Kapite 36

Te Lahi ʼo Te Tui ʼa Te Ofisie

ʼI TE temi ʼaē neʼe fai ai e Sesu tana Akonaki ʼi te moʼuga, neʼe kua teitei vaelua te temi ʼaē neʼe kua ina fai ʼo tona minisitelio. Ko tona faka ʼuhiga kei toe pe te taʼu katoa pea mo māhina e hiva kia ia ke ina fakaʼosi tana gāue ʼi te kele.

Kua hū leva ʼi te lakaga ʼaē ia Sesu ki te kolo ko Kapenaume, ʼaia neʼe ina fakatuʼutuʼu ai tana gāue ʼi ʼona tafaʼaki. Koia neʼe ʼōmai ai leva te ʼu tagata ʼāfea ʼo te kau Sutea ʼo fai ki ai tanatou kole. Neʼe fekauʼi mai ia nātou e te ofisie ʼo te solia Loma, ko te Senitile, ko tona ʼuhiga ʼaē ko te tagata ʼo te tahi lanu ka mole ko he tagata Sutea.

Ko te tagata ʼaia ʼe ʼi ai tana tagata kaugana ʼe maʼuhiga ʼaupito kia ia pea kua vave mate ʼuhi heʼe kovi ʼaupito tona mahaki; ʼe loto ia ke fakamālōlō e Sesu tana tagata kaugana. Neʼe kole mamahi age e te kau Sutea kia Sesu ke ʼofa age ki te kole ʼa te ofisie: “ ʼE ʼaoga ke ke tali te kole ʼa te tagata ʼaia, ko tanatou ʼui age ʼaia, heʼe ʼofa ia ki totatou hahaʼi pea ʼe ko ia ʼaē neʼe ina laga te sinakoka.”

Neʼe muli atu aipe ia Sesu ia nātou. Kae, ʼi tanatou ōvi atu ki te ʼapi, neʼe fekauʼi mai e te ofisie tona ʼu kaumeʼa ke nātou ʼōmai ʼo ʼui age ki ai: “ ʼAliki ʼaua naʼa ke fakakinakina kia te koe, heʼe mole tau mo ʼau ke ke hū ki toku loto fale. Koia neʼe ʼau mahalo ai ʼe mole tau mo ʼau ke ʼau ʼalu atu kia te koe.”

ʼI agavaivai leva ʼe maʼu e te ofisie ʼaia kae ko te faʼahiga ʼe māhani ia ʼi te fakatotonu meʼa! Kae mahino ia e lagi manatu kia Sesu, heʼe ina ʼiloʼi te agaʼi fenua ʼaē ʼe ina tapuʼi te felogoi ʼa te kau Sutea mo te hahaʼi ʼe mole Sutea. Māʼia mo Petelo neʼe ina fai te talanoa ʼaenī: “ ʼE koutou ʼiloʼi lelei pe ʼe mole gafua ki he tagata Sutea ke fakatahi mo he tagata ʼo he tahi atu lanu peʼe ko hana fakaōvi ki ai.”

Neʼe mole loto ia ke maumauʼi e Sesu te agaʼi fenua ʼaia pea mo hoko ai kia ia hona ʼu fua kovi, koia neʼe fekauʼi ai e te ofisie tona ʼu kaumeʼa ke nātou ʼolo ʼo kole age ki ai: “Fai he fakatotonu, pea ke mālōlō ai taku tagata kaugana! Heʼe toe feiā mo ʼau, ko ʼau ko te tagata ʼe nofo ʼi te pule ʼa ʼihi, pea ʼe ʼi ai mo te kau solia ʼe ʼau pule ki ai, pea ʼe ʼau ʼui age ki he tahi: ‘ ʼAlu!’ pea ʼalu ia, pea ki he tahi age: ‘Haʼu!’ pea ʼe haʼu ia, pea ki taku sinifu: ‘Fai te meʼa ʼaē!’ pea ʼe ina fai ia.”

ʼI te fagono ʼa Sesu ki te lea ʼaia, neʼe ōfo ia. “ ʼE ʼau tala moʼoni atu kia koutou, ko tana ʼui age ʼaia, neʼe heʼeki ʼau maʼu ʼi he tahi ʼi Iselaele he tui ʼe fēnei hona lahi.” ʼI te ʼosi ʼo tana fakamālōlō te tagata kaugana ʼa te ofisie, neʼe fakahā ai e Sesu ko te hahaʼi ʼaē ʼe mole Sutea ʼaē ʼe nātou maʼu te tui ʼe foaki fakaʼofa anai kia nātou te ʼu tapuakina ʼaē ʼe fakafisi kiai te kau Sutea ʼaē ʼe mole tui.

“ ʼE tokolahi anai ia nātou, ko te tala age ʼaia ʼa Sesu, ʼe ʼōmai mai te ʼu potu fenua ʼo te hopoʼaga ʼo te laʼā pea mo te ʼu potu fenua ʼo te tōʼaga ʼo te laʼā, pea ʼe nātou heheka anai ʼi te laupapa kai mo Apalahamo pea mo Isaake pea mo Sakopo ʼi te puleʼaga ʼo selo; ka ki te ʼu foha ʼo te puleʼaga, ʼe laku anai ia nātou ki te fakapōʼuli ʼo tuʼa. Pea ʼe fai anai ʼi ai ʼanatou tagi pea mo ʼanatou makiki nifo.”

“Ki te ʼu foha ʼo te puleʼaga (...) ʼe laku anai ia nātou ki te fakapōʼuli ʼo tuʼa” ʼe ko te kau Sutea ʼaē neʼe mole nātou tali te fakaafe ʼaē neʼe ʼuluaki fai age muʼa kia nātou, ke nātou hau mo Kilisito. Ko Apalahamo, mo Isaake, pea mo Sakopo ʼe nātou fakatātā te agaaga ʼo te fakatuʼutuʼu ʼo te Puleʼaga ʼo te ʼAtua. Neʼe fakahā e Sesu ʼe tali anai te kau Senitile ki te laupapa faka selo, “ ʼi te puleʼaga ʼo selo”. Luka 7:1-10; Mateo 8:5-13; Gāue 10:28.

▪ He koʼe neʼe kole mamahi age e te kau Sutea kia Sesu ke ʼofa age ki te ofisie senitile?

▪ Koteā te tupuʼaga ʼo te mole fakaafe e te ofisie ia Sesu ke hū ake ki tona loto fale?

▪ Koteā te faka ʼuhiga ʼo te ʼu palalau fakaʼosi ʼa Sesu?