Ako 8
Ko Te Maʼuli Faka Famili ʼAē ʼe Leleiʼia e Te ʼAtua
Koteā te tuʼulaga ʼo te tagata ʼi te famili? (1)
ʼE tonu ke gaohi feafeaʼi e te tagata tona ʼohoana? (2)
Koteā te ʼu maʼua ʼo te tāmai? (3)
Koteā te tuʼulaga ʼo te fafine ʼi te famili? (4)
Koteā ʼaē ʼe fakamaʼua e Sehova ki te ʼu mātuʼa pea mo te fānau? (5)
Koteā te manatu ʼa te Tohi-Tapu ʼo ʼuhiga mo te tahi nofo ʼa te taumatuʼa pea mo te mavete? (6, 7)
1. ʼE ʼui e te Tohi-Tapu ko te tagata ko te pule ʼo tona famili. (1 Kolonito 11:3) ʼE tonu ke ʼohoana te tagata mo he fafine pe e tahi. ʼE tonu ke nā ʼolo fakalelei ʼo fakatapu ʼo mulimuli ki te lao.—1 Timoteo 3:2; Tito 3:1.
2. ʼE tonu ke ʼofa te tagata ki tona ʼohoana ohage pe ko tana ʼofa ʼaē kia ia totonu. ʼE tonu ke ina gaohi lelei ia ia ohage ko te gaohi leleiʼi e Sesu tana ʼu tisipulo. (Efesi 5:25, 28, 29) ʼE mole tonu ʼi he temi ke ina tā tona ʼohoana peʼe ina gaohi koviʼi ia ia. Kae, ʼe tonu ke ina faka maʼuhigaʼi ia ia pea mo fakaʼapaʼapa ki ai.—Kolose 3:19; 1 Petelo 3:7.
3. ʼE tonu ke gāue kinakina te tāmai moʼo foaki te ʼu meʼa ʼaē ʼe ʼaoga ki tona famili. ʼE tonu ke ina foaki te meʼa kai, te mutuʼi meʼa, pea mo he nofoʼaga ki tona ʼohoana pea mo tanā fānau. Tahi ʼaē meʼa, ʼe tonu ki te tāmai ke ina foaki ki tona famili te ʼu meʼa ʼaē ʼe ʼaoga ʼi te faʼahi fakalaumālie. (1 Timoteo 5:8) ʼE ina takitaki tona famili ʼo tokoni kia nātou ke nātou ako ʼo ʼuhiga mo te ʼAtua pea mo Tana ʼu fakatuʼutuʼu.—Teutalonome 6:4-9; Efesi 6:4.
4. Ko te fafine ʼe tonu ke tokoni lelei ki tona ʼohoana. (Senesi 2:18) ʼE tonu ke tokoni ki tona ʼohoana, ʼo ina akoʼi pea mo ina akonakiʼi tanā fānau. (Tāʼaga Lea 1:8) ʼE fakamaʼua e Sehova ki te fafine ʼohoana ke tokaga ki tona famili ʼaki te ʼofa. (Tāʼaga Lea 31:10, 15, 26, 27; Tito 2:4, 5) ʼE tonu ke fakaʼapaʼapa lahi ki tona ʼohoana.—Efesi 5:22, 23, 33.
5. ʼE fakamaʼua e te ʼAtua ke fakalogo te ʼu fānau ki tanatou ʼu mātuʼa. (Efesi 6:1-3) ʼE ina loto ke akoʼi pea mo fakatonutonuʼi e te ʼu mātuʼa tanatou ʼu fānau. ʼE ʼaoga ki te ʼu mātuʼa ke nātou fakatahi mo tanatou ʼu fānau pea mo ako te Tohi-Tapu mo nātou, ʼo nātou tokakaga ki te ʼu meʼa ʼaē ʼe ʼaoga kia nātou ʼi te faʼahi fakalaumālie pea mo te ʼu meʼa ʼaē ʼi tonatou loto. (Teutalonome 11:18, 19; Tāʼaga Lea 22:6, 15) ʼE mole tonu ʼi he temi ke akonakiʼi e te ʼu mātuʼa tanatou ʼu fānau ʼaki he aga fefeka pea mo he aga fekai.—Kolose 3:21.
6. Kapau ʼe mole felogoi lelei he taumatuʼa, ʼe tonu ke nā faigaʼi ke nā maʼuliʼi te ʼu tokoni ʼa te Tohi-Tapu. ʼE uga tatou e te Tohi-Tapu ke tou fakahā te ʼofa pea mo te loto fakamolemole. (Kolose 3:12-14) ʼE mole fakaneke e te Folafola ʼa te ʼAtua ke mavete faka temi he taumatuʼa moʼo fakatokatoka ʼo he ʼu kiʼi fihifihia. Kae ʼe feala ke filifili e te fafine ke mole nofo tahi mo tona ʼohoana mo kapau (1) ʼe mole ina fia foaki te ʼu meʼa ʼaē ʼe ʼaoga ki tona famili, (2) mo kapau ʼe agamālohi ʼo fakatupu tuʼutāmaki ki tona maʼuli, peʼe (3) kapau ko tana fakafeagai ʼe faigataʼa ai ki tana tauhi ʼaē kia Sehova.—1 Kolonito 7:12, 13.
7. ʼE tonu ke fenofoleleiʼaki te ʼu taumatuʼa. Ko te tono ʼe ko he agahala ia ki te ʼAtua pea mo tokita hoa. (Hepeleo 13:4) Ko te tono ʼe ko te tupuʼaga pe ʼaia e tahi ʼe feala ai ke mavete he Kilisitiano mo tona hoa pea mo feala ke toe ʼohoana. (Mateo 19:6-9; Loma 7:2, 3) ʼE fehiʼa ia Sehova ki te faʼahi ʼaia mokā mavete te hahaʼi kae mole hona tāfito faka Tohi-Tapu, ʼo toe ʼohoana mo he tahi kehe.—Malakia 2:14-16.
[Paki ʼo te pasina 17]
ʼE loto e te ʼAtua ke akoʼi e te ʼu mātuʼa tanatou fānau pea mo fakatonutonuʼi ia nātou
[Paki ʼo te pasina 17]
Ko he tāmai ʼofa ʼe ina foaki ki tona famili te ʼu meʼa ʼaē ʼe ʼaoga kia nātou ʼi te faʼahi fakasino pea mo te faʼahi fakalaumālie