Ako 7
Tou Fakaōvi Ki Te ʼAtua ʼi Te Faikole
He koʼe ʼe maʼuhiga ke tou faikole tuʼumaʼu? (1)
ʼE tonu ke koutou faikole kia ai, pea ʼe tonu ke feafeaʼi takotou ʼu kole? (2, 3)
Koteā te ʼu meʼa ʼaē ʼe feala ke koutou ʼui ʼi takotou ʼu kole? (4)
Ko te temi fea ʼaē ʼe tonu ai ke koutou faikole? (5, 6)
ʼE fagono koa te ʼAtua ki te ʼu faikole fuli pe? (7)
1. Ko te faikole ʼe ko he palalau ki te ʼAtua ʼaki he loto agavaivai. ʼE tonu ke koutou faikole tuʼumaʼu ki te ʼAtua. Kapau ʼe koutou faikole pea ʼe feala ai ke koutou fakaōvi kia te ia ohage ko hokotou kaumeʼa lelei. Ko Sehova ʼe lahi mo mālohi ʼaupito, kae ʼe fagono ki tatatou ʼu faikole! ʼE koutou faikole tuʼumaʼu koa ki te ʼAtua?—Pesalemo 65:2; 1 Tesalonika 5:17.
2. Ko te faikole ʼe kau ki tatatou tauhi. Koia, ʼe tonu anai ke tou faikole ʼāteaina pe ki te ʼAtua, ia Sehova. ʼI te temi ʼaē neʼe maʼuli ai Sesu ʼi te kele, neʼe faikole tuʼumaʼu ki tana Tāmai, kae neʼe mole faikole ia ki he tahi kehe. ʼE tonu ke tou faʼifaʼitaki ki ai. (Mateo 4:10; 6:9) Kae, ko tatatou ʼu faikole fuli ʼe tonu anai ke fai ʼaki te huafa ʼo Sesu. ʼE tou fakahā ʼaki ai ʼe tou fakaʼapaʼapa ki te tuʼulaga ʼo Sesu pea ʼe tou tui ki tana sakilifisio faitotogi.—Soane 14:6; 1 Soane 2:1, 2.
3. Ka tou faikole, ʼe tonu ke tou palalau ki te ʼAtua ʼaki te ʼu meʼa ʼaē ʼi totatou loto. ʼE mole tonu ke tou ako fakaʼatamai tatatou ʼu faikole peʼe tou fai tatatou ʼu kole ʼaia ʼo lau ʼi he tohi faikole. (Mateo 6:7, 8) ʼE tonu ke tou aga fakaʼapaʼapa mokā tou faikole, ʼe feala ke tou faikole ʼi te temi fuli pe, pea ʼi te potu fuli pe. ʼE toe logoʼi foki e te ʼAtua te ʼu kole ʼaē ʼe tou fai fakalogologo ʼi totatou loto. (1 Samuele 1:12, 13) ʼE lelei hakita kumi he faʼahi ʼe lāvaki ke tou faikole ai.—Maleko 1:35.
4. Koteā te ʼu meʼa ʼe feala ke koutou ʼui ʼi takotou ʼu kole? ʼE feala ke koutou faikole ʼo ʼuhiga mo te ʼu meʼa fuli ʼaē ʼe feala ke fakatupu kovi ki tokotou vāhaʼa lelei mo ia. (Filipe 4:6, 7) ʼE fakahā e te faikole faʼifaʼitaki ʼo te Tāmai ʼe ʼi selo, ʼe tonu ke tou faikole ʼo ʼuhiga mo te huafa ʼo Sehova pea mo tana fakatuʼutuʼu. ʼE toe feala pe foki ke tou toe kole ke ina foaki mai te ʼu meʼa ʼaē ʼe ʼaoga kia tatou ʼi te faʼahi fakasino, ke fakamolemole tatatou ʼu agahala, pea mo tokoni mai kia tatou ke tou tauʼi te fakahala. (Mateo 6:9-13) ʼE mole tonu ke tou faikole ʼo manatu pe kia tatou. ʼE tonu ke tou faikole tāfito ʼo ʼuhiga mo te ʼu meʼa ʼaē ʼe ʼalutahi mo te finegalo ʼo te ʼAtua.—1 Soane 5:14.
5. ʼE mole he temi kua fakatuʼutuʼu ke koutou faikole ai ʼo fakafetaʼi pea mo fakavikiviki ki te ʼAtua, kae ʼe fakalogo ki tokotou loto. (1 Fakamatala 29:10-13) ʼE tonu ke koutou faikole ʼi te temi ʼaē ʼe koutou felāveʼi ai mo he ʼu fihifihia pea mo te temi ʼaē ʼe ʼahiʼahiʼi ai takotou tui. (Pesalemo 55:22; 120:1) ʼE lelei te faikole ʼi muʼa ʼo takotou kakai. (Mateo 14:19) ʼE fakaafe tatou e Sehova ke tou faikole “ ʼi te temi fuli pe.”—Efesi 6:18.
6. ʼE ʼaoga tāfito ke tou faikole mo kapau neʼe tou fai he agahala mamafa. ʼI te ʼu taʼi lakaga ʼaia, ʼe tonu ke tou kole mamahi te manavaʼofa ʼo Sehova pea mo kole ke fakamolemole mai kia tatou. Kapau ʼe tou fakahā tatatou ʼu agahala kia te ia pea mo tou faiga ke mole tou toe fai te ʼu agahala ʼaia, ko te ʼAtua ʼe “fakamolemole gafua” anai kia tatou.—Pesalemo 86:5; Tāʼaga Lea 28:13.
7. ʼE fakalogo pe e Sehova te ʼu faikole ʼa te hahaʼi ʼaē ʼe faitotonu. Kapau ʼe koutou loto ke fakalogo te ʼAtua ki takotou ʼu faikole, pea ʼe tonu ke koutou faiga mālohi ke koutou mulimuli ki tana ʼu lao. (Tāʼaga Lea 15:29; 28:9) ʼE tonu ke koutou agavaivai mokā koutou faikole. (Luka 18:9-14) ʼE tonu ke koutou faiga ke koutou mulimuli ki te ʼu meʼa ʼaē ʼe koutou faikole kiai. ʼE koutou fakahā ai anai ʼe koutou tui pea mo mahino lelei ki te ʼuhiga ʼo te ʼu meʼa ʼaē ʼe koutou kole. Kapau ʼe koutou fai te ʼu meʼa ʼaia, ʼe tali anai e Sehova takotou ʼu faikole.—Hepeleo 11:6.