Ako 9

ʼE Tonu Ke Maʼa Te Kau Kaugana ʼa Te ʼAtua

He koʼe ʼe tonu ke tou maʼa ʼi te ʼu faʼahi fuli? (1)

Koteā te faka ʼuhiga ʼo te ʼui ʼaē ke tou maʼa ʼi te faʼahi fakalaumālie? (2) ke tou maʼa ʼi te ʼu aga ʼaē ʼe tonu ke fai? (3) ke tou maʼa ʼi te ʼatamai? (4) ke tou maʼa ʼi te faʼahi fakasino? (5)

Koteā te ʼu faʼahiga palalau heʼemaʼa ʼaē ʼe tonu ke tou tekeʼi? (6)

1. Ko Sehova ʼAtua ʼe maʼa pea mo maʼoniʼoni. ʼE ina loto ke nofo maʼa tana kau atolasio​—⁠ʼi te faʼahi fakalaumālie, ʼi te ʼu aga ʼaē ʼe tonu ke fai, ʼi te ʼatamai, pea mo te faʼahi fakasino. (1 Petelo 1:16) ʼE mole ko he meʼa faigafua hakita nofo maʼa ia mata ʼo te ʼAtua. ʼE tou maʼuʼuli ʼi te mālama ʼe heʼemaʼa. Tahi ʼaē meʼa, ʼe tonu ke tou tauʼi totatou ʼu holi ʼaē ke tou fai te meʼa ʼaē ʼe kovi. Kae ʼe mole tonu ke tou tuku tatatou ʼu faiga.

2. Tou Nofo Maʼa ʼi Te Faʼahi Fakalaumālie: Kapau ʼe tou fia tauhi kia Sehova, ʼe mole feala ke tou haga lagolago ki he ʼu faʼahiga akonaki peʼe ko he ʼu agaʼi fenua ʼo te lotu hala. ʼE tonu ke tou mavae mai te lotu hala pea ke mole tou toe lagolago kiai. (2 Kolonito 6:​14-18; Fakahā 18:⁠4) ʼI tatatou ako te moʼoni ʼo ʼuhiga mo te ʼAtua, ʼe tonu ke tou tokakaga ke mole fakahēʼi tatou e ni hahaʼi ʼe nātou faiakonaki loi.​—⁠2 Soane 10, 11.

3. Tou Nofo Maʼa ʼi Te ʼu Aga ʼAē ʼe Tonu Ke Fai: ʼE loto e Sehova ki tana kau atolasio ke nātou taupau te aga faka Kilisitiano moʼoni ʼi te temi fuli pe. (1 Petelo 2:12) ʼE sio kia meʼa fuli ʼaē ʼe tou fai, ʼo feiā aipe mo te ʼu meʼa ʼaē ʼe tou fai fakafūfū. (Hepeleo 4:13) ʼE tonu ke tou tekeʼi te ʼu aga fakasino heʼeʼaoga pea mo ʼihi ʼu aga heʼemaʼa ʼo te mālama ʼaenī.​—⁠1 Kolonito 6:​9-11.

4. Tou Nofo Maʼa ʼi Totatou ʼAtamai: Kapau ʼe tou fakafonu totatou ʼatamai ʼaki he ʼu manatu ʼe lelei, ʼe toe lelei anai mo tatatou aga. (Filipe 4:⁠8) Kae kapau ʼe tou taupau he ʼu manatu ʼe heʼemaʼa, ʼe iku anai ki he ʼu aga ʼe kovi. (Mateo 15:​18-20) ʼE tonu ke tou tekeʼi te ʼu faʼahiga fakafiafia ʼaē ʼe feala ke ʼulihi ai totatou ʼatamai. ʼE feala ke tou fakafonu totatou ʼatamai ʼaki he ʼu manatu ʼe lelei ʼi tatatou ako te Folafola ʼa te ʼAtua.

5. Tou Nofo Maʼa ʼi Te Faʼahi Fakasino: Mai tona ʼuhiga ʼaē ʼe nātou fakafofoga te ʼAtua, koia ʼe tonu ai ki te kau Kilisitiano ke nātou fakamaʼa tonatou sino pea mo tonatou ʼu mutuʼi meʼa. ʼE tonu ke tou fanofanoʼi totatou ʼu nima ʼi te ʼosi fakaʼaogaʼi ʼo te fale vao, pea ʼe tonu ke tou fanofanoʼi totatou ʼu nima ʼi muʼa ʼo te kai peʼe ʼi muʼa ʼo hatatou fāfā ki he meʼa kai. Kapau ʼe mole koutou maʼu he ʼu tuio ke fakaʼalu ai te vai ʼaē kua ʼuli, ʼe tonu ke tanu te ʼu faifekau. (Teutalonome 23:​12, 13) Kapau ʼe koutou maʼa ʼi te faʼahi fakasino, pea ʼe lelei anai tokotou maʼuli fakasino. Ko te ʼapi ʼo te Kilisitiano ʼe tonu ke tokalelei pea mo maʼa ʼi loto pea mo tuʼa. ʼE tonu ke ʼiloʼi koutou e te hahaʼi ʼo tokotou kolo, ʼe koutou tuku he faʼifaʼitaki lelei.

6. Ke Maʼa Tatatou ʼu Palalau: Ko te kau kaugana ʼa te ʼAtua ʼe tonu ke nātou tala tuʼumaʼu te moʼoni. Ko te kau gutuloi ʼe mole nātou hū anai ki te Puleʼaga ʼo te ʼAtua. (Efesi 4:25; Fakahā 21:⁠8) ʼE mole palalau kovi te kau Kilisitiano. ʼE mole nātou fagono peʼe nātou fai he ʼu fakahuahua ʼe heʼemaʼa peʼe ko he ʼu hisitolia ʼe mole lelei. ʼE nātou makehe ʼi tonatou fale gāue, ʼi te faleako, mo te ʼu hahaʼi ʼo tonatou kolo, koteʼuhi heʼe maʼa tanatou ʼu palalau.​—⁠Efesi 4:​29, 31; 5:⁠3.

[Paki ʼo te pasina 19]

Ko te kau kaugana ʼa te ʼAtua ʼe tonu ke nātou maʼa ʼi te ʼu faʼahi fuli pe