fai e te kau agavaivai pea mo te kau faitotonu?

⁵ Kapau ʼe mole fia tokagaʼi e te hahaʼi ia te ʼu fakatokaga pea mo te ʼu tokoni ʼo te Fakahā, pea ʼe ko he faʼahi ʼe fakalogo pē kiā nātou! “Ko ʼaē ʼe ina fai te aga heʼe faitotonu, ke ina toe fai te aga heʼe faitotonu.” Ko nātou ʼaē ʼe natou leleiʼia ia te ʼu aga heʼemaʼa ʼo te sēkulō aga ʼuli ʼaenī, ʼe natou mamate anai ʼi te ʼu aga heʼemaʼa ʼaia, he neʼe natou filifili ia te faʼahi ʼaia. ʼE mole kei tuai, pea ʼe fakahoko kātoa anai ia te ʼu fakamāu ʼa Sehova, ʼo kamata ʼaki ia te fakaʼauha ʼo Papiloni Lahi. ʼOfa pē ke mulimuli ia te kau agavaivai ki te ʼu palalau ʼaenī ʼa te polofetā: “Kotou kumi ia Sehova . . . Kotou kumi te faitotonu, kotou kumi te agavaivai. Pea ʼe mahalo pē, ʼe fufū anai koutou ʼi te ʼaho ʼo te hauhau ʼo Sehova.” (Sofonia 2:3) ʼO ʼuhiga mo nātou ʼaē kua natou foaki tonatou maʼuli kiā Sehova, neʼe toe ʼui fēnei e te ʼāselo “ko te tagata faitotonu, ke ina toe maʼuliʼi ia te faitotonu, pea ko te tagata māʼoniʼoni ke toe fakamāʼoniʼoniʼi.” ʼE ʼiloʼi e te tagata poto, ʼe mole feala ke fakatatau he lelei fakatemi ʼo te agahala pea mo te ʼu tapuakina heʼegata ʼaē kā maʼu anai e nātou ʼaē ʼe natou kātaki ʼi tanatou faitotonu pea mo tonatou māʼoniʼoni. ʼE ʼui fēnei ʼi te Tohi-Tapu: “Kotou ʼahiʼahiʼi tuʼumaʼu ia koutou moʼo vakaʼi peʼe kotou nonofo ʼi te tui, kotou ʼahiʼahiʼi tuʼumaʼu peʼe koteā tokotou ʼuhiga ʼo koutou totonu.” (2 Kolonito 13:5) ʼE kotou maʼu anai peʼe kailoa tokotou fakapale, ʼo mulimuli pē ki te meʼa ʼaē kā kotou filifili pea mo te meʼa ʼaē kā kotou fai.—Pesalemo 19:9-11; 58:10, 11.

6. Koteā te ʼu palalau fakaʼosi ʼaē neʼe fai e Sehova ki te kau lautohi ʼo te lea faka polofetā ʼo te Fakahā?

⁶ Pea neʼe fai leva ia te ʼu palalau fakaʼosi ʼa Sehova, te Hau ʼo te heʼegata, ki te kau lautohi ʼo te lea faka polofetā ʼo te Fakahā, ʼo ina ʼui fēnei: “Logo mai, ʼe au haʼu fakavilivili, pea ʼe ia te au te fakapale ʼaē ʼe au foaki, moʼo totogi ʼaki ia koutou takitokotahi ʼo mulimuli ki te gāue ʼaē neʼe kotou fai. Ko au te ʼAlefa mo te Omeka, te ʼuluaki mo te fakamuli, te kamataʼaga pea mo te fakaʼosi. Fiafia ia nātou ʼaē ʼe natou fō tonatou ʼu kofu loloa, ke natou maʼu te fakagafua ʼaē ko te ʼolo ki te ʼu fuʼu ʼakau ʼo te maʼuli pea ke feala hanatou hū ʼi te ʼu matapā ʼo te kolo. ʼE nonofo ʼi tuʼa te faga kulī pea mo nātou ʼaē ʼe fai fakalauʼakau, mo te kau fai folonikāsio, mo te kau fai fakapō, mo te kau tauhi tamapua, pea mo ʼaē ʼe ina leleiʼia pea mo ina maʼuliʼi ia te loi.”—Fakahā 22:12-15.

7. (a) He koʼē ʼe “haʼu fakavilivili” ia Sehova? (b) He koʼē ʼe mole kau anai ia te kau takitaki lotu ʼo te Keletiate ki te Selusalemi Foʼou?

⁷ ʼE toe faka maʼuhigaʼi e Sehova ʼAtua ia tana pule faʼitaliha heʼegata, pea mo ina fakahā ʼe ina fakahoko anai ia tana ʼuluaki fakatuʼutuʼu. ʼE “haʼu fakavilivili” moʼo fakahoko ia te fakamāu pea ʼe ina fakapale anai ia nātou ʼaē ʼe natou kumi fakamālotoloto ia ia. (Hepeleo 11:6) ʼAki tana ʼu lēkula, ʼe ina vakavakaʼi anai peʼe ko ai ʼaē kā fakapale pea ko ai ʼaē kā fakatūʼā. Ko te kau takitaki lotu ʼo te Keletiate, neʼe natou hagē ko ni “kulī ʼe ʼalelo mate,” he neʼe natou tali leleiʼi ia te ʼu aga kovi ʼaē ʼe talanoa kiai ia Sehova ʼi henī. (Isaia 56:10-12; vakaʼi mo Teutalonome 23:18, Traduction du monde nouveau — Bible de référence, nota ʼi te lalo pāsina.) ʼE mahino ia, neʼe natou ‘leleiʼia pea mo natou maʼuliʼi’ ia te ʼu akonaki loi pea mo te ʼu manatu hala, pea mo natou fakafisi ʼosi ki te ʼu tokoni ʼaē neʼe foaki e Sesu ki te ʼu kōkelekāsio e fitu. Koia, ʼe mole natou kau anai ki te Selusalemi Foʼou.

8. (a) Ko ai pē ia nātou ʼaē ʼe “ ʼolo ki te ʼu fuʼu ʼakau ʼo te maʼuli,” pea koteā tona faka ʼuhiga? (b) Neʼe fakahoko feafeaʼi e te toe hahaʼi tokolahi ia tanatou “fō tonatou ʼu kofu loloa,” pea ʼe natou taupau feafeaʼi ia tonatou ʼuhiga maʼa?

⁸ ʼE gata pē ki te kau Kilisitiano fakanofo ʼaē ʼe natou “fō [moʼoni] tonatou ʼu kofu loloa” ke feala hanatou maʼa iā mata ʼo Sehova, ʼe natou maʼu ia te pilivilēsio ʼaē ko te “ ʼolo ki te ʼu fuʼu ʼakau ʼo te maʼuli.” Ko tona faka ʼuhiga, ʼe fakagafua pea mo foaki age kiā nātou ia te maʼuli tuputupua ʼi tonatou tuʼulaga ʼaē ʼi te lagi. (Vakaʼi ia Senesi 3:22-24; Fakahā 2:7; 3:4, 5.) ʼI te hili ʼo tanatou mamate ʼi tona ʼuhiga tagata, ʼe fakatuʼuake nātou ke natou hū ki te Selusalemi Foʼou. ʼE fakahū ia nātou e te toko 12 kau ʼāselo, kae ʼe natou tapuʼi ia nātou ʼaē ʼe natou gutuloi peʼe natou fai ia te ʼu aga heʼemaʼa, tatau aipē peʼe natou ʼui ʼe natou maʼu ia te ʼamanaki ʼaē ke natou ʼolo ki te lagi. ʼO toe fēia mo te toe hahaʼi tokolahi ʼaē ʼe māʼuʼuli ʼi te kele, neʼe natou “fō tonatou ʼu kofu loloa pea mo natou fakahihina ʼi te taʼataʼa ʼo te ʼAkeno,” pea ʼe tonu ke natou haga taupau ia tonatou ʼuhiga maʼa. Ke feala ia te faʼahi ʼaia, ʼe tonu anai ke natou liʼaki ia te ʼu aga kovi ʼaē ʼe fakatokagaʼi mai e Sehova ʼi te vaega ʼaenī, pea mo fakalogo ki te ʼu tokoni ʼaē neʼe fai e Sesu ʼi tana ʼu logo e fitu ki te ʼu kōkelekāsio.—Fakahā 7:14; te ʼu kāpite 2 pea mo te 3.

9. Koteā te ʼu palalau ʼaē neʼe fai e Sesu, pea ko ai ʼaē neʼe ʼuluaki fai ki ai tana logo pea mo te Fakahā kātoa?

⁹ ʼI te ʼosi palalau ʼa Sehova, neʼe palalau leva ia Sesu, ʼo ina fai age ia te ʼu palalau fakaloto mālohi ʼaenī ki te kau faitotonu ʼaē ʼe natou lau ia te Fakahā: “Ko au, Sesu, neʼe au fekauʼi taku ʼāselo ke ina fakamoʼoni atu kiā koutou ia te ʼu meʼa ʼaia maʼa te ʼu kōkelekāsio. Ko au te aka pea mo te hako ʼo Tavite, pea mo te fetuʼu ʼaho gigila.” (Fakahā 22:16) ʼE moʼoni, neʼe fai tāfito ia te ʼu palalau ʼaia “ki te ʼu kōkelekāsio.” ʼE ko he logo neʼe ʼuluaki fai ki te kōkelekāsio ʼo te kau Kilisitiano fakanofo ʼi te kele. Ko meʼa fuli ʼaē ʼi te Fakahā, ʼe fai tāfito ki te kau Kilisitiano fakanofo, ʼaē kā nonofo anai ʼi te Selusalemi Foʼou. ʼAki ia te kōkelekāsio ʼaia, ʼe toe maʼu foki e te toe hahaʼi tokolahi ia te pilivilēsio ʼaē ke mahino ki te ʼu moʼoni faka polofetā maʼuhiga ʼaia.—Soane 17:18-21.

10. He koʼē ʼe fakahigoaʼi totonu e Sesu ia ia (a) ko “te aka pea mo te hako ʼo Tavite”? (b) ko “te fetuʼu ʼaho gigila”?

¹⁰ Neʼe fekauʼi ia Sesu Kilisito ke ina tala te Fakahā kiā Soane, pea ke tala e Soane ki te kōkelekāsio. Ko Sesu ʼe ko “te aka pea mo te hako ʼo Tavite.” ʼI tona ʼuhiga hako ʼo Tavite, ʼe tāu mo feʼauga ke Hau ʼi te Puleʼaga ʼo Sehova. ʼE toe liliu foki anai ko te “Tamai Heʼegata” ʼa Tavite ohagē ai ko he “aka” ʼo Tavite. (Isaia 9:6; 11:1, 10) ʼE ko ia ia te Hau ʼaē ʼe mole fetogi, pea mo maʼuli tuputupua ʼi te hōloga ʼo Tavite, ʼo ina fakahoko ia te fuakava ʼaē neʼe fai e Sehova mo Tavite, pea ʼe ko ia “te fetuʼu ʼaho gigila” ʼaē neʼe fakakikite ʼi te temi ʼo Moisese. (Faka au 24:17; Pesalemo 89:34-37) ʼE ko ia te “fetuʼu ʼaho” ʼaē ʼe hopo ake, ʼo faka mafoa ia te ʼaho. (2 Petelo 1:19) Ko te ʼu fai puleʼaki fuli ʼa te fili lahi ʼaē ko Papiloni Lahi, neʼe mole natou lava tāʼofi ia te hopo ake faka kolōlia ʼo te fetuʼu ʼaia.

“Haʼu!”

11. Koteā ia te fai fakaafe ʼaē ʼe fai e Soane ki te hahaʼi fuli, pea ko ai ʼaē ʼe feala ke ina tali?

¹¹ Pea neʼe palalau leva ia Soane. ʼAki he loto fakafetaʼi ʼo ʼuhiga mo te ʼu meʼa fuli ʼaē neʼe sio pea mo logo kiai, neʼe ina ʼui fēnei: “Pea ko te laumālie pea mo te fafine ʼohoana ʼe nā ʼui tuʼumaʼu: ‘Haʼu!’ Pea ko ʼaē ʼe fagono ke ina ʼui fēnei: ‘Haʼu!’ Pea ko ʼaē ʼe fia ʼinu ke haʼu; ko ʼaē ʼe loto kiai ke ina toʼo noa te vai ʼo te maʼuli.” (Fakahā 22:17) ʼE mole gata pē anai ki te toko 144 000 ia tanatou maʼu ia te ʼu lelei ʼo te sākilifisio faitotogi ʼa Sesu, heʼe ko te fakaafe ʼaenī ʼe fai ki te hahaʼi fuli. ʼE gāue te laumālie, peʼe ko te mālohi gāue ʼo Sehova ʼaki ia te kalasi ʼo te fafine ʼohoana, ʼo feala ai ke kotou fagono lelei ki te kalagaʼi ʼo te logo: “[Kotou] toʼo noa te vai ʼo te maʼuli.” (Vakaʼi mo Isaia 55:1; 59:21.) Ko ʼaē ʼe fia ʼinu ki te faitotonu, ʼe fakaafe ke “haʼu” ʼo fakaʼaogaʼi ia te faʼa foaki ʼa Sehova. (Mateo 5:3, 6) ʼE ko he toe pilivilēsio kiā nātou fuli ʼaē ko tanatou ʼamanaki ko te māʼuʼuli ʼi te kele, hanatou tali ia te fai fakaafe ʼaia ʼo te kalasi fakanofo ʼo Soane!

12. ʼE tali feafeaʼi e te toe hahaʼi tokolahi ia te fai fakaafe ʼaē ʼe tuʼu iā Fakahā 22:17?

¹² Talu mai te kamata ʼo te ʼu taʼu 1930, ko te toe hahaʼi tokolahi ʼaē ʼe haga tuputupu aipē neʼe “fagono” ki te fai fakaafe ʼaia. Ohagē ko tonatou ʼu kaugā pōpula fakanofo, ʼe natou maʼa iā muʼa ʼo Sehova. ʼE natou talitali ki te temi ʼaē kā hifo mai ai te Selusalemi Foʼou mai te lagi moʼo foaki ia te ʼu tapuakina ki te mālamanei. ʼI tanatou ʼosi fagono ʼaē ki te logo fakaofoofo ʼo te Fakahā, ʼe mole ʼui pē e te toe hahaʼi tokolahi “Haʼu!” kae ʼe natou toe gāue fakatahi moʼo tānaki mai te tahi ʼu hahaʼi ki te kautahi ʼa Sehova, ʼo akoʼi ia nātou ke natou toe kalagaʼi fēnei mo nātou: “Ko ʼaē ʼe fia ʼinu ke haʼu.” Koia ko te kaugamālie ʼo te toe hahaʼi tokolahi ʼe ʼāʼāsili tanatou tuputupu, ʼo natou toko 6 000 000 tupu, ʼi te ʼu fenua e 235 ʼi te kele kātoa, ʼo natou fakatahi ki te kalasi fakanofo ʼo te ʼohoana, ʼaē kua natou toko 8 000 tupu ʼi te temi nei, moʼo fakaafe ia te hahaʼi ke natou “toʼo noa te vai ʼo te maʼuli.”

13. Koteā ia te fakatokaga ʼaē neʼe fai e Sesu?

¹³ Neʼe toe ʼui fēnei e Sesu: “ ʼE au tala fakamoʼoni ki te tagata fuli pē ʼaē ʼe logo ki te ʼu palalau ʼo te lea faka polofetā ʼo te takaiga tohi ʼaenī: Kapau ʼe hilifaki e he tahi he meʼa ki te ʼu meʼa ʼaenī, pea ʼe hilifaki anai e te ʼAtua kiā te ia ia te ʼu tautea ʼaē ʼe tohi ʼi te takaiga tohi ʼaenī; pea kapau ʼe toʼo e he tahi ia he meʼa mai te ʼu folafola ʼo te takaiga tohi ʼo te lea faka polofetā ʼaenī, pea ʼe toʼo anai e te ʼAtua tona vahe ʼi te ʼu fuʼu ʼakau ʼo te maʼuli pea mo te kolo taputapu, ko te ʼu meʼa ʼaia kua tohi ʼi te takaiga tohi ʼaenī.”—Fakahā 22:18, 19.

14. ʼE tali feafeaʼi e te kalasi ʼo Soane ia “te lea faka polofetā” ʼo te Fakahā?

¹⁴ Ko nātou ʼo te kalasi ʼo Soane, ʼe tonu ke natou tala ke tokagaʼi ia “te lea faka polofetā” ʼo te Fakahā. ʼE mole tonu ke natou fufū peʼe natou hilifaki he tahi age ʼu meʼa kiai. ʼE tonu ke natou faka mafola fakahāhā ia te logo ʼaē ʼe tohi ai, ohagē ko tona ʼui e Sesu ʼo tala “ ʼi te ʼu ʼato fakaheketālaʼa.” (Mateo 10:27) Ko te Fakahā ʼe haʼu mai te ʼAtua. Ko ai ʼaē kā ina fia fetogi anai he kupu ʼi te ʼu kupu ʼaē neʼe ʼui totonu e te ʼAtua, pea mo ina fakahoko ʼaki ia ia ʼaē kua nofo Hau ʼi te temi ʼaenī, ia Sesu Kilisito? ʼE mahino ia, ko ʼaē ʼe ina fai anai ia te faʼahi ʼaia ʼe mole mālo anai ia ʼi te lele ki te maʼuli, pea ʼe hoko anai kiā te ia ia te ʼu tautea ʼaē ʼe tonu ke hoko ki Papiloni Lahi pea mo te mālamanei kātoa.

15. Koteā ia te faka ʼuhiga ʼo te ʼui ʼaē ʼe Sesu ʼe “ina fakamoʼoni ki te ʼu faʼahi ʼaia” pea “ ʼe au haʼu fakavilivili”?

¹⁵ Pea neʼe toe hoko atu e Sesu ʼaki te ʼu palalau fakaloto mālohi fakaʼosi: “ ʼE ʼui fēnei e ia ʼaē ʼe ina fakamoʼoni ki te ʼu faʼahi ʼaia, ‘ ʼIo; ʼE au haʼu fakavilivili.’ ” (Fakahā 22:20a) Ko Sesu ʼe ko “te fakamoʼoni agatonu pea mo moʼoni.” (Fakahā 3:14) Kapau ʼe ina fakamoʼoni ki te ʼu meʼa ʼaē neʼe hā ʼo te Fakahā, pea ʼe ko he ʼu meʼa moʼoni. Ko ia pea mo Sehova ʼAtua totonu, neʼe lahi te ʼu lakaga neʼe nā ʼui ai ʼe nā ʼomai “fakavilivili,” peʼe kua nā vave ʼomai pē, pea ʼi henī ko tona tuʼa nima ʼaē ia te ʼui e Sesu ʼe haʼu fakavilivili. (Fakahā 2:16; 3:11; 22:7, 12, 20) ʼE nā ‘ ʼomai’ moʼo fakahoko te fakamāu ki te fafine paomutu lahi, mo te ʼu “hau” peʼe ko te kau takitaki faka politike, pea mo nātou fuli ʼaē ʼe fakafeagai ki “te puleʼaga ʼo totatou ʼAliki [ko Sehova] pea mo tona Kilisito.”—Fakahā 11:15; 16:14, 16; 17:1, 12-14.

16. ʼI takotou ʼiloʼi ʼaē ʼe ʼomai fakavilivili ia Sehova ʼAtua pea mo Sesu, koteā ia te meʼa ʼaē ʼe tonu ke kotou faiga mālohi kiai?

¹⁶ Kapau ʼe kotou ʼiloʼi ko Sehova ʼAtua pea mo Sesu ʼe ʼomai fakavilivili, pea ʼe tonu ke ina fakaloto mālohiʼi koutou ke ‘mole kotou galoʼi te kua hoko mai ʼo te ʼaho ʼo Sehova.’ (2 Petelo 3:12) ʼE mole moʼoni te hagē ʼaē kua tuʼu mālohi ia te kele, ʼaē ko te tuʼu ʼa Satana. ʼE fakatemi pē ia te hagē ʼaē ʼe mālo ia te lagi, ʼaē ko te kau pule takitaki ʼo te mālamanei ʼaē ʼe puleʼi e Satana. ʼE lolotoga mole nei ia te ʼu meʼa ʼaia. (Fakahā 21:1) Ko te ʼu meʼa ʼaē ʼe mole feala ke pulihi, ʼe ko Sehova, mo tona Puleʼaga ʼaē ʼe takitaki e Sesu Kilisito, pea mo te mālama foʼou ʼaē neʼe ina fakapapauʼi mai. ʼAua naʼa galo kiā koutou ia te faʼahi ʼaia!—1 Soane 2:15-17.

17. Ko tokotou loto fakafetaʼi ki te ʼuhiga māʼoniʼoni ʼo Sehova ʼe tonu ke ina uga feafeaʼi koutou?

¹⁷ Koia, kotou tuku ke takitaki mālohi tokotou maʼuli e te ʼu meʼa ʼaē neʼe kotou ako ʼi te Fakahā. Neʼe mole koa lā malave kiā koutou ia te kolōlia pea mo te māʼoniʼoni ʼaupitō ʼo totatou Tupuʼaga, ʼi takotou sio ʼaē ki te ʼafioʼaga ʼa Sehova ʼi te lagi? (Fakahā 4:1–5:14) ʼI toe pilivilēsio leva hatatou tauhi ki he ʼAtua fēia! ʼOfa pē ke uga koutou e tokotou loto fakafetaʼi ki tona ʼuhiga māʼoniʼoni, ke kotou mulimuli lelei ki te ʼu tokoni ʼaē neʼe fai e Sesu ki te ʼu kōkelekāsio e fitu, pea mo kotou liʼaki ia te ʼu meʼa kovi ʼaē ko te mānumānu koloa, te tauhi tamapua, te ʼu aga heʼeʼaoga, te lotolotolua, te ʼapositasia, peʼe ko he faʼahiga meʼa pē ʼe feala ke fakafeagai ki takotou tauhi ʼaē kiā Sehova. (Fakahā 2:1–3:22) ʼE toe ʼaoga foki ki te toe hahaʼi tokolahi ia te ʼu palalau ʼaē neʼe fai e te ʼapositolo ko Petelo ki te kalasi ʼo Soane: “ ʼO ʼalutahi mo te Māʼoniʼoni ʼaē neʼe ina pāui koutou, ke kotou liliu mo koutou ʼo māʼoniʼoni ʼi takotou aga kātoa.”—1 Petelo 1:15, 16.

18. Ko te gāue fea ʼaē ʼe tonu ke kotou lagolago mālohi kiai, pea he koʼē ʼe tonu ke kotou faʼafai ʼi te gāue ʼaia iā ʼaho nei?

¹⁸ Tahi ʼaē meʼa, ke kotou fakafoʼou takotou faʼafai, ʼo kotou kalagaʼi ia “te taʼu ʼo te finegaloʼofa ʼo Sehova pea mo te ʼaho lagavaka ʼo totatou ʼAtua.” (Isaia 35:4; 61:2) Peʼe kotou kau ki te kiʼi faga ovi peʼe ki te toe hahaʼi tokolahi, kotou faiga fakamālotoloto ke kotou kau ki te fakahā ʼo te huaʼi ʼo te ʼu ʼipu e fitu ʼo te hauhau ʼo Sehova, ʼo kotou tala ia te ʼu fakamāu ʼa te ʼAtua ʼo ʼuhiga mo te mālama ʼa Satana. Tahi ʼaē meʼa, kotou kau fakatahi ki te kalagaʼi fakafiafia ʼo te logo lelei heʼegata ʼo ʼuhiga mo te Puleʼaga ʼo Sehova pea mo tana Kilisito, te Puleʼaga ʼaia ʼaē kua fakatuʼu ʼi te temi nei. (Fakahā 11:15; 14:6, 7) Kotou faʼafai ʼi te gāue ʼaia. Pea ʼofa pē ki te tokolahi ʼaē ʼe mole heʼeki tauhi kiā Sehova, ke natou mālama kua tou māʼuʼuli ʼi te ʼaho ʼo te ʼAliki, pea ke uga ai ia nātou ke natou lagolago ki te gāue ʼaē ko te kalagaʼi ʼo te logo lelei. ʼOfa pē mo nātou ʼaia ke natou tuputupu ʼo aʼu ki te foaki ʼo tonatou maʼuli ki te ʼAtua pea mo natou papitema. Kotou manatuʼi, “kua ovi mai te temi ʼaē kua fakakatofa”!—Fakahā 1:3.

19. Koteā ia te ʼu palalau fakaʼosi ʼaē neʼe fai e te ʼapositolo matuʼa ko Soane, pea ʼe ina uga koutou kiteā?

¹⁹ ʼO fakatahi mo Soane, ʼe tou faikole fakamālotoloto fēnei: “Ameni! Haʼu, ʼAliki Sesu.” Pea neʼe toe ʼui fēnei e te ʼapositolo matuʼa ʼaia: “ ʼOfa pē ke nofo ia te ʼofa makehe ʼo te ʼAliki ko Sesu Kilisito mo te kau māʼoniʼoni.” (Fakahā 22:20b, 21) ʼOfa pē mo koutou ʼaē ʼe kotou lau ia te tohi ʼaenī, ke kotou maʼu ia te ʼofa makehe ʼaia, mo kotou fakatui kua ovi mai ia te ikuʼaga lahi ʼo te Fakahā, ke feala mo koutou hakotou ʼui fakatahi mo mātou ʼaki he loto kātoa “Ameni!”

[Paki ʼo te pasina 314]

“ ʼE nonofo ʼi tuʼa te faga kulī . . . ”

[Paki ʼo te pasina 315]

‘Fiafia ia nātou ʼaē ʼe . . . feala hanatou hū ʼi te ʼu matapā ʼo te kolo’