Ako 5
Te Fakatuʼutuʼu ʼa Te ʼAtua Ki Te Kele
He koʼe neʼe fakatupu e Sehova te kele? (1, 2)
He koʼe ko te kele ʼe mole ko he palatiso ʼi te temi nei? (3)
Koteā anai ka hoko ki te hahaʼi agakovi? (4)
ʼI te temi ka haʼu, koteā anai ka fai e Sesu ʼo ʼuhiga mo te mahaki? te matutuʼa? te mate? (5, 6)
Kapau ʼe koutou fia kau ki te ʼu tapuakina ʼo te temi ka haʼu, koteā ʼaē ʼe tonu ke koutou fai? (7)
1. Neʼe fakatupu e Sehova te kele ke maʼuʼuli fiafia ai te hahaʼi ʼo talu ai. Neʼe loto ia ke nofoʼi tuʼumaʼu te kele e ni hahaʼi agatonu pea mo fiafia. (Pesalemo 115:16; Isaia 45:18) ʼE mole fakaʼauha anai ʼi he temi te kele; ʼe tuʼu anai ʼo talu ai.—Pesalemo 104:5; Tagata Tānaki 1:4.
2. ʼI muʼa ʼo te fakatupu e te ʼAtua ia te tagata, neʼe Ina filifili te potu veliveli ʼi te kele pea neʼe ina fakaliliu ko he palatiso taulekaleka. Neʼe ina fakahigoaʼi te koga meʼa ʼaia ko te ʼōloto ʼo Eteni. Neʼe ina tuku kiai te ʼuluaki tagata mo te ʼuluaki fafine, ia Atama mo Eva. Neʼe fakatuʼutuʼu e te ʼAtua ke nā maʼu he ʼu fānau pea ke nā fakafonu te kele katoa. ʼAki te temi, neʼe tonu ke nā fakaliliu te kele katoa ko he palatiso.—Senesi 1:28; 2:8, 15.
3. ʼAki tonā loto faʼitaliha neʼe talagataʼa ia Atama mo Eva ki te lao ʼa te ʼAtua. Koia neʼe kapu ai nāua e Sehova mai te ʼōloto ʼo Eteni. Neʼe puli ai te palatiso. (Senesi 3:1-6, 23) Kae neʼe mole galo kia Sehova tana fakatuʼutuʼu ʼo ʼuhiga mo te kele. ʼE ina fakapapau ke ina fakaliliu ko he palatiso, ke maʼuli te tagata ʼo heʼegata. ʼE ina fakahoko feafeaʼi anai te faʼahi ʼaia?—Pesalemo 37:29.
4. ʼI muʼa ʼo te fakaliliu ʼo te kele ko he palatiso, ʼe tonu muʼa ke pulihi te hahaʼi agakovi. (Pesalemo 37:38) ʼE hoko anai te faʼahi ʼaia ʼi Halamaketone, te tau ʼaē ka fakahoko e te ʼAtua moʼo fakagata ʼo te agakovi. ʼOsi ʼaia, pea ʼe pilisoniʼi anai ia Satana lolotoga ni ʼu taʼu e 1 000. Ko tona faka ʼuhiga, ʼe mole tuku anai ki te kau agakovi ke nātou maumauʼi te kele. ʼE ko te hahaʼi ʼāteaina pe ʼa Sehova ʼaē ka hāo anai.—Fakahā 16:14, 16; 20:1-3.
5. Pea, ʼi tona ʼuhiga hau, ʼe puleʼi anai e Sesu Kilisito te kele ia taʼu e 1 000. (Fakahā 20:6) ʼE ina pulihi māmālie anai te agahala ʼi totatou ʼu ʼatamai pea mo totatou ʼu sino. ʼE tou liliu anai ko he ʼu hahaʼi haohaoa ohage pe ko Atama mo Eva ʼi muʼa ʼo tanā agahala. Pea ʼe mole toe ʼi ai anai te mahaki, te matutuʼa, pea mo te mate. Ko te hahaʼi ʼaē ʼe mahahaki ʼe fakamālōlō anai ia nātou, pea ko te hahaʼi matutuʼa ʼe nātou toe liliu anai ʼo tūpulaga.—Sopo 33:25; Isaia 33:24; Fakahā 21:3, 4.
6. Lolotoga te ʼAfio ʼa Sesu ia Taʼu e Afe, ʼe gāue anai te hahaʼi agatonu moʼo fakaliliu te kele katoa ko he palatiso. (Luka 23:43) ʼE toe fakatuʼuake anai ʼi te kele te ʼu lauʼi miliona hahaʼi ʼaē kua mamate. (Gāue 24:15) Kapau ʼe nātou fai te ʼu meʼa ʼaē ʼe fakamaʼua e te ʼAtua kia nātou, ʼe toe hoko atu anai tonatou maʼuli ʼi te kele ʼo talu ai. Kapau ʼe mole nātou fai te faʼahi ʼaia, ʼe fakaʼauha anai ia nātou ʼo talu ai.—Soane 5:28, 29; Fakahā 20:11-15.
7. Pea ʼe hoko anai te fakatuʼutuʼu ʼuluaki ʼa te ʼAtua ʼo ʼuhiga mo te kele. ʼE koutou fia maʼu anai koa te ʼu tapuakina ʼaia ʼaē ka hoko mai? Kapau koia ʼaia, pea ʼe tonu ke hoko atu takotou ako ʼo ʼuhiga mo Sehova pea mo koutou fakalogo ki te ʼu meʼa ʼaē ʼe ina fakamaʼua atu. Ko te kau ki te ʼu fono ʼi te Fale ʼo te Puleʼaga ʼa te kau Fakamoʼoni ʼa Sehova, ʼi tokotou kolo, ʼe tokoni anai kia koutou ke koutou fai te faʼahi ʼaia.—Isaia 11:9; Hepeleo 10:24, 25.
[Paki ʼo te pasina 10]
Te palatiso ʼaē neʼe puli
[Paki ʼo te pasina 11]
ʼI te hili ʼo Halamaketone, ʼe liliu anai te kele ko he palatiso