Ako 6
Koteā Te Puleʼaga ʼo Te ʼAtua?
ʼE tuʼu ʼifea te Puleʼaga ʼo te ʼAtua? (1) Ko ai tona Hau? (2)
ʼE ʼi ai koa niʼihi ʼe nātou vaevae te pule mo te Hau? Kapau koia, pea ko te tokofia? (3)
Koteā ʼaē ʼe hā ai ʼe tou maʼuʼuli ʼi te ʼu ʼaho fakamuli? (4)
Koteā anai ka fai e te Puleʼaga ʼo te ʼAtua ki te malamanei, ʼi te temi ka haʼu? (5-7)
1. ʼI tana ʼi te kele, neʼe akoʼi e Sesu ki tana ʼu tisipulo ke nātou faikole ʼo ʼuhiga mo te Puleʼaga ʼo te ʼAtua. Ko he puleʼaga ʼe takitaki e te hau. ʼE makehe te Puleʼaga ʼo te ʼAtua. ʼE tuʼu ia ʼi te lagi pea ʼe ina puleʼi anai te kele nei. ʼE ina faka tāpuhā anai peʼe ina faka maʼoniʼoniʼi anai te huafa ʼo te ʼAtua. ʼE ina fakahoko anai te finegalo ʼo te ʼAtua ʼi te kele ohage ko selo.—Mateo 6:9, 10.
2. Neʼe fakapapau e te ʼAtua ko Sesu ʼaē ka liliu anai ko te Hau ʼo Tona Puleʼaga. (Luka 1:30-33) ʼI te temi ʼaē neʼe maʼuli ai Sesu ʼi te kele, neʼe ina fakamoʼoni ai ʼe liliu anai ko he Pule agalelei, faitotonu mo haohaoa. ʼI te temi ʼaē neʼe toe liliu ai ki te lagi, neʼe mole fakanofo atu aipe ko te Hau ʼo te Puleʼaga ʼo te ʼAtua. (Hepeleo 10:12, 13) ʼI te taʼu 1914, neʼe foaki e Sehova kia Sesu te ʼuhiga pule ʼaē neʼe Ina fakapapau age ki ai. Talu mai ai, ʼe pule ia Sesu ʼi te lagi ko te Hau ʼaē neʼe fakanofo e Sehova.—Taniela 7:13, 14.
3. Neʼe toe fili e Sehova niʼihi ʼu tagata mo fafine agatonu ʼi te kele ke nātou ʼolo ki te lagi. ʼE nātou puleʼi fakatahi anai te kele mo Sesu ʼi tonatou ʼuhiga hau, tuʼi fakamāu, pea mo pelepitelo. (Luka 22:28-30; Fakahā 5:9, 10) Neʼe fakahigoaʼi e Sesu tana ʼu kaugā gāue ʼi tona Puleʼaga ko te “kiʼi faga ōvi.” Ko te toko 144 000.—Luka 12:32; Fakahā 14:1-3.
4. ʼI te ʼosi fakanofo Hau ʼo Sesu, neʼe ina kapu pea mo lī ifo ia Satana pea mo tana kau ʼaselo agakovi mai te lagi ki te kele. Ko te tupuʼaga la ʼaia ʼo te kua kovi ʼaupito ʼo te malamanei talu mai te taʼu 1914. (Fakahā 12:9, 12) Ko te ʼu tau, te ʼu hoge, te ʼu mahaki, te tuputupu ʼo te meʼa noaʼi ʼo te lao—ko te ʼu meʼa fuli ʼaia ʼe kau ki te “fakaʼiloga” ʼaē ʼe ina fakahā ai kua ʼafio ia Sesu pea ʼe fakahā ʼaki ai kua vave pulihi te tuʼu ʼaenī.—Mateo 24:3, 7, 8, 12; Luka 21:10, 11; 2 Timoteo 3:1-5.
5. Kua ōvi mai te temi ʼaē ka fakamāuʼi ai e Sesu, ʼo ina vaheʼi te ʼu ōvi mai te ʼu tao ohage ko he tagata tauhi ōvi. Ko te ʼu “ōvi” ʼe ko nātou ʼaē ka nofo agatonu anai kia te ia. ʼE nātou maʼu anai te maʼuli heʼegata ʼi te kele. Ko te ʼu “tao” ʼe ko nātou ʼaē ka nātou līaki anai te Puleʼaga ʼo te ʼAtua. (Mateo 25:31-34, 46) ʼI te temi ka haʼu ʼaē kua ōvi mai, ʼe fakaʼauha anai e Sesu ia nātou fuli ʼaē ʼe hage ko ni ʼu tao. (2 Tesalonika 1:6-9) Kapau ʼe koutou fia liliu ko he ʼu “ōvi” ʼa Sesu, ʼe tonu ke koutou fagono ki te logo ʼo te Puleʼaga pea mo koutou maʼuliʼi te ʼu meʼa ʼaē ʼe koutou ako.—Mateo 24:14.
6. ʼI te temi nei, kua vaevae fakafenua te kele. ʼE tahi maʼu e te ʼu fenua ʼaia tona puleʼaga. ʼE tautau fetauʼaki te ʼu fenua ʼaia. Kae ʼe fetogi anai e te Puleʼaga ʼo te ʼAtua te ʼu puleʼaga fakatagata fuli. Ko te puleʼaga pe ʼaia e tahi ʼe pule anai ki te kele katoa. (Taniela 2:44) Pea ʼe mole toe ʼi ai anai he ʼu tau, he ʼu fai fakapō, pea mo he agamālohi. ʼE maʼuʼuli fakatahi anai te hahaʼi fuli ʼi te tokalelei pea mo te logo tahi.—Mikea 4:3, 4.
7. Lolotoga te ʼu Taʼu e Afe ʼaē ʼe nofo Hau ai ia Sesu, ʼe liliu anai te hahaʼi agatonu ʼo haohaoa, pea ʼe liliu anai te kele katoa ko he palatiso. ʼI te fakaʼosi ʼo te ʼu taʼu e afe, kua ʼosi fakahoko anai e Sesu te ʼu meʼa fuli ʼaē neʼe kole age e te ʼAtua ke ina fai. Pea ʼe ina toe liufaki anai te Puleʼaga ki tana Tāmai. (1 Kolonito 15:24) He koʼe ʼe mole koutou fakahā ki tokotou ʼu kaumeʼa pea mo nātou ʼaē ʼe koutou ʼoʼofa ai, te ʼu meʼa ʼaē ka fai anai e te Puleʼaga ʼo te ʼAtua?
[Paki ʼo te pasina 13]
ʼI te pule ʼa Sesu, ʼe mole toe ʼi ai anai he fehiʼa pea mo he fakapalatahi